ب/ دڤێت ئه‌م بزانين خودايێ مه‌زن فه‌رمانا مه دكه‌ت ئه‌م ب ده‌ستێ خۆ، خۆ نه هاڤێژينه د ناڤبرێندا (هيلاكێ) و خۆ ئيزا نه‌ده‌ين و خودێ ب خۆ يێ دلۆڤانه و نه‌ڤيايه ڤى دينى ل به‌ر مه گران بكه‌ت و ب زه‌حمه‌ت بێخيت كو ئه‌م نه‌شێين پێ رابين، ڤێجا بلا ئه‌ڤێ نه‌ساخ بزانيت خودێ مه‌زن بۆ دورست كريه و رێ يا دايێ ئه‌و رۆژيا خۆ بخۆت، نه‌خاسمه ئه‌گه‌ر رۆژى چاره و سلامه‌تيا وى گيرۆ بكه‌ت، يان پتر ل سه‌ر گران بكه‌ت، و نابيت بێژيت ئيللا دێ گرم، و بلا رۆژيا خۆ بخۆت و خودێ مه‌زن ئه‌و مافێ دايێ وه‌كى دبێژيت:((يَا أَيُّهَا الَّذِينَ آمَنُوا لَا تَأْكُلُوا أَمْوَالَكُم بَيْنَكُم بِالْبَاطِلِ إِلَّا أَن تَكُونَ تِجَارَةً عَن تَرَاضٍ مِّنكُمْ وَلَا تَقْتُلُوا أَنفُسَكُمْ إِنَّ اللَّهَ كَانَ بِكُمْ رَحِيمًا)) و خودێ يێ دلۆڤانه و دبێژيت: ((وَمَا جَعَلَ عَلَيْكُمْ فِي الدِّينِ مِنْ حَرَجٍ )) ئانكو: گرانى بۆ هه‌وه نه‌ئێخستيه د دينيدا، و د ئايه‌ته‌كا ديدا دبێژيت:((يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ )) ئانكو: خودێ دڤێت ل به‌ر هه‌وه ب ساناهى بێخيت و نه‌ڤێت ل سه‌ر هه‌وه گران بكه‌ت، ڤێجا بۆ وى هه‌يه ئه‌و رۆژيا بخۆت و ده‌رمانێت خۆ وه‌رگريت. به‌لێ ئه‌گه‌ر دختۆرى ده‌رمانێت خوارنێ نه‌دانێ و به‌س ده‌رزيك ـ شرينقه ـ ب تنێ دانێ، ئه‌و دشێت يێ ب رۆژى بيت و ده‌رزيكا ـ شرينقا ـ خۆ ژى دانيت، چ ده‌رزيكا ـ شرينقا ـ رانى بيت يان يا ده‌ستى، ب مه‌رجه‌كى ئه‌ڤ ده‌رزيكه ـ شرينقه ـ نه ئه‌و بيت يا جهێ خوارنێ بگريت، وه‌كى دى هه‌مى ره‌نگێت ده‌رزيكان ـ شرينقان ـ دورسته نه‌ساخ بدانيت و رۆژى پێ ناكه‌ڤيت. ئبن حازم و ئبن ته‌يمييه دبێژن: هه‌ر چ ده‌رزيكا ـ شرينقا ـ هه‌بيت رۆژى پێ ناكه‌ڤيت خۆ ده‌رزيكا ـ شرينقا ـ پاشيێ ژى بيت، به‌لێ وه‌كى مه گۆتى ب مه‌رجێ هندێ نه‌ئه‌وبيت يا جهێ خوارنێ بگريت و خودێ چێتر دزانيت.
