ب / هه‌كه حه‌ج ل سه‌ر ژنێ فه‌رز بيت، و ڤيا بچيته حه‌جێ، و ژ زه‌لامێ خۆ يان مه‌حره‌مێ خۆ خواست دگه‌ل بچيته حه‌جێ كا واجبه دگه‌ل بچيت يان نه؛ زانا د ڤێ پرسێدا دوو بۆچۆنن: ل ده‌ف زاهريان واجبه ئه‌و زه‌لام و مه‌حره‌م دگه‌ل وێ ژنێ بچن، و هه‌كه نه‌چۆن د گونه‌هكارن، نه‌خاسمه هه‌كه شيان هه‌بن، و نابيت ئه‌و خۆ ڤه‌گرن و قه‌بويل نه‌كه‌ن، چونكى زه‌لامه‌ك هاته ده‌ف پێغه‌مبه‌رێ خودێ (سلاڤێت خودێ لێ بن) گۆتێ: يا پێغه‌مبه‌رێ خودێ.. من دڤێت دگه‌ل ڤى له‌شكه‌رى هۆسا و هۆسا ده‌ركه‌ڤم ـ ئانكو بچمه جيهادێ و ژنا من دڤێت بچيته حه‌جێ، پێغه‌مبه‌رى (سلاڤێت خودێ لێ بن) گۆتێ: ((دگه‌ل وێ هه‌ره))، و حه‌نه‌في و حه‌نبه‌لى و شافعى دبێژن: ل سه‌ر زه‌لامى و مه‌حره‌مى واجب نينه، دگه‌ل ژنێ ده‌ركه‌ڤن، به‌لێ ئه‌ز بۆچۆنا ئێكێ باشتر دبينم، نه‌خاسمه هه‌كه وى شيان هه‌بن، يان ژنێ مه‌سره‌فێ وى ب ستۆيێ خۆڤه گرت، به‌لێ هه‌كه شيان نه‌بن و پێ چێنه‌بيت ل سه‌ر وى واجب نينه دگه‌ل ده‌ركه‌ڤيت و خودێ چێتر دزانيت.
