ب/ راسته رۆژى ل سه‌ر بچويكان نينه هه‌تا بالق دبن، به‌لێ پێدڤيه ل سه‌ر دايبابان ڤى بچويكى فێرى عيباده‌تى بكه‌ن و فێرى دينى بكه‌ن و ل سه‌ر پارێزكارى و ترسا خودێ مه‌زن بكه‌ن، دا ده‌مێ مه‌زن دبن ل سه‌ر ڤێ چه‌ندێ رابن، ب راستى مرۆڤ بچويكى ل سه‌ر چ راكه‌ت دێ ل سه‌ر هندێ مه‌زن بيت، و ل سه‌ر هندێ دێ رابيت، و يا فه‌ر ل سه‌ر دايبابان ئه‌وه، ئه‌گه‌ر دلێ وان ب بچويكێ وان ڤه‌يه، رۆژيێ پێ بده‌نه گرتن.. ئه‌گه‌ر گه‌له‌ك برسى بوون ژ نوى بلا بخۆن، به‌لێ ئه‌گه‌ر دايباب بێژنێ نابيت تو يێ ب رۆژى بى، تو يێ بچويكى و دێ نه‌ساخ بى و دێ كه‌ڤى، و دێ هۆ ل ته ئێت و هۆ ل ته ئێت... هتد. ئه‌ڤه گه‌له‌كا خه‌له‌ته و نه‌يا دورسته و نه د جهێ خۆدايه و ناكه‌ڤيته به‌ر وى سه‌روبه‌رێ سه‌حابى تێدا دگه‌ل عه‌يالێت خۆ.
ره‌بيعا كچا موعه‌وزى (خودێ ژێ رازي بيت)دبێژت: (مه رۆژى ب بچويكێت خۆ ددانه گرتن و مه دگه‌ل خۆ دبرنه مزگه‌فتێ، و ئه‌گه‌ر هات و بچويكان ژ برساندا كربانه گرى مه بويكێت هريێ بۆ چێ دكرن دا پێ مژويل ببن و خۆ و برسا خۆ ژبيرڤه‌كه‌ن).
هه‌لبه‌ت ئه‌ڤ فه‌رمووده ژ ڤه‌گێرانا بوخارى و موسلميه, خودآ ژ هه‌ردوويان رازى بيت، ژ ڤێ ڤه‌گێرانێ بۆ مه دئێته زانين دڤێت دايباب هاريكارێت بچويكێت خۆ بن و رۆژيا پێ بده‌نه گرتن، و ئه‌گه‌ر كه‌تنه بن گڤاشتنێت برسێ ژى دڤێت ده‌سپێكێ وێ پێكۆلێ بكه‌ن برسا وى ژ بيرێ ببه‌ن، به‌لێ مخابن ئه‌ڤرۆ ب ناڤێ دلپێڤه‌بوونێ كو دێ زه‌ربيت يان دێ ده‌قسيت و دێ پۆتى بيت رۆژيێ پێ دده‌نه خوارن، و چه‌ند پێكۆلێ بكه‌ن راببنه پاشيڤێ ژى ناراكه‌ن ژ ترسا هندێ كو رۆژا پاشتر ب رۆژى بيت. براستى ئه‌ڤه يا خه‌له‌ته و نه د جهێ خۆدايه و بلا بچويكێ مرۆڤى ئه‌ڤرۆ فێرى رۆژيێ ببيت، چێتره مه‌زن ببيت خۆ ببينيت نه‌شێت رۆژيان بگريت و پاشى رۆژا قيامه‌تێ هه‌ژى ئاگرێ دۆژه‌هێ ببيت و خودێ چێتر دزانيت.
