ب/ ئه‌و ده‌ستويريێت دورست مرۆڤ رۆژيێ دگه‌ل بخۆت چه‌نده‌كن، ئه‌و ژى وه‌كى به‌رى نوكه مه گۆتى: ئيسلام دينه‌كێ واقعيه و نه‌ڤێت خه‌لكى ته‌نگاڤ بكه‌ت و بارێ وان گران بكه‌ت، كو نه‌شێن ب فه‌رزێت ئيسلامێ رابن، و دگه‌ل هندێ ژى هه‌مى فه‌رمانێت ئيسلامێ دويف شيانێت مرۆڤينه، و ئيسلام دزانيت مرۆڤ دێ ئێته ڤه‌گوهاستن بۆ هنده‌ك كراسان، و هنده‌ك كاودان دێ ب سه‌ردا ئێن، نه‌شێت رۆژيێ تێدا بگريت، له‌وا ئه‌ڤ چه‌نده به‌رچاڤ گرتيه و چه‌ند ده‌ستويريه‌ك يێت داينێ رۆژيێ تێدا بخۆت، ژ وان: دانعومرى ـ چ پيره‌مێر چ ژى پيره‌ژن ـ وه‌كى به‌رى نوكه هاتى دورسته بۆ وان ئه‌و رۆژيێ بخۆن، و به‌رامبه‌ر خوارنا هه‌ر رۆژيه‌كێ دێ زادێ به‌له‌نگازه‌كي ده‌ن.
يێ دوويێ ده‌ستويرى بۆ هه‌ى ژنا ب دووگيان و يا بچويكێ ب شير هه‌ى، بۆ وان ژى هه‌يه رۆژيێ نه‌گرن و بخۆن. ژنا ب دووگيان، دبيت يا بێ چاره‌بيت و ژ خۆ بترسيت، يان ژى ژ بچويكێ خۆ، چونكى بچويكێ د زكيدا ل سه‌ر وێ دژيت، و يا بچويكێ ب شير هه‌ى، د يسا بچويكێ وێ ژى يێ ب هيڤيا خوارنا وێڤه، ڤێجا دبيت هند شير نه‌بيت بچويكێ وێ تێر ببيت، يان ژ خۆ بترسيت گه‌له‌ك لاواز ببيت، بۆ وان هه‌يه رۆژيێ بخۆن، به‌لێ كا پشتى هنگي چ ل سه‌ر وانه ئه‌و بكه‌ن.
* ئه‌بو حه‌نيفه و ئه‌بو عوبه‌يد و ئه‌بو سه‌ور و و عه‌تاْء زوهرى و نه‌خه‌عى و سه‌عيدێ كورێ جوبه‌يرى خودآ ژ وان رازى بيت، دبێژن: ئه‌و رۆژيێت خوارين ژبه‌ر حه‌ملى و بچويكێ ب شير دێ بۆ خۆ قه‌زاكه‌ت و گريته‌ڤه و چو دى ل سه‌ر نينه، و چو به‌ده‌لان ژ خوارنا به‌له‌نگازان ناده‌ن.
* ئيمام ئه‌حمه‌د و ئيمامێ شافعى خودێ ژ هه‌ردوويان رازى بيت، دبێژن: ئه‌گه‌ر ئه‌و ژ خۆ ترسيان يان ژ خۆ و بچويكێ خۆ پێكڤه ترسيان و رۆژى خوارن، چو ل سه‌ر وان نينه، به‌س قه‌زاكرن ـ گرتنا رۆژێى جاره‌كا دى ـ. به‌لێ ئه‌گه‌ر وان رۆژى خوار، نه ژبه‌ر خۆ به‌لێ ژبه‌ر بچويكێ خۆ ب تنێ، وى وه‌ختى دێ قه‌زاكه‌ن، و به‌ده‌لێ ژى ده‌ن، خوارنا به‌له‌نگازه‌كي به‌رانبه‌ر هه‌ر رۆژيه‌كێ و خودێ چێتر دزانيت.
