ب / ميقاتێت زه‌ماني ئه‌و ده‌مه يێ هاتيه ده‌ستنيشانكرن دڤێت د وى ده‌ميدا ئيحرام بۆ حه‌جێ بێنه به‌ستن و كار بۆ حه‌جێ بێته‌كرن. و دويف بۆچۆنا جمهورێ زانايان هه‌رگاڤا ئيحرام ده‌رڤه‌ي ڤى ده‌مي هاتنه به‌ستن دێ بۆ عومرێ هێنه هه‌ژمارتن و بۆ حه‌جێ ناهێنه حسێبكرن و ئه‌و ده‌م ژى ئه‌ڤه‌يه: هه‌يڤێت (شه‌وال و زيلقيعده و ده‌ه رۆژ ژ زيلحيجه)، هه‌رگاڤا ده‌رڤه‌ى ڤي ده‌مى ئيحرام هاتن به‌ستن ئه‌و بۆ عومرێ دكه‌ڤن نه بۆ حه‌جێ، چونكى خودايێ مه‌زن دبێژيت:((الْحَجُّ أَشْهُرٌ مَّعْلُومَاتٌ فَمَن فَرَضَ فِيهِنَّ الْحَجَّ فَلَا رَفَثَ وَلَا فُسُوقَ وَلَا جِدَالَ فِي الْحَجِّ وَمَا تَفْعَلُوا مِنْ خَيْرٍ يَعْلَمْهُ اللَّهُ وَتَزَوَّدُوا فَإِنَّ خَيْرَ الزَّادِ التَّقْوَىٰ وَاتَّقُونِ يَا أُولِي الْأَلْبَابِ)) ئانكو: هندى حه‌جه هه‌يڤێت خۆ يێت ديار و ئاشكه‌را هه‌نه، و هه‌ر كه‌سێ (ئيحرام گرێدان) حه‌ج ل سه‌ر خۆ ئێخست، (دڤێت بزانيت د حه‌جێدا) چۆنه نڤينا ژنێ و ئاخفتنێت كه‌شه‌فرێت و جره‌بر و مه‌ده‌ركى د حه‌جێدا نينه، و نه‌دورسته. هه‌ر خێر و قه‌نجيه‌كا هوين بكه‌ن خودێ پێ ئاگه‌هه. و كارێ خۆ بكه‌ن (بۆ وه‌غه‌را دنيايێ) و ب راستى چێترين خۆكاركرن (بۆ وه‌غه‌را قيامه‌تێ) پارێزكاريه، و گه‌لى ئاقلداران پارێزكاريا من بكه‌ن.
و ميقاتێت مه‌كاني ئه‌و جهن يێت ژ لايێ پێغه‌مبه‌ريڤه (سلاڤێت خودێ لێ بن) هاتينه دياره‌كرن، و دڤێت حه‌جي بێ ئيحرام به‌ستن لێ نه‌بۆرن هه‌كه حه‌ج يان عومره بڤێن، دبێژنێ ئيحرام به‌ستنگه‌ه، ئه‌و ژى ئه‌ڤه‌نه: زولحه‌ليفه، كو ڤێگاڤێ دبێژنێ ئه‌بيار عه‌لى، ئه‌ڤ جهه ئيحرام به‌ستنگه‌هه بۆ وان كه‌سێت دڤێن د رێكا مه‌دينێرا بهێنه حه‌جێ يان عومرێ، و جوحفه، ئه‌ڤه جهێ ئيحرام به‌ستنايه، بۆ وان ئه‌وێت ژ شامێ دهێن د رێكا ته‌بوكێرا، و يێت مسرێ و مه‌غربێ دهێن، و هه‌ركه‌سێ د رێكا وانرا دهێت، و قه‌رنولمه‌نازل و قه‌رنولسه‌عالب، و ئه‌ڤه ميقاته بۆ ئه‌وێت ژ نه‌جدا حيجازێ و يه‌مه‌نێ دهێن و هه‌ركه‌سێ د رێكا وانرا دهێن، و يه‌له‌مله‌م و ئه‌ڤه ميقات و جهێ ئيحرام به‌ستنايه بۆ وان ئه‌وێت ژ توهامه دهێن و هه‌ركه‌سێ د رێكا وانرا دهێن، و يا پێنجێ زاتوعيرقه و ئه‌ڤه ميقات و جهێ ئيحرام به‌ستنايه بۆ وان ئه‌وێت د رۆژهه‌لاتێرا دهێن وه‌كى: ئيران و عيراقێ و هه‌ركه‌سێ د رێكا وانرا دهێن و خودێ چێتر دزانيت.
