ب / ده‌ستپێكێ ده‌مێ نڤێژان د بنياتدا ب رۆژێڤه د گرێداينه، و سيبه‌ر و هه‌لاتن و ئاڤابوونا وێڤه و ب ده‌ركه‌فتنا سپێدێڤه د گرێداينه، و ژ ئه‌نجامێ سه‌ربۆر و ته‌جروبه و كارزانيێ مه يێت ب سه‌عه‌تانڤه گرێداين، و ئه‌م دبێژين سه‌عه‌ت هنده نڤێژا سپێدێيه، و يا نيڤرۆ هنده‌يه و هۆسا.. و مه چاوا زانيه ئه‌ڤ سه‌عه‌ته يا ڤێ نڤێژێيه، يا دى يا نڤێژا ديه! ژ وان نيشانێت بۆ مه ژ پێغه‌مبه‌رى (سلاڤێت خودێ لێ بن) هاتينه ڤه‌گوهاستن، و خودايێ مه‌زن د راستا ڤێ چه‌ندێدا دبێژيت:((إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَّوْقُوتًا )) ئانكو: ب راستى نڤێژ ل سه‌ر باوه‌ريداران ب وه‌ختێت ئاشكه‌را هاتيه نڤێسين. و ئه‌و وه‌خت هۆسا ژ پێغه‌مبه‌رى (سلاڤێت خودێ لێ بن) هاتينه زانين:
نڤێژا سپێدێ: وه‌ختێ وێ ژ ده‌ركه‌فتنا سپێده‌يا دورسته (الفجر الصادق) ده‌مێ سپياتيا رۆژێ ل په‌رێ عه‌سمانى دهه‌لێت و تاريا شه‌ڤێ هه‌لدچنيت هه‌تا رۆژ ده‌ردكه‌ڤيت. هه‌چيێ گه‌هشت ركاعه‌ته‌كێ به‌رى رۆژ بهه‌لێت، بكه‌ت.. ئه‌و گه‌هشته نڤێژێ.
نڤێژا نيڤرۆ: ده‌مێ رۆژ ل نيڤا عه‌سمانى به‌ر ب ره‌خێ ئاڤابوونێڤه خوار دبيت، ده‌ست پێ دكه‌ت، و ئه‌گه‌ر سيبه‌را تشتى هندى خۆ لێ هات ژبلى سيبه‌را خواركه‌فتنێ د نيڤا عه‌سمانيدا ب دويماهيك دئێت. و هه‌ركه‌سێ گه‌هشت ركاعه‌ته‌كێ د ڤى وه‌ختيدا بكه‌ت ئه‌و گه‌هشته نڤێژێ.
نڤێژا ئێڤارى: هنگى ده‌ست پێ دكه‌ت ده‌مێ سيبه‌ر هندى خۆ لێ دئێت ـ ژبلى سيبه‌را خواركه‌فتنێ د نيڤا عه‌سمانيدا ـ و دمينيت هه‌تا رۆژ ئاڤا دبيت، به‌لێ يا ب خێرتر ئه‌وه گيرۆ نه‌كه‌ت هه‌تا رۆژ نێزيكى ئاڤابوونێ دبيت، و هه‌ركه‌سێ گه‌هشت ركاعه‌ته‌كێ به‌رى رۆژ ئاڤا ببيت بكه‌ت، ئه‌و گه‌هشته نڤێژێ، و ئه‌ڤه‌يه ئه‌و نڤێژا ـ ل دويف گۆتنا پتريا زانايان ـ دبێژنێ نڤێژا ناڤنجى (الصلاه الوسطى).
نڤێژا مه‌غره‌ب: وه‌ختێ وێ ب ئاڤابوونا رۆژێ ده‌ست پێ دكه‌ت، و هندى سۆراتى ل ملێ رۆژئاڤايێ بمينيت نڤێژ دئێته‌كرن.
نڤێژا عه‌يشا: وه‌ختێ وێ ب دويماهيك هاتنا نڤێژا مه‌غره‌ب ده‌ست پێ دكه‌ت ـ ده‌مێ سۆراتى به‌رزه دبيت ـ و هه‌تا سپێده ده‌ردكه‌ڤيت دمينيت، هۆسا دياره چو گرفت نينه بۆ دياركرنا ده‌مێ پێنج نڤێژان.
و هنديكه رۆژيه ديسا ب هه‌لاتنا سپێدێ و ب ئاڤابوونا رۆژێڤه گرێدايه، خودايێ مه‌زن دبێژيت:((وَكُلُوا وَاشْرَبُوا حَتَّىٰ يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْرِ ثُمَّ أَتِمُّوا الصِّيَامَ إِلَى اللَّيْلِ)) ئانكو: و ب شه‌ڤ بخۆن و ڤه‌خۆن هه‌تا سپياتيا رۆژێ بۆ هه‌وه ژ تارياتيا شه‌ڤێ جودا دبيت، ديار دبيت. و رۆژيێ ژى هه‌تا شه‌ڤێ كو پشتى رۆژئاڤابوونێيه ته‌مام بكه‌ن، ب ڤى ره‌نگى مه گرفت نينه ئه‌م بزانين كا دێ چاوا رۆژى و نڤێژێت خۆ ل وان جها كه‌ين يێت شه‌ڤ و رۆژێت وان زێده نه‌هندى ئێك، و ئێك گه‌له‌كا كێم و كورت و يا دى گه‌له‌كا درێژ چ شه‌ڤ چ رۆژ و خودێ چێتر دزانيت.
