ب / ل ده‌ف حه‌نه‌فيان و بۆچۆنا دورستتر ژ مه‌زهه‌بێ مالكيان و شافعيان دگۆتنه‌كێدا: وى واجبه‌ك هێلا، و دانا قوربانه‌كى جهێ وێ كێماسيێ دگريت، و حه‌جا وى يا دورسته، و ده‌ف شافعيان و حه‌نبه‌ليان و زاهريان و مالكيان د گۆتنه‌كێدا دوو ركعه‌تێت پشتى ته‌وافێ سونه‌تن و نه‌واجبن هه‌كه نه‌هاته‌كرن ژى چو نينه و چو كێماسى ناكه‌ڤيته ته‌وافا مرۆڤى، و ئه‌ڤ بۆچۆنه ب هێزتره چونكى هه‌روه‌كى ته‌لحێ كورێ عوبه‌يدوللاى (خودێ ژێ رازي بيت)دبێژيت: زه‌لامه‌ك هاته ده‌ف پێغه‌مبه‌رێ خودێ (سلاڤێت خودێ لێ بن) ژ خه‌لكێ نه‌جدێ و يێ سه‌ر قژ بوو، مه گول ده‌نگێ وى هه‌بوو، به‌لێ ئه‌م تێ نه‌دگه‌هشتين كا چ دگۆت، حه‌تا نێزيكى پێغه‌مبه‌رێ خودێ بووى (سلاڤێت خودێ لێ بن) مه زانى يێ پسيارا ئيسلامێ دكه‌ت، پێغه‌مبه‌رێ خودێ (سلاڤێت خودێ لێ بن) گۆت: ((شه‌ڤ و رۆژان پێنج نڤێژن)). گۆت: ژبلى ڤان هه‌نه؟ گۆت: ((نه، ژبلى تو سونه‌تان بكه‌ى)). پشتى چۆى، وى زه‌لامى گۆت: ئه‌ز ب خودێ كه‌مه نه ئه‌ز ڤان ژێ كێم دكه‌م و نه ل سه‌ر زێده دكه‌م. پێغه‌مبه‌رێ خودێ (سلاڤێت خودێ لێ بن) گۆت: ((ب راستى سه‌رفه‌راز بوو هه‌كه راست بێژيت)). ئه‌ڤه نيشانه هه‌رددو ركعه‌تێت ته‌وافێ سونه‌تن نه‌واجبن، و هه‌كه واجب بانه دا پێغه‌مبه‌ر (سلاڤێت خودێ لێ بن) بێژيتێ ـ نه‌خاسمه پشتى سويند خوارى نه ژ پێنجا كێم دكه‌ت و نه زێده دكه‌ت و خودێ چێتر دزانيت.
