ب / چو گۆمان تێدا نينه ئه‌وێ خودێ كه‌ره‌مێ دگه‌ل دكه‌ت، چۆنا مه‌كه‌هێ ب رزقێ وى دكه‌ت، ئه‌ڤه كه‌ره‌مه‌ك و نيعمه‌ته‌كا مه‌زن دگه‌ل كر، چونكى چو جه ژ وى جهى پيرۆزتر نينن، دڤێت بۆ خۆ ب ده‌رفه‌ت بزانيت وان چه‌ند رۆژه‌كێت تێدا باش پركه‌ت ژ كارێت خێرێ، و ستێركا خۆ ل هه‌مى خێرێت وێرێ بگريت، چونكى هه‌ر خێره‌كا ل وێرێ دهێته‌كرن ب سه‌د هزارانه، ژبه‌ر هندێ ئه‌ز حه‌جى و عومره‌چيان شيره‌ت دكه‌م وه‌ختێ خۆ ب سويكێ و بازارانڤه نه‌بن، يان بلا زكرى بكه‌ن يان قورئانێ بخوينن يان نڤێژان بكه‌ن يان د توافاندا بن، چونكى دبيت ئه‌و ده‌رفه‌تا ده‌ستكه‌فتى دوباره نه‌بيته‌ڤه، ڤێجا يێ ب عاقل ئه‌وه، يێ ڤێ باش بزانيت كارى بۆ ڤێ بكه‌ت، پشتى ڤێ.. زانا د ژێك جودانه كا كيژ ل كه‌عبێ ب خێرتره نڤێژ يان ته‌واف، هنده زانا دبێژن: مرۆڤ ژ مرۆڤى فه‌رقه، بۆ خه‌لكێ مه‌كه‌هێ نڤێژ ب خێرترن، چونكى ئه‌و هه‌ر يێ ل مه‌كه‌هێ، هه‌رده‌مێ ڤيا دشێت ته‌وافان بكه‌ت و دا ئزديحامێ بۆ خه‌لكێ ده‌رڤه‌ى مه‌كه‌هێ چێنه‌كه‌ت، به‌لێ يێ خه‌لكێ ده‌رڤه‌ى مه‌كه‌هێ بيت ته‌واف د حه‌قێ ويدا ب خێرترن؛ چونكى هه‌ر جهێ لى َ بيت دشێت نڤێژان بكه‌ت، به‌لێ جهێ لێ بيت نه‌شێت ته‌وافان لێ بكه‌ت و دبيت بۆ ده‌ست نه‌ده‌ت جاره‌كا دى بێته‌ڤه كه‌عبێ، ژبه‌ر هندێ د ده‌رحه‌قێ ويدا ته‌واف ب خێرترن، به‌لێ چو گۆمان نينه هه‌ردوو ب خێرن، يێ ب عاقل ئه‌وه چو ره‌نگێت خێران ژ خۆ نه‌به‌ت، پێغه‌مبه‌ر (سلاڤێت خودێ لێ بن) د راستا نڤێژا كه‌عبێدا دبێژيت: ((چ فه‌رز بيت يان سونه‌ت: نڤێژه‌ك ل مزگه‌فتا كه‌عبێ ب خێرتره ژ سه‌د هزار نڤێژان د غه‌يرى وێدا))، و ل دۆر ته‌وافا كه‌عبێ دبێژيت: ((هه‌ركه‌سێ حه‌فت گه‌ران ل دۆر ڤێ كه‌عبێ زڤرى بێ كێم و كاسى و حه‌قێ وان بده‌تێ (ژ مه‌رج و زكر و ره‌وشتان) ئه‌و پێنگاڤه‌كێ ناهاڤێت و ئێكێ ناراكه‌ت هه‌كه خودێ بۆ گونه‌هه‌كێ ژێ نه‌به‌ت و خێره‌كێ بۆ نه‌نڤێسيت. ديسا (سلاڤێت خودێ لێ بن) دبێژيت: ((هه‌ركه‌سێ ته‌وافێ ل دۆر كه‌عبێ بكه‌ت و دوو ركعه‌تان بكه‌ت هه‌روه‌كى به‌نده‌يه‌ك ئازاكرى)). و ئيمام عه‌لى دبێژيت: ته‌وافێ بكه‌ن به‌رى د ناڤبه‌را هه‌وه و وێدا بێته‌گرتن، ڤێجا بلا ئه‌م د زانابين هه‌ردوو خێران ژ خۆ نه‌به‌ين، گه‌له‌ك نڤێژان بكه‌ين و گه‌له‌ك ته‌وافان ژى بكه‌ين، و دبيت ته‌واف ب خێرتر بن، چونكى چه‌ند ره‌نگێت عيباده‌تى يێت تێدا.. ته‌واف و به‌رێخۆدانا كه‌عبێ و زكر و دوعا و نڤێژ ب خۆ ژى و خودێ چێتر دزانيت.
