ب/ د ڤێرێدا زانا هه‌مى نه‌ئێك خه‌به‌رن، به‌لێ پێدڤيه بزانين ل سه‌ر موسلمانان هه‌ميان پێدڤيه پێگريێ ب وێ ديتنێ بكه‌ن و ب رۆژى بن، ژبه‌ر كو دا ژێكڤه‌بوون د ناڤ موسلماناندا نه‌قه‌وميت، و پێغه‌مبه‌رێ خودێ ژى (سلاڤێت خودێ لێ بن) ئاخفتنا خۆ ئاراسته‌ى موسلمانان هه‌ميان دكه‌ت، دبێژيت: ((صومُوا لِرُۆێتِهِ، وَأَفْطرُوا لِرُۆێتِهِ، فإِن غمي عَليكم، فَأَكْمِلُوا عِدَّه شَعْبانَ ثلاثينَ)). ئانكو: هه‌كه هه‌وه هه‌يڤا ره‌مه‌زانێ ديت.. ب رۆژى بن، و هه‌كه هه‌وه هه‌يڤا شه‌والێ ديت.. بخۆن، و هه‌كه عه‌ور كه‌فته مابه‌ينا هه‌وه و ديتنا هه‌يڤا ره‌مه‌زانێ.. شه‌عبانێ بكه‌نه سيه. ئه‌ڤ فه‌رمووده دبێژيت: هوين هه‌مى ب رۆژى بن دگه‌ل ديتنا هه‌يڤێ. ژ ڤێرێ بۆ مه ئاشكرا دبيت دڤێت هه‌مى موسلمان پێگريێ ب ديتنا باوه‌ريێ بكه‌ن و ب رۆژى بن.
ئيمامێ شافعى (خودێ ژێ رازي بيت)دبێژيت: هه‌ر باژێره‌كي ديتنا خۆ يا هه‌ى، چو جه ب ديتنا جهه‌كێ دى ب رۆژى نابن. ئيمامێ ئه‌بو حه‌نيفه (خودێ ژێ رازي بيت)دبێژيت: ئه‌گه‌ر ل پايته‌ختى هاته ديتن دڤێت هه‌مى باژێر و باژێركێت پێڤه گرێداى ب رۆژى بن، ئه‌گه‌ر نه؛ هه‌ر وه‌لاته‌كي ديتنا خۆ هه‌يه، به‌لێ ب ديتنا من بۆچۆنا ب هێزتر ئه‌ڤه‌يه ئه‌گه‌ر ل جهه‌كي هه‌يڤ هاته ديتن ـ به‌لێ ئه‌و جهێ باوه‌ريێ بيت ـ دڤێت هه‌مى پێگريێ ب وێ ديتنێ بكه‌ن، و ب رۆژى بن چونكى زانين ڤێ چه‌ندێ په‌سند دكه‌ت و دبێژيت: هه‌يڤێ ئێك ده‌ركه‌فتنا هه‌ى و هه‌ر د ئێك شه‌ڤدا ده‌ردكه‌ڤيت، و ل هه‌مى جهان دئێته ديتن، ژبه‌ر كو نينه جهه‌كي شه‌ڤ بيت و پارچه‌يه‌كا وێ شه‌ڤێ يا هه‌يڤ تێدا ده‌ركه‌فتى نه‌كه‌ڤيته دگه‌ل شه‌ڤا هه‌ر جهه‌كێ دى بيت، يان جهه‌كي رۆژ بيت و پارچه‌يه‌ك ژ وێ رۆژێ نه‌كه‌ڤيته دگه‌ل رۆژا هه‌ر جهه‌كێ دى يێ هه‌بيت، ئه‌ڤه مه‌عنا وێ ئه‌وه ئه‌و شه‌ڤا هه‌يڤ تێدا دئێته ديتن رۆژا پاشتر پێدڤيه هه‌مى ب رۆژى بن و خودێ چێتر دزانيت.
