ب/ هه‌لبه‌ت خودێ مه‌زن به‌حسێ هه‌يڤێ كريه و دبێژيت: ((يَسْأَلُونَكَ عَنِ الْأَهِلَّةِ قُلْ هِيَ مَوَاقِيتُ لِلنَّاسِ)) (البقره: 189)، ئانكو: ئه‌م ب ڤێ هه‌يڤێ ده‌مێت خۆ دزانين كا ئه‌م د كيژ وه‌ختيداينه و كه‌تينه د كيژكێدا، ڤێجا وه‌ختێ هه‌يڤا شه‌عبانێ ب دويماهى دئێت دڤێت موسلمان زێره‌ڤانيا ده‌ركه‌فتنا هه‌يڤا ره‌مه‌زانێ بكه‌ن، و هه‌ر وه‌ختێ ئه‌و هه‌يڤ هاته ديتن ل سه‌ر هه‌مى موسلمانان پێدڤيه ب رۆژى بن و نه‌مه‌رجه هه‌مى موسلمان هه‌يڤێ ببينن، به‌سه مرۆڤه‌ك ب تنێ ببينيت، ب مه‌رجه‌كي يێ دادڤان بيت (عادل بيت) ئه‌گه‌ر ئێك ب تنێ هه‌يڤێ ببينيت و بێته دادگه‌ها شه‌رعى و شاده‌يێ ب ديتنا هه‌يڤێ بده‌ت، دادوه‌ر دێ بريارێ ب ره‌مه‌زانێ ب شاده‌ييا وى ده‌ت.
ئيمامێ ترمزى (خودێ ژێ رازي بيت)دبێژيت: باراپتر ژ زانايان ل سه‌ر ڤێ چه‌ندێنه كو ديتنا ئێكي به‌سه كو هه‌مى ب رۆژى بن، هه‌روه‌سا ئيمامێ شافعي ژى (خودێ ژێ رازي بيت)خودانێ خۆ و ڤێ بۆچۆنێيه ژبه‌ر فه‌رمووده‌يا عه‌بدوللايێ كورێ عومه‌رى (خودێ ژێ رازى بيت))، دبێژيت: موسلمانان هه‌ميان به‌رێ خۆ ددانه هه‌يڤێ و ل به‌ر راوه‌ستيابوون، من هه‌يڤ ديت، ئينا من گۆته پێغه‌مبه‌رى (سلاڤێت خودێ لێ بن). ژ ڤه‌گێرانا ئه‌بو داوود و حاكم و ئه‌حمدێ كورێ حه‌نبه‌ليه و خودێ چێتر دزانيت.
