ب / ب راستى ده‌مێ مرۆڤ دئێته حه‌جێ و وێ هه‌ژمارا زۆر يا موسلمانان دبينيت گه‌له‌ك و گه‌له‌ك كه‌يفا مرۆڤى دئێت، به‌لێ دگه‌ل ڤێ ژى هه‌كه تو به‌رێ خۆ بده‌يه ره‌فتار و سه‌ره‌ده‌ريا باراپتر ژ وان؛ دێ ب خه‌م كه‌ڤى، و دێ بۆ ته ديار بيت كا موسلمان چه‌ند دويرى تێگه‌هشتنا دينێ خۆنه.
و هه‌كه تو به‌رێ خۆ بده‌يه چاوانيا كرنا وان يا حه‌جێ، پتر دێ ب خه‌م كه‌ڤى، و دێ زانى يێت هاتينه حه‌جێ و چو ژ حه‌جێ نوزانن، و ب دورستى ب واجب و كريارێت حه‌جێ نارابن، و نوزانن كا دڤێت هه‌ر واجبه‌ك چ ل ده‌ف وان په‌يداكه‌ت، و چ حيكمه‌ت و نهێنى تێدا هه‌نه، هه‌ر ژبه‌ر هندێ ژى ده‌مێ دزڤرنه‌ڤه مالێت خۆ و زوى كارلێكرنا حه‌جێ ل سه‌ر وان نامينيت، و زوى بۆياغ و شوين ده‌ستێ حه‌جێ ژ سه‌ر وان دچن، و زوى ئه‌و هه‌ستێ نازك يێ حه‌جێ بۆ وان چێبووى دچيت. و ژ ئه‌زموون بۆ من ديار بوو ئه‌وێ د حه‌جێ دگه‌هيت و رامان و حيكمه‌تا هه‌ر كاره‌كێ حه‌جێ بزانيت؛ كارلێكرنه‌كا باش و يا به‌رده‌وام لێ دئێته‌كرن، و هه‌ستێ وى هه‌ر دمينيت نازك، و دلێ وى هه‌ر دمينته‌ڤه گرێداى ب حه‌جێڤه. و ئارمانجێت حه‌جێ ل ده‌ف وى په‌يدا دبن، و دبيته مرۆڤه‌كێ خودايى. و دا حه‌ج يا ب به‌رهه‌مداربيت و كارلێكرن و شوين ده‌ستێت خۆ ل سه‌ر حه‌جى بهێليت فه‌ره ل سه‌ر هه‌ركه‌سێ بڤێت بچيته حه‌جێ ئه‌و دوو تشتان باش و باش بزانيت:
ئێك: رامان و حيكمه‌تێت حه‌جێ؛ دا حه‌جى ده‌مێ قه‌ستا حه‌جێ دكه‌ن بزانن حه‌ج چيه، و چ رامان و حيكمه‌ت و نهێنى د حه‌جێدا هه‌نه، و بۆچى عه‌مرى هه‌ميێ جاره‌كێ ب تنێ هاتيه فه‌رزكرن، و دا بزانيت كا پێدڤيه حه‌ج چ ل ده‌ف په‌يداكه‌ت، و چ گوهۆرين بێخيته وى، و دا ده‌نگێ ((لَبَّيْكَ اللهم لَبَّيْكَ)) هه‌ر د گوهێ ويدا ڤه‌ده‌ت، و دا وێنه و ديمه‌نێت حه‌جێ هه‌ر ل به‌ر چاڤێت وى بن.
دوو: رامان و حيكمه‌تێت ژ هه‌ر واجبه‌كى ژ واجبێت حه‌جێ؛ دا حه‌جى ساده نه‌چيته د وان واجباندا، و بزانيت د هه‌ر واجبه‌كيدا دڤێت يێ چه‌وا بيت، و دڤێت ئه‌و واجب چ ل ده‌ف وى په‌يداكه‌ت، و چ بۆياغ بێخيته سه‌ر. هه‌كه حه‌جيان هه‌ميان ئه‌ڤ هه‌ردوو تێبينيه به‌رچاڤ وه‌رگرتن دێ مه كه‌يف دوو جاركى هێت ب هژمارا وان و ب سه‌روبه‌رێ وان ژى و خودێ چێتر دزانيت.
