ب / زانا ل سه‌ر حوكمێ عومرێ د ژێكجودانه ل سه‌ر دوو گۆتنان:
گۆتنا ئێكێ: عومره واجبه دڤێت جاره‌كێ د عومريدا بێته‌كرن وه‌كى حه‌جێ ب مه‌رجه‌كى شيان هه‌بن ـ هه‌كه شيان نه‌بن كا چاوا حه‌ج ل سه‌ر واجب نينه هۆسا عومره ژى ل سه‌ر واجب نينه، به‌لگه ل سه‌ر واجبيا عومرێ حه‌ديسا د سونه‌ناندا هاتى ژ ئه‌بى ره‌زينێ عه‌قيلى: هاته ده‌ف پێغه‌مبه‌رێ خودێ (سلاڤێت خودێ لێ بن) گۆتێ: يا پێغه‌مبه‌رێ خودێ بابێ من پيره‌مێره‌كێ مه‌زنه نه‌دشێت حه‌جێ بكه‌ت نه عومرێ و نه‌دشێت ب رێڤه بچيت؟ ئينا گۆتێ: ((پێش بابێ خۆڤه حه‌جێ و عومرێ بكه))، و جهێ به‌لگه‌بوونێ گۆتنا پێغه‌مبه‌رى (سلاڤێت خودێ لێ بن) گۆتيێ: پێش بابێ خۆڤه حه‌جێ و عومرێ بكه، و هه‌كه واجب نه‌با دابێژيتێ حه‌جێ ب تنێ پێش بابێ خۆڤه بكه، و ئه‌ڤه مه‌زهه‌بێ حه‌نبه‌ليان و زاهريان و شافعيانه د گۆتنه‌كا واندا، و گۆتنا دووێ: عومره سونه‌ته‌كا موئه‌ككه‌ده و نه‌واجبه، و ئه‌ڤه مه‌زهه‌بێ حه‌نه‌فيان و مالكيان وزاهريانه، و گۆتنا شافعيا كه‌ڤنه، و ده‌ليلێ وان يێ ژ هه‌ميان ب هێزتر حه‌ديسا ته‌لحێ كورێ عوبه‌يدوللايه (خودێ ژێ رازي بيت)ئه‌وا د سه‌حيحه‌ينێدا هاتى، گۆت: زه‌لامه‌ك هاته ده‌ف پێغه‌مبه‌رێ خودێ (سلاڤێت خودێ لێ بن) ژ خه‌لكێ نه‌جدێ بوو و يێ سه‌ر قژ بوو، مه گول ده‌نگێ وى هه‌بوو، به‌لێ ئه‌م تێ نه‌دگه‌هشتين كا چ دگۆت، حه‌تا نێزيكى پێغه‌مبه‌رێ خودێ بووى (سلاڤێت خودێ لێ بن) مه زانى يێ پسيارا ئيسلامێ دكه‌ت، پێغه‌مبه‌رێ خودێ (سلاڤێت خودێ لێ بن) گۆت: ((شه‌ڤ و رۆژان پێنج نڤێژن)). گۆت: ژبلى ڤان هه‌نه؟ گۆت: ((نه، ژبلى تو سونه‌تان بكه‌ى)). پێغه‌مبه‌رێ خودێ (سلاڤێت خودێ لێ بن) گۆت: ((و رۆژيگرتنا هه‌يڤا ره‌مزانێيه)). گۆت: ژبلى ڤێ هه‌يه؟ گۆت: ((نه، ژبلى تو رۆژيێت سونه‌ت بگرى)). گۆت: و پێغه‌مبه‌رێ خودێ (سلاڤێت خودێ لێ بن) بۆ به‌حسێ زه‌كاتێ كر. گۆت: ژبلى ڤێ هه‌يه؟ گۆت: ((نه، ژبلى تو سه‌ده‌قه‌يان بده‌ى. زه‌لام چۆ دگۆت: ئه‌ز ب خودێ كه‌مه نه ئه‌ز ڤان ژێ كێم دكه‌م و نه ل سه‌ر زێده دكه‌م. پێغه‌مبه‌رێ خودێ (سلاڤێت خودێ لێ بن) گۆت: ((ب راستى سه‌رفه‌راز بوو هه‌كه راست بێژيت)). و جهێ به‌لگه‌بوونێ ئه‌ڤه‌يه.. پێغه‌مبه‌رى (سلاڤێت خودێ لێ بن) به‌حسێ عومرێ نه‌كر، و نه گۆتێ عومره ژى واجبه. و ئيمام ئبن ته‌يميه (خودێ ژێ رازي بيت)ڤێ بۆچۆنێ دورستتر ددانيت، و ئه‌ژى خودانێ خۆ و ڤێ بۆچۆنێمه، به‌لێ دگه‌ل هندێ ژى دڤێت خه‌م ژ عومرێ بێته خوارن و يێ بۆ ده‌ست نه‌دا بچيته حه‌جێ چونكى چۆنا حه‌جێ ته‌رتيبێت تايبه‌ت يێت هه‌ين و دبيت يا ب زه‌حمه‌ت بيت، چونكى هه‌رسال رێژه‌كا تايبه‌ت و سنوردار دچنه حه‌جێ، و يا ب پشكێڤه گرێدايه ئه‌ز دبينم عومره هه‌كه واجب نه‌بيت گه‌له‌ك نێزيكى واجبيه و خودێ چێتر دزانيت.
