ب / يان دێ ب رێكا ئاڤێ يان ب ته‌يارێ يان ب رێكا سه‌يارێ چى، هه‌لبه‌ت هه‌كه تو ب رێكا سه‌يارێ چۆى، وه‌كى يا ئاشكه‌را، به‌رى تو بچيه حيجازێ دێ ل جهه‌كي راوه‌ستى دبێژنێ (ذات عرق)، و ئه‌و.. ئه‌و جهه يێ كو دڤێت تو ژێ نه‌بۆرى، هه‌تا ئنيه‌تا خۆ نه‌ئينى، و ل وێرێ دڤێت ئيحرامان گرێده‌ى.
ـ و هه‌كه تو ب ته‌يارێ چۆى، پێدڤيه ده‌مێ تو دگه‌هيه هنداڤى جهه‌كي ژ جهێت ئيحرام به‌ستنێ، ـ دڤێت عومره‌چى ژێ نه‌بۆرن هه‌تا ئنيه‌تا عومرێ دئينن و ئيحرامان گرێده‌ن ـ و هه‌كه تو بێژى ئه‌ز نوزانم كا كه‌نگى و چ سه‌عه‌ت دێ گه‌همه هنداڤى وى جهى، وى ده‌مى ئه‌ز ته شيره‌ت دكه‌م هه‌ر ل مه‌تارخانه‌يێ تو ئيحرامان گرێده‌ى و ئنيه‌تا خۆ بينى.
ـ و هه‌كه تو ب رێكا ئاڤێ بچى پێدڤيه بزانى كا كه‌نگى دێ گه‌هيه راستا وى جهى، دڤێت ل وێرێ ئيحرامان گرێده‌ى و ئنيه‌تا خۆ بينى.
و هه‌لبه‌ت عومره‌چى به‌رى جلكێت ئيحرامان بكه‌ته به‌ر خۆ سونه‌ته:
* سه‌رێ خۆ بشۆت پاشى ئيحرامان بكه‌ته به‌ر خۆ، و ژن هه‌ر جلكێت خۆ يێت به‌رێ دێ كه‌ته به‌ر خۆ، به‌لێ جلكێ ئيحرامێ يێ زه‌لامى دڤێت دوو پارچه بن، و سپى بن، ئێكي دێ د ناڤته‌نگا خۆ وه‌ركه‌ت و قايشه‌كێ ل سه‌ر گرێده‌ت، يا دووێ دێ دانيته سه‌ر ملێت خۆ.
* دوو ركعه‌تێت سونه‌ت بكه‌ت پاشى ئنيه‌تا خۆ بينيت.
* پشتى ئنيه‌تا خۆ دئينيت و دبێژيت: (لبيك اللهم عمره) يان بێژي ياره‌بى من ئنيه‌تا عومرێيه، ئێكسه‌ر دڤێت بێژى: (لَبَّيْكَ اللهم لَبَّيْكَ لَبَّيْكَ لا شَريكَ لك لَبَّيْكَ إِنَّ الْحَمْدَ وَالنِّعْمَه لك وَالْمُلْكَ لا شَريكَ لك) و به‌رده‌وام دێ ڤێ ته‌لبيێ بێژى، و به‌س ناكه‌ى هه‌تا كه‌عبێ.
* و يافه‌ره تو ئنيه‌تا خۆ ب مه‌رجيڤه گرێده‌ى و بێژى: (فان حبسني حابس فمحلي حيپ حبستني) چونكى هه‌كه عومره‌چى ڤێ بێژيت و ئاسته‌نگه‌ك كه‌فته د رێكا ويدا و ژ وێرێ زڤرى خودێ لێ ناگريت.
هه‌لبه‌ت هه‌رگاڤا زه‌لامى ئه‌ڤ جلكه كرنه به‌ر خۆ و چۆ د ئيحراماندا، پێدڤيه چو جلكێت دى نه‌هێليته به‌ر خۆ، نه فانێله، نه ته‌بانه، به‌لێ ژنێ جلكێت وێ يێت ئاسايى و عادى دێ د به‌ر بن، هه‌رجلكێ هه‌بيت، يێ سپى بيت، يێ ره‌ش بيت، يێ زه‌ر بيت، و هه‌ر جلكێ هه‌بيت، به‌لێ پا فه‌ره يێت شه‌رعى بن و له‌شێ وێ هه‌ميێ بگرن، و هه‌كه يێت سپى بن باشتره.
* هه‌لبه‌ت گه‌ل مرۆڤى جلكێت ئيحرامێ كرنه به‌ر خۆ و ئنيه‌تا عومرێ ئينا پێدڤيه بزانيت ئه‌ڤ تشتێت خوارێ ل سه‌ر د حه‌رامن و نه‌دورستن:
1ـ هه‌كه ژن و مێر دگه‌ل ئێك بن، نابيت بچنه نڤينا ئێك، و نڤين د ناڤبه‌را واندا يا حه‌رامه هه‌تا ژ ئيحرامان ده‌ردكه‌ڤن.
2ـ گه‌نگه‌شه و جيدال و قايشكێشان و قه‌رقه‌شه و مده‌ركى يا حه‌رامه.
3ـ جلكێ دورى نابيت زه‌لام بكه‌ته به‌ر خۆ، و مه‌خسه‌دا مه ژ دورينێ ئه‌ڤه‌يه وه‌كى قه‌ميسى يان وه‌كى بلۆزى، به‌لێ هه‌كه ئيحراما ئێكێ پێنج پارچه‌بيت و هه‌ر پێنج پێكڤه بربنه سه‌رێك دا ببنه ئێك پارچه ئه‌ڤه نه‌دورياره و چو نينه، يان هه‌ر پارچه‌كێ چه‌ند جاران دوريار سه‌ررا هاتبيت و چۆبيت، ديسا ئه‌ڤه چو نينه.
4ـ بێهنخۆشى و گولاڤ نابيت بێته ب كارئينان، هه‌روه‌سا نابيت ئه‌و بێهنا خۆش بهه‌لكێشيت.
5ـ نابيت موى، چ يێت سه‌رى بن چ يێت بن كه‌ڤشا يان هه‌ر جهه‌كێ دى هه‌بيت حه‌جى بينيته ده‌رێ يان كورتكه‌ت، به‌لێ هه‌كه ئه‌و ب خۆ وه‌ريان دگه‌ل سه‌رشويشتنێ يان دگه‌ل سه‌رشه‌كرنێ يان دگه‌ل سه‌رخوريانێ ئه‌ڤه چو نينه.
6ـ ناچێبيت نينۆكێت ده‌ستى يان پيان بێنه ژێڤه‌كرن هه‌تا رۆژا عه‌يدێ.
7ـ ديسا ناچێبيت زه‌لام چو تشتى بكه‌ته سه‌رێ خۆ، دڤێت زه‌لام يێ سه‌ركۆل بيت، به‌لێ ژن ئاسايى دێ ده‌رسۆكا وێ ل سه‌رێ وێ بيت، و ژبه‌ر گه‌رمێ دورسته شه‌مسى بێته ب كارئينان، به‌لێ ژبه‌ر هه‌تاڤێ يان هه‌ر تشته‌كێ دى ناچێبيت زه‌لام كولاڤى يان پاته‌كى بكه‌ته سه‌رێ خۆ.
8ـ ژن سه‌روچاڤێت وێ دێ د به‌رداى بن، نابيت پێچێ دانيت و نابيت ده‌ستگۆركا ژى بكه‌ته ده‌ستێت خۆ.
9ـ نێچير، خۆ هه‌كه ل به‌ر وان يا ب ساناهى ژى بيت ناچێبيت، و نابيت هاريكاريێ ژى بكه‌ن.
10ـ هشيار بن دار و گياى ل حه‌جێ نه‌هلقينن، ئه‌وێ ئه‌و ب خۆ شين بووى نه‌شكێنن ژى.
* گاڤا تو نێزيكى مه‌كه‌هێ بووى، هه‌كه ده‌ست بده‌ت، جهه‌كى راوه‌ستى و سه‌رێ خۆ بشۆى به‌رى بچيه ناف مه‌كه‌هێ ئه‌ڤه سونه‌ته، و هه‌كه ده‌ست نه‌دا چو نينه. و هه‌كه ته مه‌كه‌ه ديت دێ ڤێ دوعايێ بێژى: (اللهم البلد بلدك والبيت بيتك، جئت اطلب رحمتك، وائم طاعتك، متبعا لامرك، راضيا بقدرك، مبلغا لامرك، اسالك مساله المضطر ان تتقبلني وتتجاوز عني برحمتك، وان تدخلني جنتك). ئه‌ى خودێ ئه‌ڤ باژێره باژێرێ ته‌يه، و ئه‌ڤ ماله مالا ته‌يه، ئه‌ز يێ هاتيم داخوازا دلۆڤانيا ته بكه‌م، و قه‌ستا گوهداريا ته بكه‌م، و دويف ئه‌مرێ ته ئه‌ز يێ هاتيم، و ئه‌ز ب قه‌ده‌را ته يێ رازيمه، ئه‌ز يێ هاتيم دا ئه‌مرێ ته ب جه بينم، ئه‌ز داخوازێ ژ ته دكه‌م داخوازا مرۆڤه‌كێ زێده هه‌وجه، تو ژ من قه‌بويل بكه‌ى و ب دلۆڤانيا خۆ ل من ببۆرى و گونه‌هێت من ژێ ببه‌ى، و تو من ببه‌يه به‌حه‌شتا خۆ.
ئه‌ڤه دوعايا ديتنا مه‌كه‌هێيه، و وه‌ختێ هوين چۆنه مه‌كه‌هێ، دێ هه‌وه به‌نه شوقه‌يان، دێ تشتێت خۆ دانن و دێ ژ نوى قه‌ستا كه‌عبێ كه‌ن، و عادى هندى هوين ب رێكێڤه به‌رده‌وام دێ ڤى زكرى كه‌ن (لَبَّيْكَ اللهم لَبَّيْكَ لَبَّيْكَ لا شَريكَ لك لَبَّيْكَ إِنَّ الْحَمْدَ وَالنِّعْمَه لك وَالْمُلْكَ لا شَريكَ لك). هه‌ر دێ ڤى زكرى بێژن هه‌تا هوين نێزيكى مزكه‌فتا كه‌عبێ دبن.
* و هه‌كه تو نێزيكى مزگه‌فتێ بووى و ته كه‌عبه ديت دێ بێژى: (اللَّهُمَّ زِدْ هذا البيت تشريفاً وتعظيماً وتكريماً ومهابه وزِدْ مَنْ شَرَّفَه وكَرَّمه وعَظمه ممن حجَّه أو اعتَمَرَه تشريفاً وتكريماً وتعظيماً وبَراً ، اللهم انت السلام ومنك السلام، فحينا بالسلام).
و هه‌ر دوعايه‌كا دى هه‌بيت دێ دويفدا بۆ خۆ كه‌ى. هه‌لبه‌ت ئه‌ڤ دوعايه نه‌واجبه هه‌كه ژ بيرا ئێكى چۆ يان ژبه‌ر نه‌بيت چو نينه، و هه‌ر گاڤا ته كه‌عبه ديت بۆ خۆ ده‌ست باڤێژه دوعايان و بێژه: ئه‌ى خودا ئه‌ڤێ مالێ زێده‌تر ب قه‌در و قيمه‌ت بێخه و زێده‌تر ب رێز و ئحتيرام بێخه و قه‌درێ وى مرۆڤى ژى زێده‌كه يێ قه‌ستا ڤێ مالێ دكه‌ت بۆ حه‌جێ يان بۆ عومرێ.
* ژ بير نه‌كه پێ راستێ باڤێژه د مزگه‌فتێڤه و بێژه:
1ـ (بسم الله والصلاه والسلام على رسول الله، اللهم اغفر لي ذنوبي، وافتح لي ابواب رحمتك).
2ـ يان ژى بێژه: (اعوذ بالله العظيم وبوجهه الكريم وسلطانه القديم من الشيطان الرجيم).
* پشتى تو دچيه د ژۆرڤه ئێكسه‌ر قه‌ستا كه‌عبێ بكه، و تو ته‌حييه‌ت مه‌سجد ناكه‌ى، دا ده‌ست ب ته‌وافێ بكه‌ى، و ژبير نه‌كه ئنيه‌تا خۆ بينه، ئه‌ڤه ته‌وافا قدوومێيه، و بۆ ته‌وافكرنێ به‌رێ خۆ بدێ كه‌عبه يا چارگۆشه‌يه و كراسه‌كێ ره‌ش يێ ل به‌ر و يا ل نيڤا مزگه‌فتێ، قه‌ستا كه‌عبێ بكه، و به‌رێ خۆ بدێ كا به‌رێ ره‌ش ل كيرێيه، و راستا به‌رێ ره‌ش، راوه‌سته و مزگه‌فتێ بێخه ره‌خێ خۆ يێ راستێ و كه‌عبێ بێخه ره‌خێ خۆ يێ چه‌پێ، و هۆسا مزگه‌فت دێ ل لايێ ته يێ راستێ بيت و كه‌عبه و به‌رێ ره‌ش دێ ل لايێ ته يێ چه‌پێ بن.
* هه‌لبه‌ت پێنگاڤا ئێكێ ل ته‌وافێ دێ ل راستا سه‌متا به‌رى راوه‌ستى و دێ ده‌ست ب ته‌وافێ كه‌ى، و سونه‌تێت ته‌وافێ ژى ئه‌ڤه‌نه:
1ـ سونه‌ته ده‌ستێ خۆ بكه‌يه به‌رێ ره‌ش يان تشته‌ك ف ته بيت بگه‌هينيێ، ئه‌ڤه هه‌كه ئزديحام نه‌بيت و ده‌رفه‌ت هه‌بيت و ئه‌زيه‌تا كه‌سێ نه‌كه‌ى.
2ـ و هه‌كه نه‌شياى دوير و ل سه‌ر خيچێ به‌رێ خۆ بده به‌رێ ره‌ش و بێژه: (بسم الله، الله اكبر، اللهم ايمانا بك وتصديقا بكتابك، ووفاء بعهدك، واتباعا لسنه نبيك محمد ـ صَلى الله عليه وسلم ـ) و هه‌كه ته نه‌زانى ڤێ بێژى، فه‌ره تو ڤێ بێژى: (بسم الله، الله اكبر) و ئه‌ڤه به‌سه.
3ـ ب ده‌ستێ خۆ يێ راستێ ئيشاره‌تێ بده به‌رێ ره‌ش و ده‌ست ب ته‌وافێ بكه، به‌س هشيار بى ده‌ستێ خۆ ماچى نه‌كه.
4ـ سونه‌ته زه‌لام ملێ خۆ يێ راستێ ده‌ربێخيت و ئيحراما خۆ بێخيته بن كه‌فشێ خۆ يێ راستێ، و ئه‌ڤه نه‌واجبه، و هه‌ر ته‌وافه‌كا سه‌عى دويڤدا سونه‌ته ملێ راستێ بێته ده‌رێخستن و رويسكرن.
5ـ هه‌رسێ جارێت ئێكێ هه‌كه ده‌رفه‌ت هه‌بيت و ده‌ست بده‌ت سونه‌ته تو خۆش و ب هه‌روه‌له بچى، و هه‌كه ئزديحام بيت دێ ئاسايى چى.
6ـ سونه‌ته هه‌كه ئزديحام نه‌بيت ده‌ستێ خۆ بكه‌يه كوژيێ به‌ري به‌رێ ره‌ش كو دبێژنێ: كوژيێ يه‌مانى، چونكى پێغه‌مبه‌ر (سلاڤێت خودێ لێ بن) دبێژيت: ((هه‌كه ده‌ستێ مرۆڤى ب روكنێ يه‌مانى كه‌فت گونه‌هێت مرۆڤى دوه‌ريێن))، به‌لێ ئه‌ڤه سونه‌ته هه‌كه ده‌ست بده‌ت و يا ب ساناهى بيت، و هه‌كه يا ب زه‌حمه‌ت بيت نه‌پێدڤيه.
7ـ كوژيێ به‌رى به‌رێ ره‌ش كو دبێژنێ روكنێ يه‌مانى هه‌تا كوژيێ به‌رێ ره‌ش سونه‌ته تو ڤێ دوعايێ بكه‌ى: (رَبَّنَا آتِنَا فِي الدُّنْێا حَسَنَه وَفِي الاخِرَه حَسَنَه وَقِنَا عَذابَ النَّار) و هه‌ر دوعايه‌كا ته دڤێت بۆ خۆ بكه.
8ـ سونه‌ته د ته‌وافێدا به‌رده‌وام بۆ خۆ دوعايان بكه‌ى.
مه‌رجێت پێدڤى بۆ ته‌وافێ:
هه‌تا ته‌وافا ته يا دورست بيت دڤێت ئه‌ڤ مه‌رجه ب جه بێن و به‌رچاڤ بێنه وه‌رگرتن:
1ـ پێدڤيه، يێ هشيار بى ل ئنيه‌تا ته‌وافێ، ته‌وافا ته يا عومرێيه يان قدومێيه.
2ـ پێدڤيه يێ پاقژ بى و ب ده‌ستنڤێژ بى و ناچێبيت تو بێ ده‌ستنڤێژ ته‌وافێ بكه‌ى هه‌رچه‌نده ئبن ته‌يميه دبێژيت: ده‌ستنڤێژ نه‌مه‌رجه هه‌بيت بۆ ته‌وافێ و بێ ده‌ستنڤێژ ژى دورسته هه‌كه يێ پاقژبيت ژ حه‌ده‌سا ئه‌كبه‌ر به‌لێ باشتره يێ ب ده‌ستنڤێژ بيت هه‌كه نه؛ ته‌وافا دورسته. ـ ل ڤێرێ من پێ خۆشه ئه‌ز شيره‌ته‌كێ ل وان ژنان بكه‌م ئه‌وێت دكه‌ڤنه د عادێدا به‌رى بێنه حه‌جێ، وان ده‌رمانان ب كاربينن ئه‌وێت عادێ پاش دئێخن دا ئاسايى حه‌جا خۆ بكه‌ن و نه‌كه‌ڤنه د كراسێ بێ نڤێژيێدا ـ.
3ـ ئه‌و ئيحرامێت ل به‌ر حه‌جيان دڤێت د پاقژ بن و بێ نڤێژ نه‌بن، ديسا ئه‌و جلكێت به‌ر ژنان ژى.
4ـ دڤێت حه‌فت جاران ل دۆر كه‌عبێ بزڤرى، و هه‌ر زڤرينه‌ك ژ راستا به‌رآ ره‌ش ده‌سپێدكه‌ت، و دڤێت جاره‌كا دى بگه‌هيه هه‌ر وێ راستێ، ئه‌ڤه ژ نوى بوو ئێك جار، هه‌تا هۆسا حه‌فت جاران ل دۆر كه‌عبێ دزڤرى، و هه‌كه ئێك د هه‌ژمارا واندا ب شك كه‌فت، و نه‌زانى كانێ سێ كرن يان چار يان ژى پێنج كرن يان شه‌ش، هنگى دێ هه‌ژمارا كێمتر گريت و يێت مايين دێ ل سه‌ر تمام كه‌ت.
5ـ سونه‌ته تو نێزيكى كه‌عبێ بچى هه‌كه ده‌رفه‌ت هه‌بيت.
6ـ سونه‌ته هه‌كه ئه‌زيه‌ت نه‌چێبيت بچى به‌رێ ره‌ش ماچى بكه‌ى يان ده‌ستێ خۆ بكه‌يه تێدا و ده‌ستێ خۆ ماچى بكه‌ى، به‌لێ ئه‌ڤه هه‌كه ئه‌زيه‌تا خه‌لكى تێدا نه‌بيت، هه‌كه دێ ئه‌زيه‌ت تێدا هه‌بيت، دڤێت ئه‌م بزانين ماچيكرنا به‌رى سونه‌ته، نه‌واجبه و سونه‌ته هه‌كه ئه‌زيه‌ت بۆ خه‌لكى چێنه‌بيت، و هه‌كه ئه‌زيه‌ت چێبوو هنگى گونه‌هه، نه‌سونه‌ته.
7ـ ديسا سونه‌ته د ڤان هه‌مى گه‌راندا دوعا گه‌له‌ك بێنه‌كرن، و يێ نه‌زانيت دوعا بكه‌ت بلا قورئانێ بخوينيت، و يێ دوعا نه‌زانيت، بلا زكرى بكه‌ت ب كوردى ب عه‌ره‌بى ب هه‌ر ئه‌زمانه‌كێ هه‌بيت، بۆ خۆ گه‌له‌ك ڤێ دوعايێ بكه: (اللهم اجعله عمره مبروره وسعيا مشكوره وذنبا مغفورا، ربنا آتنا في الدنيا حسنه وفي الآخره حسنه وقنا عذاب النار).
د ته‌وافێدا ل ڤان خالان هشياربه:
1ـ ناڤبه‌ينا جارێ و جارێ د ته‌وافێدا گه‌له‌ك بێهنا خۆ نه‌ڤه‌ده، و كار بكه هه‌رحه‌فت جار دويف ئێكرا بن.
2ـ قه‌وسه‌ك يا ل پشت كه‌عبێ هه‌ى، يا سپيه دبێژنێ (حجر اسماعيل) هشيار به ده‌مێ تو ته‌وافێ دكه‌ى د وێرێرا نه‌چه، چونكى ئه‌و پارچه‌يه‌كه ژ كه‌عبێ، و هنگى ته‌وافا ته نه‌يا دورسته و تو دۆر كه‌عبێ هه‌ميێ نه‌زڤريه.
و هه‌كه تو شياى پشتى ته‌وافێ ب دويماهى دئينى يان هه‌ر وه‌خته‌كێ هه‌بيت سونه‌ته‌كێ د ناف وێ قه‌وسێدا بكه‌ى، ئه‌ڤه هه‌روه‌كى ته د كه‌عبێڤه كرى، چونكى ئه‌و قه‌وس وه‌كى مه گۆتى ژ كه‌عبێيه.
3ـ تو يێ عيباده‌تى دكه‌ى پێدڤيه تو ب سوحبه‌تێڤه مژويل نه‌بى، ئه‌و سوحبه‌ت نه‌بيت يا ئه‌و ب خۆ گوهدارى و وه‌عز و شيره‌ت، و ژ ديارده‌يێت خه‌له‌ت گه‌له‌ك جاران حه‌جى د ته‌وافێدا ب سوحبه‌تێڤه مژويل دبن و گه‌ل ئێك و دوو دئاخڤن هه‌تا ته‌وافا وان ب دويماهيك دئێت.
4ـ ده‌ستێ خۆ نه‌دانه سه‌ر ده‌ڤێ خۆ د ته‌وافێدا.
5ـ قرچه قرچێ ژ ده‌ستێت خۆ نه‌ئينن و هوين د ته‌وافێدا.
6ـ يێ ده‌ستنڤێژا وى نه‌خۆشبوو دشێت بچيت ده‌ستنڤێژا خۆ خۆشكه‌ت و ده‌ستنڤێژا خۆ بشۆته‌ڤه و بێت گه‌رێت خۆ تمامكه‌ت.
7ـ و هه‌كه هه‌ر حه‌فت گه‌ر تمام بوون زه‌لام بلا جاره‌كا دى ملێ خۆ يێ راستێ ڤه‌شێرن و هه‌ر ملێت خۆ نه‌هێلن رويس.
* پێنگاڤا پشتى ته‌وافێ:
پشتى ته ته‌واف خلاسكر ل هه‌ر جهه‌كێ مزگه‌فتێ بيت به‌رێ خۆ بده كه‌عبێ و دوو ركعه‌تان سونه‌ت بكه، د ركعه‌تا ئێكێدا ((قُلْ يَا أَيُّهَا الْكَافِرُونَ)) پشتى فاتيحێ بخوينه، و د ركعه‌تا دووێدا ((قُلْ هُوَ اللَّهُ أَحَدٌ)) پشتى فاتيحێ بخوينه. و دبێژنه ڤێ نڤێژێ نڤێژا ته‌وافێ، و هه‌كه ده‌ست بده‌ت ئه‌ڤ نڤێژه ل جهێ (مقام ابراهيم) بێته‌كرن ئه‌ڤه سونه‌ته، و هه‌كه تو گه‌هشتيه جهێ (مقام ابراهيم) دێ ڤێ ئايه‌تێ خوينى ((وَاتَّخِذُوا مِن مَّقَامِ إِبْرَاهِيمَ مُصَلًّى )) به‌لێ هه‌كه ژبه‌ر ئزديحامێ ده‌ست نه‌دا مه‌رج نينه نڤێژ ل وێرێ بێته‌كرن، به‌لكى هه‌ر جهه‌كێ بێته‌كرن دورسته.
* پێنگاڤا پشتى دوو ركعه‌تێت ته‌وافێ:
پشتى تو ڤان دوو ركعه‌تان دكه‌ى، سونه‌ته قه‌ستا ئاڤا زمزم بكه‌ى و تێر ئاڤێ ڤه‌خۆى، يا باشه به‌رى ئاڤا زمزم ڤه‌خۆى، ئنيه‌تا خۆ بينى، كا دێ بۆ چ هيڤى و ئومێد ئاڤێ ڤه‌خۆى، چونكى پێغه‌مبه‌ر (سلاڤێت خودێ لێ بن) دبێژيت: ((ئاڤا زمزم بۆ وى تشتيه يێ بۆ دئێته ڤه‌خوارن)).
پشتى ته تێر ئاڤ ڤه‌خوار، دورسته تو ل سه‌رێ خۆ ژى بكه‌ى و باش بێهنا خۆ بده‌ى.
* پاشى ـ هه‌كه ده‌رفه‌ت هه‌بيت ـ بێيه به‌رێ ره‌ش، ئه‌ڤه يا باشه، و هه‌كه يا ب زه‌حمه‌ت بيت، ژ دويرڤه به‌رێ خۆ بده به‌رێ ره‌ش و راستا ده‌رگه‌هێ كه‌عبێ راوه‌سته و ده‌ستێت خۆ بلندكه و وان دوعايان بكه ئه‌وێت ته دڤێن.
* پێنگاڤێت پشتى ڤه‌خوارنا ئاڤا زمزم:
پاشى قه‌ستا سه‌فا و مه‌روايێ بكه، و به‌رێ خۆ بدێ ل سه‌ر قه‌وسه‌كێ يا نڤێسيه (باب الصفا) د وێرێرا هه‌ره دێ چيه سه‌فايێ، و سه‌فا ب خۆ: گركه‌كه و به‌رێت وێ د زه‌رن، و به‌سه ده‌ستێ ته يان پێت ته بگه‌هنه وان به‌ران.
ـ ڤێجا وه‌ختێ تو نێزيكى سه‌فايێ بووى و گه‌هشتيێ، ڤێ ئايه‌تێ بخوينه: ((إِنَّ الصَّفَا وَالْمَرْوَةَ مِن شَعَائِرِ اللَّهِ)) * و ژبير نه‌كه سه‌عيا د ناڤبه‌را سه‌فا و مه‌روايێدا، پشتى ته‌وافێ و دوو ركعه‌تان و ڤه‌خوارنا ئاڤا زمزم دئێت.
ـ پاشى دێ سه‌ركه‌ڤيه سه‌فايێ و به‌رێ خۆ ده‌يه كه‌عبێ و بێژه: (الله اكبر، الله اكبر، الله اكبر) پاشى ڤێ دوعايێ بكه: (لا إِلَهَ إلا الله وَحْدَهُ لا شَريكَ له له الْمُلْكُ وَلَهُ الْحَمْدُ وهو على كل شَيْءٍ قَدِيرٌ لا إِلَهَ إلا الله وَحْدَهُ أَنْجَزَ وَعْدَهُ وَنَصَرَ عَبْدَهُ وَهَزَمَ الأَحْزَابَ وَحْدَهُ) سێ جاران دێ ڤێ دوعايێ كه‌ى.
ـ پشتى ڤێ دێ ده‌يه رێ، و دێ قه‌ستا مه‌روايێ كه‌ى، و وه‌ختێ تو قه‌ستا مه‌روايێ دكه‌ى، دێ ره‌حه‌ت و ئاسايى چى، هه‌تا دگه‌هيه جهه‌كي، دێ نيۆنه‌كا كه‌سك بينى ل به‌ر ره‌خێ خۆ يێ راستێ، ڤێجا وه‌ختێ تو گه‌هشتيه وێ نيۆنا كه‌سك ده‌ست ب هه‌روێلێ بكه، و ب هه‌روه‌له هه‌ره هه‌تا تو دگه‌هيه نيۆنه‌كا دى يا كه‌سك وه‌كى يا ئێكێ. پاشى وه‌كى به‌رێ ئاسايى هه‌ره هه‌تا دگه‌هيه مه‌روايێ. هه‌لبه‌ت ئه‌ڤ هه‌روێله بۆ زه‌لامى ب تنێيه نه‌بۆ ژنێ. ژن هه‌ر دێ ئاسايى چيت.
ـ ڤێجا وه‌ختێ تو بۆ مه‌روايێ دچى نه‌راوه‌سته هه‌تا تو پشت دنگان دكه‌ڤى و ل وێرێ به‌رێ خۆ بده كه‌عبێ و ڤێ بێژه: (الله اكبر، الله اكبر، الله اكبر)، پاشى ڤێ دوعايێ سێ جاران بێژه: (لا إِلَهَ إلا الله وَحْدَهُ لا شَريكَ له له الْمُلْكُ وَلَهُ الْحَمْدُ وهو على كل شَيْءٍ قَدِيرٌ لا إِلَهَ إلا الله وَحْدَهُ أَنْجَزَ وَعْدَهُ وَنَصَرَ عَبْدَهُ وَهَزَمَ الأَحْزَابَ وَحْدَهُ)، ئه‌ڤه بوو جاره‌ك.
ـ پاشى جاره‌كا دى بزڤره و قه‌ستا سه‌فايێ بكه، و وه‌ختێ تو بۆ سه‌فايێ دچى ئاسايى دێ چى هه‌تا ديسا دگه‌هيه نيۆنه‌كا كه‌سك هه‌ر ل ره‌خێ ته يێ راستێ، و هه‌رگاڤا تو گه‌هشتيه وێ نيۆنێ ب هه‌روه‌له هه‌ره هه‌تا دگه‌هيه نيۆنه‌كا دى پاشى دێ ئاسايى چى هه‌تا دگه‌هيه سه‌فايێ، و هۆسا هه‌تا حه‌فت جاران دهێى و دچى، هه‌لبه‌ت چۆن جاره‌كه و هاتن جاره‌كا ديه، هاتن جاره‌كه و چۆن جاره‌كه هه‌تا هۆسا دبنه حه‌فت جار.
ـ كار بكه هه‌ر حه‌فت جار ل سه‌ر ئێك بن، و بێهنا خۆ د ناڤبه‌را جارێ و جارێدا گه‌له‌ك نه‌ڤه‌ده، و هه‌كه پيچه‌ك بيت چو نينه.
ـ د هاتن و چۆنێدا گه‌له‌ك دوعايان بۆ خۆ بكه، و چو زكرێ ده‌ستنيشانكرى بۆ نينه، و هه‌ر زكره‌كێ هه‌بيت دورسته، و هه‌ر دوعايه‌كا هه‌بيت دورسته، و قورئانێ ژى بخوينى دورسته.
* پێنگاڤا پشتى سه‌فا و مه‌روايێ:
پشتى جارا حه‌فتێ ب دويماهى دئێت، هه‌لبه‌ت دڤێت يا ئاشكرا بيت دێ ژ سه‌فايێ ده‌سپێكه‌ى و ل مه‌روايێ ب دويماهى ئينى. ڤێجا پشتى جارا حه‌فتێ تو دگه‌هيه مه‌روايێ، دێ ل ده‌رگه‌هێ راستا مه‌روايێ ژ مزگه‌فتێ ده‌ركه‌ڤى، و دێ هنده به‌رميل و عنباران بينى، هنداڤى وان عنباران مويێ سه‌رێ خۆ كورتكه يان بتراشه، ژن ژى دڤێت وه‌كى زه‌لامى پشتى جارا حه‌فتێ پرچێ خۆ ته‌مه‌ت تبله‌كێ كورت بكه‌ت، و عومره‌چى دشێت سه‌ر كورتكرنێ گيرۆكه‌ت بێته جهێ خۆ يێ نڤستنێ چێكه‌ت يان بچيته سه‌رتراشخانه‌كێ، و هۆسا ئه‌ڤه عومرا وان تمام بوو، و پاشى دێ ژ ئيحرامان ده‌ركه‌ڤن و جلكێت ئاسايى كه‌نه به‌ر خۆ و دێ خۆ گرى هه‌تا رۆژا دزڤرى يان دچيه مه‌دينێ، ڤێجا د ڤى وه‌ختيدا دڤێت تو يێ هشيار بى ل سه‌ر نڤێژێت ب جه‌ماعه‌ت و ل كه‌عبێ، چونكى هه‌ر نڤێژه‌كا ل كه‌عبێ ب سه‌د هزار نڤێژانه، و د ڤى وه‌ختيدا و هندى تو ل مه‌كه‌هێ بى، يێ هشيار و رژدبه ل سه‌ر نڤێژێت سونه‌ت و ل كه‌عبێ نه‌خاسمه ته‌هه‌جود و شه‌ڤنڤێژان، چونكى هه‌ر نڤێژه‌كا هه‌بيت چ يا فه‌رز بيت چ يا سونه‌ت هه‌كه ل مزگه‌فتا كه‌عبێ بێنه‌كرن ب سه‌د هزار نڤێژانه.
