ب / ب راستى پێدڤيه ئه‌م بزانين كا چاوا رۆژيێت ره‌مه‌زانێ ب قه‌درن و دڤێت بپارێزين، وه‌سا دڤێت ئه‌م بزانين شه‌ڤێت ره‌مه‌زانێ ژى ب قه‌درن و دڤێت بپارێزين، له‌وا پێغه‌مبه‌رێ خۆشتڤى (سلاڤێت خودێ لێ بن) د راستا شه‌ڤێت ره‌مه‌زانێدا دبێژيت: ((منْ قام رَمَضانَ إِيماناً واحْتِساباً غُفِرَ لَهُ مَا تَقَدَّمَ مِنْ ذنْبِهِ))، ئانكو: هه‌ركه‌سێ ژ باوه‌رى و ب هيڤيا خێرێ، ره‌مه‌زانێ رابيت (ئانكو شه‌ڤێت ره‌مه‌زانێ ته‌راويحان بكه‌ت) گونه‌هێت وى يێت بۆرين هاتنه ژێبرن. و به‌رامبه‌ر وان شه‌ڤان پێغه‌مبه‌رێ خۆشتڤى (سلاڤێت خودێ لێ بن) دبێژيت: ((مَنْ صَامَ رَمَضانَ إِيمَاناً واحْتِساباً، غُفِرَ لَهُ ما تَقَدَّمَ مِنْ ذنْبِهِ))، ئانكو: هه‌ركه‌سێ ژ باوه‌رى و ب هيڤيا خێرێ ره‌مه‌زانێ بگريت.. گونه‌هێت وى يێت بۆرين هاتنه ژێبرن. ڤێجا به‌رێ خۆ بدێ كا چاوا پێغه‌مبه‌رێ خۆشتڤى (سلاڤێت خودێ لێ بن) شه‌ڤ و رۆژيێت ره‌مه‌زانێ ئيناينه به‌رئێك، له‌وا ئه‌وێ شه‌ڤا خۆ يا ره‌مه‌زانێ ب تشتێت بێ مفاڤه ببه‌ت ـ خۆ يێت حه‌رام ژى نه‌بن ـ ئه‌و يێ خوسارت و به‌رزيانه، پا تو چ دبێژى بۆ وى يێ شه‌ڤێت خۆ ب به‌رێخۆدانا تشتێ حه‌رامڤه ببۆرينيت، و ب به‌رێخۆدانا هنده فلم و زنجيرێت بێ سه‌روبه‌ر و هه‌مى گونه‌ه بكه‌ت، بێ گۆمان ئه‌ڤ به‌رێخۆدانه كارتێكرنه‌كا خراب و نه‌باش ل رۆژيێ دكه‌ت، دڤێت بزانين هه‌كه شه‌ڤا مه ب خێرێڤه چۆ.. ئه‌ڤه نيشانه ئانه‌هيا خودێ رۆژيا مه ژى دێ ب خێرێڤه چيت، به‌لێ هه‌كه شه‌ڤ ب خرابيێڤه چۆ.. ئه‌ڤه دێ بيته هاريكار رۆژى ژى سه‌ر نه‌گريت و كێم و كاسى بكه‌ڤنه تێدا.
ڤێجا ئه‌و كه‌سێ بڤێت خودێ رۆژيێت وى قه‌بويلكه‌ت و ئه‌و رۆژى بن ئه‌وێت دبنه ئه‌گه‌رێ ژێبرنا گونه‌هێت وى يێت بۆرين، بلا ل شه‌ڤێت ره‌مه‌زانێ يێ هشيار بيت و نه‌هێليت ب تشتێ خراب و بێ مفاڤه بچيت، و شه‌ڤ و رۆژێت ره‌مه‌زانێ گرێدانه‌كا موكما موكم د گه‌لێك يا هه‌ي، له‌وا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((رب قائم ليس له من قيامه إلا السهر))، ئانكو: دبيـت ژ شه‌ڤگره‌كێ شه‌ڤگێرى زێده‌تر نه‌گه‌هيتێ، و يێ بێبار بيت ژ خێرێ، چونكى به‌س خه‌و يا ل خۆ حه‌رامكرى و هه‌ر هند.
دوعا ژ خودێ دكه‌ين هاريكاريا مه بكه‌ت ئه‌م شه‌ڤ و رۆژێت ره‌مه‌زانا پيرۆز، وه‌كى پێغه‌مبه‌رێ خۆشتڤى (سلاڤێت خودێ لێ بن) گۆتى بپارێزين دا بگه‌هينه وى خه‌لاتێ مه‌زن يێ پێغه‌مبه‌رێ خۆشتڤى (سلاڤێت خودێ لێ بن) ژێ گۆتى كو گونه‌ه ژێبرنا گونه‌هێت بۆرينه و خودێ چێتر دزانيت.
