ب/ زه‌كاتا په‌زى مه‌رجێت خۆ يێت هه‌ين هه‌تا زه‌كات لێ بكه‌ڤيت، دڤيت ئه‌و په‌ز باراپتر ژ سالێ بچه‌ريت و خودانكرنا وان باراپتر ژ سالێ نه سه‌ر ئالفى بيت، هه‌كه په‌ز نه‌هێته به‌ردان بۆ چه‌رێ و ل سه‌ر ئالفى بژيت زه‌كات لێ ناكه‌ڤيت، و ديسا دڤێت ساله‌ك سه‌رڤه بچيت و هژمارا وان بگه‌هيته چلان، و هندى نه‌گه‌هيته چلان زه‌كات لێ ناكه‌ڤيت، و چو جوداهي د ناڤبه‌را په‌زێ سپى و ره‌شدا نينه، هه‌ردوو ئێك حسێبن، و هه‌كه په‌ز يێ تێكه‌ل بيت پێكڤه دهێنه هه‌ژمارتن، ڤێجا هه‌ركه‌سێ چل په‌ز هه‌بن ـ چ ره‌ش چ سپى، چ ژى تێكه‌ل ـ و سال سه‌رڤه چۆ و باراپتر ژ سالێ چه‌ريان دڤێت ئه‌و زه‌كاتا په‌زى بده‌ت، و ژ چلان زه‌كات لێ دكه‌ڤيت و دڤێت گيسكه‌كى زه‌كات ده‌ربێخيت، و هۆسا هه‌تا دبنه سه‌د و بيست، و هه‌رگاڤا بوونه سه‌د و بيست و ئێك دڤێت دوو گيسكان زه‌كات ده‌ربێخيت، و هۆسا هه‌تا دبنه دوو سه‌د، و هه‌رگاڤا بوونه دوو سه‌د و ئێك، دڤێت سێ گيسكان ده‌ربێخيت هه‌تا دبنه چار سه‌د، پشتى چار سه‌دان زه‌كاتا وان هه‌ر سه‌دان گيسكه‌كه، و هه‌كه به‌رخ كره زه‌كات دڤێت ئه‌و به‌رخ بيت يێ شه‌ش هه‌يڤ بۆراندبن، و هه‌كه گيسك زه‌كات ده‌رێخست ژ په‌زێ ره‌ش دڤێت ساله‌ك بۆراندبيت، و هه‌چيێ دا دورسته، به‌لێ ئه‌وێ په‌زى خودان نه‌كه‌ت و بازرگانيا په‌زى بكه‌ت ـ بكريت و بفرۆشيت، و دبيت په‌ز هه‌يڤه‌كێ يان پتر يان زێده‌تر ده‌ف وى بمينيت ـ هنگى ئه‌و دێ زه‌كاتا مالێ بازرگانيێ ده‌ت نه‌زه‌كاتا په‌زى، و دێ په‌زێ ل ده‌ف بهاكه‌ت، و هه‌كه پارێ وان گه‌هشته نيسابێ زه‌كاتێ و ساله‌ك سه‌رڤه چۆبيت دێ (2.5%) زه‌كاتێ ده‌ت و خودێ چێتر دزانيت.
