ب/ دڤێت مرۆڤ بزانيت خوارنا رۆژيێ د سه‌فه‌رێدا ده‌ستويره، و وى ڤيا بخۆت و ڤێ ده‌ستويريێ وه‌رگريت و رۆژيا خۆ بخۆت و پاشى بۆ خۆ بگريته‌ڤه، و يێ ڤيا ژى وێ ده‌ستويريێ وه‌رناگريت و رۆژيا خۆ ناخۆت، ئه‌ڤه ئه‌گه‌ر مرۆڤى ئه‌زيه‌ت و زه‌حمه‌ته‌كا مه‌زن د گرتنا رۆژيێدا نه‌ديت، به‌لێ ئه‌گه‌ر زه‌حمه‌تێ و نه‌خۆشيێ د گرتنا رۆژيێدا ببينيت و ئه‌و د سه‌فه‌رێدا، ياچێتر ئه‌وه رۆژيا خۆ بخۆت، ده‌ستويريا خودێ بۆ خۆ وه‌رگريت، به‌لێ ئه‌گه‌ر رۆژى بۆ يا ب زه‌حمه‌ت نه‌بيت بۆ هه‌يه يێ ب رۆژى بيت، به‌لگه و نيشان ل سه‌ر ڤێ چه‌ندێ.. حه‌مزه‌يێ ئه‌سله‌مى (خودێ ژێ رازي بيت)گۆت: ئه‌ى پێغه‌مبه‌رێ خودێ.. من پێ چێ دبيت و ئه‌ز دشێم د سه‌فه‌رێدا يێ ب رۆژى بم، باشه ئه‌گه‌ر ئه‌ز رۆژيا خۆ نه‌خۆم ما گونه‌هه‌ك بۆ من هه‌يه؟ ئينا پێغه‌مبه‌رى (سلاڤێت خودێ لێ بن)گۆتى: (نه‌خێر، و سه‌فه‌ر ده‌ستويره‌كه ل ده‌ف خودێ يێ پێ كر و رۆژيا خۆ خوار باشه، و يێ ڤيا ب رۆژى بيت چو گونه‌ه ل سه‌ر نينه).
به‌لێ ژ گۆتنا پێغه‌مبه‌رى (سلاڤێت خودێ لێ بن) ئاشكه‌را دبيت: ((هِێ رُخْصَه من اللَّهِ فَمَنْ أَخَذ بها فَحَسَنٌ وَمَنْ أَحَبَّ أَنْ ێصُومَ فلا جُنَاحَ عليه)) ديار دبيت ئه‌گه‌ر مرۆڤ ده‌ستويريێ وه‌رگريت چێتره، دبێژيت: ((هِێ رُخْصَه من اللَّهِ فَمَنْ أَخَذ بها فَحَسَنٌ)) ئانكو: يێ پێ كر باشه، و يێ ڤيا ب رۆژى بيت ((وَمَنْ أَحَبَّ أَنْ ێصُومَ)) چو گونه‌ه ل سه‌ر نينه (فلا جُنَاحَ عليه) ئه‌ڤه ئيشاره‌ته بۆ هندێ كو وه‌رگرتنا ده‌ستويريا خودێ چێتر و ب خێرتره ژ وه‌رنه‌گرتنا وێ، ئه‌ڤ فه‌رمووده ژ ڤه‌گێرانا ئيمام موسلميه.
ديسا ئه‌وێت ده‌ستويرى هه‌ى رۆژيێ بخۆن (نه‌ساخن)، به‌لێ كيژ نه‌ساخى؟ و مه چه‌ند ره‌نگێت نه‌ساخيێ هه‌نه؟ هنده‌ك نه‌ساخى يێت هه‌ين رۆژى ب خۆ بۆ چاره و ده‌رمانه، و زانينا ساخله‌ميێ و دوختۆرى يا ئه‌ڤرۆ ڤێ چه‌ندێ په‌سه‌ند دكه‌ت كو ب راستى رۆژى ده‌رمان و چاره‌يه بۆ گه‌له‌ك ره‌نگێت ئێش و نه‌خۆشيان، ڤێجا پێدڤيه ئه‌م بزانين د نه‌ساخيا هۆسادا دڤێت ئه‌م تێدا ب رۆژى بين، چونكى دوو به‌رهه‌مان دێ ب ده‌ستێ خۆڤه ئينين، ئێك: مه رۆژيا خۆ گرت.. مه ژ ده‌ست خۆ نه‌كر، دوو: ئه‌ڤ رۆژيه بۆ نه‌ساخيا من بوو ده‌رمان و ئه‌ز ساخ بووم، ئه‌ڤه هه‌روه‌كى من ده‌رمان خوارى و فه‌رمانا من ب ڤێ چه‌ندێ يا هاتيه‌كرن (تداووا عباد الله)، و رۆژى ب خۆ ژى ئه‌و ده‌رمانه ئه‌وێ پێغه‌مبه‌رى (سلاڤێت خودێ لێ بن) فه‌رمانا مه كرى ئه‌م بۆ خۆ لێ بگه‌رين.
نه‌ساخيه‌كا دى يا هه‌ى، ئه‌گه‌ر ئه‌و رۆژيێ دگه‌ل بگريت دبيت سلامه‌تيا وى گيرۆ ببيت يان ئێشا وى پتر لێ بيت، ئه‌ڤى بۆ هه‌يه رۆژيا خۆ بخۆت و پاشى پشتى ره‌مه‌زانێ ته‌مه‌ت وان رۆژيێت خوارين بگريته‌ڤه و چو گونه‌ه ل سه‌ر نينه، ئه‌و يێ ده‌ستويردايه ده‌مێ چاره‌سه‌ركرنا خۆ رۆژيا خۆ بخۆت، و هنده‌ك جاران دبيت نه‌ساخ قه‌بويل نه‌كه‌ت رۆژيا خۆ بخۆت و بلا ئه‌زيه‌ت بگه‌هيتێ، ئه‌ڤه يا خه‌له‌ته و نه‌يا دورسته، چو تێدا نينه ئه‌و رۆژيا خۆ بخۆت و پاشى پشتى ره‌مه‌زانێ كا چه‌ند رۆژى ژێ چۆينه بۆ خۆ بگريت و قه‌زا بكه‌ته‌ڤه. خودايێ مه‌زن دبێژيت: (وان كنتم مريضا أو على سفر فعده من أيام أخر) ئانكو: ئه‌گه‌ر هوين د نه‌ساخ بن هندى رۆژيێت هه‌وه خوارين پاشى بگرنه‌ڤه.
نه‌ساخيه‌كا دى يا هه‌ى دبێژنێ نه‌ساخيا دۆم درێژ، كو نه‌ساخ دڤێت به‌رده‌وام و رۆژانه ده‌رمانا بخۆت، و ئه‌گه‌ر ده‌رمانان نه‌خۆت دێ تووشى ئه‌زيه‌ته‌كا مه‌زن بيت و نه‌شێت ده‌رمانان ڤه‌بريت، ئه‌ڤى رۆژى ل سه‌ر نينن و رۆژيا ناگريت، به‌لێ به‌رامبه‌ر هه‌ر رۆژيه‌كێ دێ زادێ به‌له‌نگازه‌كي ده‌ت، ئه‌ڤه ئه‌گه‌ر وى پێ چێ بيت، و ئه‌گه‌ر شيان نه‌بن ـ كه‌س نه‌بيت ژ ئه‌ڤێت دڤێت خودانيێ ژێ بكه‌ن كو پێشڤه به‌ده‌لێ بده‌ن ـ وى ده‌مى به‌ده‌ل ژى ـ زادێ به‌له‌نگازه‌كێيه به‌رانبه‌ر هه‌ر رۆژيه‌كێ ـ ل سه‌ر نينه و خودێ چێتر دزانيت.
