ب/ نه‌زه‌ر و به‌رێخۆدانا خه‌له‌ت هه‌مى ده‌مان بۆ مرۆڤێ موسلمان نه‌يا دورسته، ره‌مه‌زان بيت ئان نه‌ره‌مه‌زان بيت، به‌لێ پا ئێكجار د ره‌مه‌زانێدا نه‌يا دورسته و يا حه‌رامه، و پێغه‌مبه‌ر (سلاڤێت خودێ لێ بن) دبێژيت: ((به‌رێخۆدانا خه‌له‌ت تيره‌كه ژ تيرێت شه‌يتانى، ڤێجا هه‌چيێ ژ ترسێت خودێدا بهێليت، خودآ دێ شريناهيا باوه‌ريێ ئێخيته د دلێ ويدا)). حاكمى يا ڤه‌گێراى و دبێژيت يا دورسته دويف مه‌رجێت بوخارى و موسليمى به‌لێ وان نه‌ڤه‌گێرايه، هه‌ر د بنيرا نابيت مرۆڤ ب مه‌خسه‌دا خه‌له‌ت برێنيته ژنه‌كا بيانى، و ئه‌گه‌ر يێ ب رۆژى نه‌زه‌ر كر وى وه‌ختى وى دوو خه‌له‌تى كرن، ئێك: گونه‌هه‌ك كر چونكى يا حه‌رامه. دوو: كێماسى ئێخسته د رۆژيا خۆدا و خێرا وێ كێم كر، و دبيت ئه‌گه‌ر ڤى ره‌نگێ گونه‌هان نه‌هێليت چو خێر د رۆژيا ويدا نه‌مينيت، هه‌روه‌كى پێغه‌مبه‌رى (سلاڤێت خودێ لێ بن) گۆتى: (( رُبَّ صَائِمٍ ليس له من صِێامِهِ إلا الْجُوعُ ))، ئانكو: رۆژيگره‌كێ هه‌ى ژ برسێ و تێهنێ پێڤه‌تر ب سه‌ر رۆژيا وى ناكه‌ڤيت.
به‌لێ به‌رێخۆدانا رۆژيگرى بۆ ژنا وى نه‌يا حه‌رامه، به‌لێ پێدڤيه مرۆڤ بزانيت و ژبير نه‌كه‌ت مرۆڤ يێ ب رۆژيه، و پێدڤيه بزانيت كا دێ چاوا رۆژيا خۆ پارێزيت، و ئه‌گه‌ر يێ ب رۆژى ما ب ڤێ به‌رێخۆدانێڤه دبيت پيچ پيچه وى به‌ر ب هندێڤه ببه‌ت رۆژيا خۆ بخۆت و خودێ چێتر دزانيت.
