ب/ چونكى ئيسلام دينه‌كه نه‌ڤێت ل سه‌ر گران بكه‌ت و ب زه‌حمه‌ت بێخيت، و ئيسلام نه‌هاتيه دا بارێ هنده‌كان زێده‌ى شيانا وان گران بكه‌ت، و هنده تشتا ژێ بخوازيت و ئه‌و ب خۆ نه‌شێن پێ رابن، و ئيسلام دينه‌كێ واقعيه هه‌تا د ئه‌ركانێت ئيسلامێدا، به‌رێ خۆ بدێ به‌رسڤه‌كا دى يا تێدا هه‌ى، ئانكو: ئيسلام ب هنده‌ك فه‌رمان و ئه‌حكامانڤه يا هاتى د شيانێت هه‌مياندانه، و ئه‌گه‌ر هات و چۆ د كراسه‌كێ ديدا و نه‌شيا پێ رابيت، ئيسلامێ ئه‌ڤ كراسه يێ به‌رچاڤ وه‌گرتى و گه‌له‌گ ئه‌حكام و فه‌رمان يێت ل سه‌ر سڤك كرين يان يێت ژێ ئێخستين و لێ ناگريت.
و ئه‌حكاميت ئيسلامێ نه‌وه‌كى به‌ره‌كێ هشكن و گوهۆرينێت د سه‌ر مرۆڤيرا دئێن به‌رچاڤ ناگريت، نه‌خێر.. ئيسلام ڤێ چه‌ندێ هه‌ميێ بۆ مرۆڤان ـ ئه‌وێت بالق ـ به‌رچاڤ دگريت و ئه‌حكامان دگه‌ل گوهۆريت و دگه‌ل ره‌وش و كراسێ وى دزڤرينيت، و هه‌ر روكنه‌كێ ئه‌م به‌رێ خۆ بده‌ينێ ڤێ چه‌ندێ واقعه‌كێ ئاشكه‌را دێ تێدا بينين. رۆژى ژى ئێك ژ وانه و دبيت مرۆڤ دانعومر بيت، پيره‌ژن بيت يان پيره‌مێر، و دبيت بكه‌ڤيته د كراسه‌كێ وه‌سادا نه‌شێت رۆژيێ دگه‌ل بگريت، ئه‌گه‌ر گه‌هشته سه‌روبه‌ره‌كێ هۆسا، رۆژى ل سه‌ر نينه، چ پيره‌مێر بيت چ پيره‌ژن، به‌لێ ئه‌و ژ خێرا رۆژيێ بێ بار نابن، و ئه‌ڤه كه‌ره‌مه‌كا خودێيه ل سه‌ر پيره‌مێر و پيره‌ژنان ئه‌وێت گه‌نجينيا خۆ د په‌رستنا خودێدا بۆراندين، وه‌ختێ دگه‌هنه وێ ژى كو نه‌شێن رۆژيان بگرن، رۆژيێ ل سه‌ر وان رادكه‌ت و ل سه‌ر وان نينه، به‌لێ ئه‌و ژ خێرێ نائێنه زرباركرن و هه‌ر خودان خێرن، چونكى تشتێ نه‌هێلايى ئه‌و ب رۆژى بن دانعومريا وانه، به‌لێ دڤێت به‌ده‌لێ بده‌ن، و به‌رامبه‌ر هه‌ر رۆژيه‌كێ خوارنا به‌له‌نگازه‌كي بده‌ن، يا دوو دانان ل دويف ناڤنجيا خوارنا خۆ. و ل ده‌ف حه‌نه‌فيان چێ دبيت بێته بهاكرن و بها شوينا خوارنێ بێته‌دان، به‌لێ شافعى و حه‌نبه‌لى ڤێ چه‌ندێ دورست ناكه‌ن، به‌لگه و نيشان ژى قورئانه:(( وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ)) هه‌روه‌كى ئبن عه‌باس (خودێ ژێ رازي بيت)دبێژيت: ئه‌ڤه به‌حسێ دانعومريه ـ پيره‌مێر و پيره‌ژنێ ـ ئه‌گه‌ر گه‌هشتنه تخويبه‌كي رۆژى ل سه‌ر وان نينه، به‌لێ دڤێت زادێ به‌له‌نگازه‌كي پێشڤه بده‌ت. ئه‌گه‌ر وان پێ چێبيت و هه‌بيت، يان ئێك يێ ل سه‌ر پێدڤى وان خودانكه‌ت پێشڤه بده‌ت، به‌لێ ئه‌گه‌ر وان نه‌بيت و كه‌س ژى نه‌بيت پێش وانڤه بده‌ت، وى ده‌مى نه رۆژى ل سه‌رن و نه به‌ده‌لێ دده‌ن، و خێر ژى هه‌ر دێ بۆ ئێنه نڤيسين، به‌لێ ئه‌گه‌ر مرۆڤى پێ چێ ببيت و شيان هه‌بن ياخێرتر ئه‌وه مرۆڤ زادێ ژ به‌له‌نگازه‌كي پتر بده‌ت پێش هه‌ر رۆژيه‌كێ، چونكى خودێ مه‌زن دبێژيت:((وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ فَمَن تَطَوَّعَ خَيْرًا فَهُوَ خَيْرٌ لَّهُ)) ئانكو: يێ ژ زادێ به‌له‌نگازه‌كي پتر بده‌ت ئه‌و بۆ وى ب خێرتره، ڤێجا ئه‌گه‌ر ئێكي شيان هه‌بن بكه‌ته خوارنا دووسێ به‌له‌نگازان هێژ ئه‌و بۆ ب خێرتره و خودێ چێتر دزانيت.
