ب / جمهورێ زانايان دبێژن: فتره زه‌كاته، و زه‌كات كا بۆ كێ دكه‌ڤيت و دورسته، فتره ژى بۆ وى دورسته، و دڤێت بزانين هه‌شت ره‌نگێت مرۆڤان پشك و بار د زه‌كاتێدا يێت هه‌ين، نه فه‌قيران ب تنێ، ئه‌و ژى ئه‌ڤه‌نه هه‌روه‌كى د قورئانا پيرۆزدا هاتى: ((إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ فَرِيضَةً مِّنَ اللَّهِ وَاللَّهُ عَلِيمٌ حَكِيمٌ)) (التوبه/60)، ئانكو: ب راستى زه‌كات به‌س بۆ وانه: ئه‌وێت هه‌ژار و به‌لنگاز، و ئه‌وێت ل سه‌ر شۆل دكه‌ن [بۆ كۆمكرنا زه‌كاتێ] و ئه‌وێت دلێ وان به‌ر ب ئيسلامێڤه دئێته كێشان (ژ كه‌سێت موسلمان بووين و هێژ موكوم نه‌بووين يان گره‌گرێت گاوران دا زيانا وان بێته پاشڤه‌برن و دلێ وان بۆ ئيسلامێ بێته نه‌رمكرن) و بۆ ئازاكرنا به‌نده‌يان و بۆ ده‌ينداران و بۆ رێيا خودێ (جيهادێ ب هه‌مى ره‌نگانڤه) و رێڤينگانه، ئه‌ڤه فه‌رزه ژ ده‌ف خودێ، و خودێ ب خۆ يێ زانا و كاربنه‌جهه. و زانايێ ناڤدار ئبن ته‌يميه (خودێ ژێ رازي بيت)دبێژيت: هنده زانا دبێژن.. فتره وه‌كى كه‌فاره‌تا سويندێيه، و كا چاوا كه‌فاره‌تا سويندێ بۆ كه‌سێ نه‌دورسته يێ فه‌قير نه‌بيت فتره ژى وه‌سا، راسته زه‌كاته به‌لێ سه‌به‌بێ وێ له‌شه نه ماله، به‌لگه ژى ل سه‌ر هه‌مى كه‌سان واجبه، ئه‌و نه‌بيت يێ چو چو نه‌بيت، يان قويتێ رۆژا عه‌يدێ پێڤه‌تر نه‌بيت، ماده‌م وه‌سايه دڤێت به‌س بۆ فه‌قيران بيت، چونكى ژ پێغه‌مبه‌رێ خۆشتڤى (سلاڤێت خودێ لێ بن) هاتيه زانين: هه‌روه‌كى ئبن عه‌باس (خودێ ژێ رازي بيت)ڤه‌دگێريت، دبێژيت: پێغه‌مبه‌رى (سلاڤێت خودێ لێ بن) فتره بۆ رۆژيگرى پاك و پاقژيه ژ گۆتن و كريارێت بێ وه‌ج و پويچ و ژ ئاخفتنێت سه‌قه‌ت و شكه‌ستى و بۆ به‌لنگازان خوارن واجب كريه. ژبه‌ر ئه‌ڤا بۆرى فتره ناهێته دان بۆ ئه‌وێت زه‌كات بۆ دكه‌ڤيت و بۆ فه‌قيران تنێ دكه‌ڤيت، و پاشى دبێژيت: ئه‌ڤ بۆچۆنه ب به‌لگه‌يێ خۆ بهێزتره و خودێ چێتر دزانيت.
