نه‌قورئانی و حه‌دیس وه‌رنه‌گر
و گۆمانبازیێت وان
(اللاقرانيون ومنكرو الحديث وشبهاتهم)
دكتور: اسماعیل سگێری
بسم الله الرحمن الرحیم
پێشگۆتن
هه‌مى په‌سن و سوپاسى بۆ خوداى، و سلاڤ و سه‌له‌وات ل سه‌ر پێشاهى و خۆشتڤى و رۆناهيا چاڤان، و مه‌هده‌رچيێ مه بن موحه‌ممه‌دى سلاڤێت خودێ ل سه‌ر بن و هۆگرێت وى و هه‌ركه‌سێ باش رێكا وان بگريت هه‌تا رۆژا دويماهيێ.
زانایه‌كێ هه‌ڤچه‌رخ دبێژیت: راكرنا گۆمانبازیان (شوبوهاتان) ژ رێكا راسته‌رێخوازاندا ژ راكرنا زیانان ژ رێكا خه‌لكى بخێرتره، ژ ڤی بنه‌مایی من دڤیا، د كاروانێ به‌ره‌ڤانكه‌ران ژ دینێ خودێ ب گشتی و ژ حه‌دیسا پێغه‌مبه‌رێ خۆشتڤی سلاڤێت خودێ ل سه‌ر بن ب تایبه‌تی پشكداربم و هه‌ڤپشكێ رویسپیاتیا وان ببم، ژ ڤێ ئارمانجێ ئه‌ڤ په‌رتۆكه هاته دانان.
ب راستی ئه‌ڤرۆ دو ره‌نگێت مرۆڤان ژ به‌رهه‌مئینانا مالپه‌رێت ئه‌نترنێتێ دیاربووینه، ئێك ژ یێ دی خراب و زیانكارتره، ره‌نگێ ئێكێ دبێژنه خۆ قورئانی، و ئه‌و ب خۆ ب دورستاهی دویرترین مرۆڤن ژ قورئانێ، و روحا قورئانێ، و مه‌‌به‌ستێت قورئانێ، تو دشێی بێژیێ نه‌قورئانی یان حه‌دیس وه‌رنه‌گر یان بێ باوه‌ر ب حه‌دیسێ، به‌لێ قورئانی نه‌خێر.
و ئه‌و ئه‌ون یێت دڤێن قورئانێ و حه‌دیسێ ژێكڤه‌كه‌ن، ژێك جوداكه‌ن و حه‌دیسێ ژ ژێده‌ر‌یا شه‌ریعه‌تی ده‌ربێخن و دویربێخن، ئه‌و دبێژن قورئان تنێ وه‌حیه و ئه‌و تنێ به‌سی مه‌یه، و حه‌دیسێ ب وه‌حی نزانن و نابینن، و دره‌و ددانن، و ل دویف هنده‌ك گۆمانبازیان گه‌فتینه، و دڤێن وان بكه‌نه تۆر و خه‌فك و ب رێكا مالپه‌ران خه‌لكی بكێشنه لایێ خۆ، و بخاپینن و سهردا ببه‌ن، ئه‌و مالپه‌رێت بێ گۆمان ده‌ستێت نه‌یارێت ڤی دینی د پشترا، چ ب ره‌نگه‌كێ ئێكسه‌ر، یان نه‌یێ ئێكسه‌ر، ب رێكا هنده‌كێت هاته‌ینه كرین، و مخابن ئه‌ڤه یێت شیاین هنده خۆفرۆشان سهردا ببه‌ن و كارێ به‌رامبه‌ریبوونێ و به‌لاڤكرنا هزر و متایێ وان ب وانان بكه‌ن و به‌س ئه‌و ته‌ماشه بكه‌ن.
ره‌نگێ دووێ، هه‌رچه‌نده هه‌كه زیانا وان یا كێمتر ژی بیت، به‌لێ هه‌ر زیانكارن، نه ئه‌ون یێت حه‌دیسێ ب كۆمی نه‌وه‌رگرن، به‌لێ چو گرنگیێ ناده‌نه ره‌خنه و دویڤچۆنا زانستی، و شه‌نگست و بنه‌ما و پیڤه‌رێت زانا ل سه‌ر هه‌ڤده‌نگ، بۆ وه‌رگرتن و هه‌لسه‌نگاندنا حه‌دیسان، به‌لكی ژ نك خۆ هنده پیڤه‌ر داناینه، ژ وان: هه‌ر حه‌دیسا ل دویف دیتنا وان جوداهی د گه‌ل قورئانێ هه‌بیت، یان جوداهی د گه‌ل عه‌قلێ وان هه‌بیت، یان جوداهی د گه‌ل واقع و تشتێ به‌رچاڤ و به‌رده‌ستدار هه‌بیت، ناوه‌رگرن، بێی شه‌نگست و بنه‌مایێت زانستی به‌رچاڤ وه‌رگرن، و تشتێ مرۆڤ بۆ بخه‌م دكه‌ڤیت هنده مرۆڤێت هزرا باشیێ ل سه‌ر ب گۆمانبازیێت وان هاتینه خاپاندن، و به‌ره‌ڤانی و پشته‌ڤانی و پشتگریا وان دكه‌ن، و یێت بووینه بریكاره‌كێت هه‌روه و خۆبه‌خش بۆ به‌لاڤكرنا متا و گۆمان و گۆمانبازیێت وان، د دیواناندا و د تۆرێت په‌یوه‌ندیێت جڤاكیدا.
ئه‌ڤ نامیلكه به‌رسڤدانا گۆمانبازیێت وانه ب ره‌نگه‌كێ نه‌رم و بێنفره‌ھ و بێ تۆره‌یی، هیڤیه هه‌ر ب وی جانی بێته خواندن دا مفا ژێ بێته دیتن.
و دوماهیێ ئه‌ز ژ خودايێ مه‌زن و ب هێز و ب باش ناڤێت وى و ب سالۆخه‌تێت وى يێت به‌رز و بلند دخوازم ڤى كارى سپه‌هى بۆ خۆ وه‌رگريت، و خێرێ د ژيانا مندا و پشتى مرنا من ژى ژێ بده‌ته من، و خێرێ بده‌ته وى يێ بخوينيت، يان هاريكاربیت به‌لاڤ بكه‌ت، ب راستى يێ پاك و پاقژ ژ هه‌مى كێماسيان خودانێ هندێيه و ڤێ دشێت ژى، و سلاڤ و سه‌له‌وات ل پێغه‌مبه‌رێ مه بن موحه‌ممه‌دى و مالا وى و هۆگرێت وى و هه‌ركه‌سێ باش رێكا وان بگريت هه‌تا رۆژا دويماهيێ.
د. اسماعيل سگێرى
20 ذي القعدة 1438 مشه‌ختی
12/8/2017 زاینی
به‌غداد
