ب / بۆچۆنا دورستتر ژ گۆتنێت زانايان: هه‌كه خوارن و قويت هاته هه‌لبژارتن بۆ فترێ بێته ده‌رێخستن، دڤێت ئه‌و خوارن و قويت بيت، يا ژيارا خودانێ فترێ و خه‌لكێ وى جهي ل سه‌ر، ئه‌ڤه هه‌كه ئه‌و يێ جودا نه‌بيت ژ خه‌لكى هه‌ر وێ خوارنێ دخۆت يا خه‌لك دخۆت، و هه‌كه جوداهيه‌ك د ناڤبه‌را وى و خه‌لكيدا هه‌بيت ئه‌و دێ وێ خوارنێ ده‌ت ئه‌وا ژيارا وى ل سه‌ر، نه‌خوارنا خه‌لك دده‌ت، و ئه‌و خوارنێت ل سه‌ر ده‌مێ پێغه‌مبه‌رێ خۆشتڤێ (سلاڤێت خودێ لێ بن) دهاتنه دان هه‌روه‌كى د حه‌ديسا ئه‌بى سه‌عيدێ خودريدا (خودێ ژێ رازي بيت)هاتى: چار بوون، دبێژيت: مه زه‌كاتا فترێ منه‌ك ده‌رێدخست، منه‌ك ژ جه‌هي يان منه‌ك ژ قه‌سپان يان منه‌ك ژ كه‌شكى يان منه‌ك ژ مێويژان. و زانايێت مه دبێژن: ئه‌و حه‌ديسێت به‌حسێ گه‌نمى دكه‌ن كو ل سه‌ر ده‌مێ پێغه‌مبه‌رێ خۆشتڤێ (سلاڤێت خودێ لێ بن) هاتيه‌دان نه د بنه‌جهن، چونكى ده‌خل يێ كێم بوو، و ل سه‌ر ده‌مێ موعاويه‌ى ده‌مێ گه‌نمێ شامێ هاتى، بهايێ وى ده‌رێخست: نيڤ من، شوينا منه‌كا خوارنێت دى دا، بۆچى ئه‌و خوارن.. تنێ چونكى ژيارا خه‌لكێ وى ده‌مى ل سه‌ر وان خوارنا بوو، ئه‌ڤه وێ دگه‌هينيت هه‌كه مه خوارن هه‌لبژارت بۆ فترێ بده‌ين و ده‌ربێخين، دڤێت ئه‌و خوارن بيت يا ژيارا مه بارا پتر ل سه‌ر وێ خوارنێ.
ئه‌ڤرۆ مه كوردان باراپتر ژيارا مه ل سه‌ر برنجيه، دڤێت برنجى بده‌ين نه قه‌سپ و تشته‌كێ دى، و كا كيژ جوينێ برنجى تو دخۆى دڤێت وى برنجى بده‌ى، نه‌ئێكى بخۆى يێ ژ هه‌ميا برنجيتر و ئێكێ دى بده‌ى، ئه‌ڤه نه‌يا دورسته، و هه‌كه ته بها دا دڤێت نرخێ وى برنجى بده‌ى يێ تو دخۆى نه‌يێ خه‌لك دخۆت، و هه‌كه خوارن هاته ده‌رێخستن دڤێت ژ ساعه‌كى يان منه‌كێ كێمتر نه‌بيت، و ئه‌و ساعا سه‌رده‌مێ پێغه‌مبه‌رێ خۆشتڤێ (سلاڤێت خودێ لێ بن) ب كێشانا ئه‌ڤرۆ دبيته (2،156) دوو كيلۆ و سه‌د و پێنجى و شه‌ش غرام، و دا مرۆڤ ژ ئختيلافێ ده‌ركه‌ڤيت دوو كيلۆ و نيڤا بده‌ت باشتره. و هنده زانا دبێژن ساع يان من، چار مستێت زه‌لامه‌كێ ناڤنجينه، به‌لێ ئه‌ز دبێژم: ل ڤى سه‌رده‌مى ب كيلۆيان بێته‌دان، دبيت دورستتر و پتر نێزيكى راستيێ بيت، چونكى به‌رده‌وام مست جهێ ئختيلافێنه.. ئه‌ڤه مستێت وى د بچويكن و يێ دى د مه‌زنن و هۆسا، له‌وا ئه‌ز دبينم: ئعتيماد ل سه‌ر كێشانێ بيت، دبيت پتر نێزيكى راستيێ بيت، هه‌لبه‌ت هه‌ر خوارنه‌كا هاته ده‌رێخستن دڤێت منه‌ك بيت، ئه‌ڤه ل ده‌ف جمهورێ زانايان، به‌لێ ئه‌بو حه‌نيفه و سوفيانێ سه‌ورى و عه‌بدوللايێ كورێ موباره‌كى دبێژن: هه‌كه ده‌خل و مێويژ هاتنه ده‌رێخستن دێ نيڤ مست هێته دان، ئه‌و به‌رێ خۆ دده‌نه بهايێ ڤان خوارنان، و بۆچۆنا جمهورى ب هێزتره، چونكه ئه‌ڤ خوارنه هه‌ر ده‌مه‌كى بهايێت خۆ يێت هه‌ين، هه‌كه ده‌مه‌كى ده‌خل يێ ب بها بيت و قه‌درێ خۆ هه‌بيت، ڤێ گاڤێ ئه‌و قه‌در و بها نه‌مايه، و خوارنێت دى ب بهاتر و ب قه‌درترن.
و هه‌كه پاره هاته‌دان دڤێت تو به‌رێ خۆ بده‌يێ كا تو باراپتر چ دخۆى و ژيارا ته بارا پتر ل سه‌ر چيه، تو دوو كيلۆ و نيڤا بهاكه، و وى بهاي بده، و دبيت هه‌رسال بها ب ره‌نگه‌كى بيت، دويف بلندى و نزميا بهايێ وان خوارنان، و چو بهايێت به‌رده‌وام نينن بێژين هه‌رسال دێ هندێ ده‌ن، و يێ موسلمان يێ رژد و هشياره سه‌ر خێرێ كا چه‌ند هاته بهاكرن هندى دى دهاڤێته سه‌ر و دده‌ت، دا خودێ ژێ قه‌بويلكه‌ت، ئه‌ڤه يێ شيان هه‌بن و خودێ چێتر دزانيت.
