ب / پێدڤيه حه‌جي بزانيت سێ ره‌نگێت حه‌جێ يێت هه‌ين؛ دا بزانيت كا دێ بۆ خۆ كيژ ره‌نگى هه‌لبژێريت و ده‌مێ قه‌ستا حه‌جێ دكه‌ت، كا دآ ئنيه‌تا كيژ ره‌نگێ حه‌جێ ئينيت؟
يا ئێكێ دبێژنێ حه‌جا ئيفراد، ئه‌و ژى ئه‌ڤه‌يه: مرۆڤ ئنيه‌تا حه‌جێ ب تنێ بينيت و عومرێ نه‌ده‌ته دگه‌ل حه‌جێ، ڤێجا ژبه‌ر هه‌ر ئه‌گه‌ره‌كا هه‌بيت چ ژبه‌ر هندێ بيت مرۆڤ دره‌نگ يێ گه‌هشتيه وێرێ، و مرۆڤ ناگه‌هيت عومرێ بكه‌ت، پاشى ده‌ست ب حه‌جێ بكه‌ت، يان هه‌ما مرۆڤى ئيفراد دڤێت.
به‌لێ هه‌ر وه‌ختێ مرۆڤى ئنيه‌تا حه‌جا ئيفراد ئينا، دڤێت مرۆڤ ژ ئيحرامان نه‌ده‌ركه‌ڤيت هه‌تا حه‌جێ ب دويماهى دئينيت، و دگه‌هيته ره‌ميێ رۆژا ئێكێ ژ عه‌يدێ.
و ئنيه‌تا حه‌جا ئيفراد ژى ب ڤى ره‌نگيه: (يا ره‌بى من ئنيه‌تا حه‌جێ ب تنێيه، يا خودێ ژ من قه‌بويل بكه و بۆ من ب ساناهى بێخه).
يا دووێ حه‌جا پێكڤه گرێدايه و قيرانه، و ئه‌و ژى ئه‌ڤه‌يه: تو حه‌جێ و عومرێ هه‌ردووكان پێكڤه بكه‌ى، تو بچيه وێرێ ده‌ست باڤێژيه عومرێ، عومرێ بكه‌ى. ده‌ستپێكێ ته‌وافێ بكه‌ى، پاشى بچى سه‌عيێ بكه‌ى و ئيحرامان بهێليه به‌ر خۆ و ژ ئيحرامان نه‌ده‌ركه‌ڤى، و سه‌رێ خۆ نه تراشى نه كورت بكه‌ى هه‌تا دبيته رۆژا هه‌شتێ ژ ده‌هكان، و وێ رۆژێ هه‌ر ب وان جلكانڤه قه‌ستا مينايێ بكه‌ى، و هۆسا هه‌تا حه‌جا خۆ دبه‌يه سه‌رى، و دبێژنه ڤێ حه‌جێ حه‌جا قيران، چونكى حه‌ج و عومره ب ئێك جلك دئێنه‌كرن، و پێكڤه دئێنه گرێدان.
ره‌نگێ سيێ: حه‌جا ته‌مه‌توعه، ئه‌و ژى ئه‌ڤه‌يه: به‌روه‌خت بچيه مه‌كه‌هێ به‌رى رۆژا هه‌شتێ ژ ده‌هكان ب چار پێنج رۆژه‌كان، يان سه‌رێ ده‌هكان يان رۆژا دووێ يان رۆژا سيێ، و ده‌ست ب عومرێ بكه‌ى و ب دويماهى بينى، ده‌ست ب ته‌وافێ بكه‌ى حه‌فت جاران ل دۆر كه‌عبێ بزڤرى، پاشى قه‌ستا سه‌فا و مه‌روايێ بكه‌ى، حه‌فت جاران د ناڤبه‌را واندا بێى و بچى، ده‌ست ب سه‌فايێ بكه‌ى و مه‌روايێ ب دويماهى بينى، پاشى سه‌رێ خۆ كورت بكه‌ى يان بتراشى، و ژ ئيحرامان ده‌ركه‌ڤى و بێهنا خۆ بده‌ى هه‌تا دبيته رۆژا هه‌شتێ ژ ده‌هكان، كو دبێژنێ رۆژا ته‌روييێ، دێ ئيحرامێت خۆ ل جهێ تو لێ، كه‌يه به‌ر خۆ و قه‌ستا مينايێ كه‌ى، و هۆسا دێ حه‌جا خۆ به‌يه سه‌رى.
جودايى د ناڤبه‌را ڤان هه‌رسێ ره‌نگاندا:
ئێك: ئنيه‌تا هه‌ر ئێكێ ب ره‌نگه‌كيه.
ـ د حه‌جا ئيفراددا دێ هۆسا ئنيه‌تا خۆ ئينى: (اللهم اني اريد الحج فيسره لي وتقبله مني، فان حبسني حابس فمحلي حيپ حبستني)، ئانكو: يا خودێ من ئنيه‌تا حه‌جێيه، بۆ من ساناهى بكه، و ژ من قه‌بويل بكه، و هه‌كه ئاسته‌نگه‌ك بۆ من چێ بوو، جهێ من يآ ئه‌ز ژ ئيحرامان ده‌ردكه‌ڤم ئه‌و جهه يێ ته ئه‌ز لێ ئاسێ كريم يان ژى (لبيك اللهم حجا).
ـ و ئنيه‌تا حه‌جا قيران ب ڤى ره‌نگيه: (اللهم اني اريد العمره والحج فيسرهما لي وتقبلهما مني فان حبسني حابس فمحلي حيث حبستني)، يا خودێ من ئنيه‌تا عومرێ و حه‌جێ پێكڤه‌يه، هه‌ردووكان بۆ من ساناهى بكه و هه‌ردووكان ژ من قه‌بويل بكه، و هه‌كه ئاسته‌نگه‌ك بۆ من چێبوو، جهێ من يآ ئه‌ز ژ ئيحرامان ده‌ردكه‌ڤم ئه‌و جهه يێ ته ئه‌ز لێ ئاسێ كريم يان ژى (لبيك اللهم عمره وحجا).
ـ و ئنيه‌تا حه‌جا ته‌مه‌توعێ ب ڤى ره‌نگيه: (اللهم اني اريد العمره متمتعاً بها إلى الحج فيسرها لي وتقبلها مني فان حبسني حابس فمحلي حيپ حبستني)، يا ره‌بى من دڤێت عومرێ بكه‌م و ژ ئيحرامان ده‌ركه‌ڤم هه‌تا حه‌جێ، بۆ من ساناهى بكه و ژ من قه‌بويل بكه، و هه‌كه ئاسته‌نگه‌ك بۆ من چێبوو جهێ من يآ ئه‌ز ژ ئيحرامان ده‌ردكه‌ڤم ئه‌و جهه يێ ته ئه‌ز لێ ئاسێ كريم يان ژى (لبيك اللهم عمره).
و ئێكسه‌ر دويف ڤان هه‌رسێ ئنيه‌تانرا دێ بێژى: (لَبَّيْكَ اللهم لَبَّيْكَ لَبَّيْكَ لا شَريكَ لك لَبَّيْكَ إِنَّ الْحَمْدَ وَالنِّعْمَه لك وَالْمُلْكَ لا شَريكَ لك).
دوو: حه‌جا ئيفراد تو چو قوربانان ناده‌ى، به‌لێ بۆ قيرانێ و ته‌مه‌توعێ هه‌ردووكان، دڤێت تو قوربانى بده‌ى.
سێ: بۆ حه‌جا ئيفراد و يا قيران نابيت ژ ئيحرامان ده‌ركه‌ڤى، هه‌ر ژ رۆژا تو ئيحرامان گرێدده‌ى و ئنيه‌تا حه‌جێ دئينى هه‌تا تو حه‌جا خۆ دبه‌يه سه‌رى، به‌لێ بۆ حه‌جا ته‌مه‌توعێ دێ قوربانه‌كى ده‌ى، و هه‌كه ته پێ چێ نه‌بوو يان ب ده‌ست ته نه‌كه‌فت دێ ده‌ه رۆژان يێ ب رۆژى بى، سێيان هێژ تو ل حه‌جێ و حه‌فتێت دى پشتى تو دزڤريه مال، به‌رانبه‌ر هندێ پشتى تو عومرا خۆ ب دويماهى دئينى دێ ژ ئيحرامان ده‌ركه‌ڤى و دێ خۆشيێ به‌ى، هه‌تا دبيته رۆژا هه‌شتێ ژ زيلحيجه، رۆژا ته‌روييێ، سپێده‌يا وێ رۆژێ دێ ل جهێ تو لێ، ئيحرامێت خۆ كه‌يه به‌ر خۆ و دێ قه‌ستا مينايێ كه‌ى.
و كا كيژ ره‌نگ ب خێرتره:
هه‌لبه‌ت يا ژ هه‌ميان ب خێرتر ئه‌ڤه‌يه تو حه‌جا ته‌مه‌توع بكه‌ى، هه‌روه‌كى ئه‌ڤه ژ ڤان سه‌حابان: ئبن عومه‌ر و ئبن عه‌باس و ئبن زوبێر و عائيشايێ هاتيه زانين خودێ ژ وان هه‌ميان رازى بيت، و ژ حه‌سه‌ن و عه‌تاْ و تاووس و موجاهد و سالم و عيكريمه ژ تابعيان خودآ ژ وان رازى بيت و خودێ چێتر دزانيت.
