ب/ ئه‌و ب خۆ رۆژيا وان يا دورسته، به‌لێ وان خۆ ژ خێره‌كا مه‌زن بێ باركر، خێرا سونه‌تا پاشيڤێ، پاشيڤ ب خۆ سونه‌ته و په‌رستنه، ڤێجا يێ نه‌رابيته پاشيڤێ خۆ ژ ڤێ خێرێ و ڤێ په‌رستنێ بێ باركر، د ئه‌نجامدا خۆ ژ وان خێران ژى بێ باركر ئه‌وێت خودێ ئێخستينه د پاشيڤێدا و پێڤه گرێداين، و هه‌ر ژبه‌ر هندێ ژى پێغه‌مبه‌ر (سلاڤێت خودێ لێ بن) دبێژيت: ((رابنه پاشيڤێ، به‌ره‌كه‌تا تێدا))، ژ حه‌ديسێ ديار دبيت يا باشتر ئه‌وه ئه‌م رابينه پاشيڤێ و ڤێ سونه‌تێ دگه‌ل رۆژيێ ب جه بينين و ڤێ سونه‌تێ گه‌له‌ك خێرێت دى يێت تێدا:
ئێك: سه‌رپێچيه به‌رامبه‌ر جوهى و فه‌لان، و ئه‌ڤه ب خۆ يا پێدڤيه.. پێغه‌مبه‌ر (سلاڤێت خودێ لێ بن) دبێژيت: ((ئه‌و نارابنه پاشيڤان هوين رابنه پاشيڤان)).
دوو: پاشيڤ بۆ رۆژيگرى پشته‌ڤانيه و ب هێز دئێخيت كو بێ منه‌ت رۆژيا خۆ بگريت، و ئه‌و گازندا نه ژ برسێ بكه‌ت و نه ژ تێنێ، و خۆشيێ ب رۆژيا خۆ ببه‌ت، و رۆژيا هۆسا، پتر خێرا تێدا.
سێ: د وه‌ختێ پاشيڤێدا خودايێ مه‌زن دئێته عه‌سمانێ دنيايێ ـ هاتنه‌كا هێژايى وى و يا بێ چاوايى ـ و دبێژيت: ((كى هه‌يه داخوازه‌كێ ژ من بكه‌ت دا بۆ ب جه بينم؟ كى هه‌يه دوعايه‌كێ بۆ خۆ بكه‌ت دا بۆ قه‌بويل بكه‌م))، هه‌روه‌كى د فه‌رمووده‌يا پێغه‌مبه‌ريدا (سلاڤێت خودێ لێ بن) هاتى، ڤێجا يێ نه‌رابيت ئه‌ڤ وه‌خته ژێ چۆ كو ئه‌و بۆ خۆ دوعايه‌كێ تێدا بكه‌ت ئه‌و وه‌ختێ دوعا تێدا قه‌بويلكرى.
چار: يێ رابوو پاشيڤێ ئه‌ڤه وى نڤێژا سپێدێ ژى د وه‌ختێ وێدا كر و گيرۆنه‌كر، و يێ نه‌رابيته پاشيڤێ ژ ڤان خێران هه‌ميان بێ باره و خودێ چێتر دزانيت.
