دژمنێت ئیسلامێ پشتی بێ هیڤی بووین بشێن به‌رهانگاریا قورئانێ بكه‌ن، ژ به‌ر وى جهێ پیرۆزێ د دلێ موسلماناندا هه‌ی، و ژ به‌ر كو ئه‌و ب خۆ نه‌چاركه‌ره (موعجیزه‌یه) و نه‌شێن ركبه‌ریا وێ بكه‌ن، و تشته‌كى د ده‌رهه‌قێدا بێژن، و ژ به‌ر كۆ ئه‌و ب خۆ ژی دزانن قورئان وه‌حیه و راستیه، و بێ گۆمان ژ ده‌ڤ خودێیه، و هه‌ر تشتێ ئه‌و د راستا قورئانێدا بێژن، كه‌س با وه‌ر ژ وان ناكه‌ت، و ژێ ناوه‌رگرن، و زوى دێ په‌رده ژ سه‌ر وان رابیت، و راستی و دژمنكاریا وان دێ ئاشكرابیت، ژ به‌ر ئه‌ڤا بۆری به‌رێ دژمنكاریا خۆ دا سونه‌تا پێغه‌مبه‌ری (سلاڤێت خودێ ل سه‌ر بن)، ئه‌ڤه ئه‌گه‌رێ سه‌ره‌كیه د گه‌ل ڤێ، ئه‌ڤێت خوارێنه ژی:
1 ـ چونكی سونه‌ت لایێ ل كاره ژ ئیسلامێ، و ئه‌م ب كه‌ساتیا پێغه‌مبه‌ری (سلاڤێت خودێ ل سه‌ر بن) وی لای دزانین و دنیاسین، و ژ لایێ ره‌وشتیڤه ب ره‌نگه‌كێ ل كار پێشه‌وا و رێبه‌ره و چاڤلێكریێ باش و بالایه بۆ هه‌می موسلمانان و باوه‌رداران، و هه‌كه شیان بهنگێڤن و بریندار بكه‌ن ئه‌ڤه لایێ ل كار ل ئسیلامێ نه‌هێلا و نیاسینا پێغه‌مبه‌ری ژى نه‌ما، و چو پێشه‌وا و چاڤلێكری ژی بۆ موسلمانان نه‌ما.
2 ـ چونكی سونه‌ت پارێزۆكه (حافظه)يه بۆ سنج و ره‌وشت و سالۆخه‌تێت پێغه‌مبه‌ری (سلاڤێت خودێ ل سه‌ر بن)، و ئه‌ڤه دلێ وان دسۆژیت، و كه‌ربێن وان ڤه‌دكه‌ت، و دڤێن ڤێ نه‌هێلن، ژ به‌ر هندێ به‌رێ تیرێت خۆ ب دژواری دده‌نه سونه‌تێ و حه‌دیسێ.
3 ـ هه‌روه‌كى عه‌قاد د كتێبا خۆدا (الاسلام في القرن العشرین) دبێژیت: رۆژئاڤا ڤه‌كۆلین ل سه‌ر ئیسلامێ كرن، دا بزانیت كا شه‌نگست و هۆكارێت هێزا وێ چنه؟ گه‌هشتنه سێ شه‌نگستێت سه‌ره‌كى و یێت دی هه‌می نه د سه‌ره‌كینه و تابعی ڤان هه‌رسێیانه:
ئێك: قورئانا پیرۆزه.
دو: ئه‌ڤ سامانێ مه‌زنه یێ حه‌دیسێت پێغه‌مبه‌ری (سلاڤێت خودێ ل سه‌ر بن).
سێ: كه‌سایه‌تیا پێغه‌مبه‌ری (سلاڤێت خودێ ل سه‌ر بن) یا ب ره‌نگه‌كێ زێده هویركار د ڤێ حه‌دیسێدا پاراستی، ب خوارن و ڤه‌خوارن و رابوون و روينشتن و نڤستن و هشياربوون و خه‌و و گری و كه‌نیێ ویڤه و هه‌می كاروبارێت ویڤه هه‌روه‌كی ئه‌و یێ زێندییه د ناڤ موسلماناندا.
و هۆسا ژ سێ شه‌نگستێت هێزا موسلمانان دو یێت سونه‌ت و حه‌دیسا پێغه‌مبه‌ریدا (سلاڤێت خودێ ل سه‌ر بن)، ژ به‌رهندێ به‌رێ دژمنیا خۆ دژوار دا سونه‌تا پێغه‌مبه‌ری (سلاڤێت خودێ ل سه‌ر بن).
4 ـ وان ژ ده‌ڤ خۆ دانا هه‌كه حه‌دیس د دلێ موسلماناندا ده‌رێخست، ئه‌ڤه وان دو شه‌نگستێت ب هێز ژ ئیسلامێ ئێخستن و نه‌هێلان، و شه‌نگستێ مای و یێ سێیێ كو قورئانه وه‌كی خۆ نه هێلا، راسته نه‌شیان بێژن: ده‌ست و گوهۆرین يا كه‌تیه د قورئانێدا، به‌لێ دویرئێخستنا حه‌دیسێ كو رۆنكه‌رێ سه‌ره‌كییه بۆ قورئانێ، و نه‌هێلانا شه‌نگستێت ز‌مانی یێت تێگه‌هشتنا قورئانی، بسته‌یی و وێره‌كى بۆ هه‌ركه‌سه‌كێ چێكر، وه‌كی دلێ وی دخوازیت قورئانێ راڤه‌كه‌ت.
5 ـ وان ل ده‌ڤ خۆ دانا هه‌كه شیان حه‌دیسێ و رێزگرتنا وێ د دلێ موسلماناندا و د ژیانا واندا ده‌ربێخن ئه‌ڤه شیان قورئانێ ژی ده‌ربێخن بێی كو ئاخفتنه‌كێ د راستێدا بێژن، چونكی دزانن موسلمان نه‌شێن قورئانێ بگرن ب گرتنا حه‌دیسێ نه‌بیت، چونكی ئه‌و رۆنكه‌ره بۆ تشتێ د قورئانێدا هاتی.
و مخابن و سه‌د جار مخابن دژمنێت دینی د دژمنكاری و به‌رهنگاریا خۆدا پشت ب خۆفرۆشێت خۆڤه به‌ست و ڤی شه‌ری دژمنیا حه‌دیسێ و سونه‌تێ ب وان دده‌نه‌‌كرن و ئه‌و یێت روينشتی پیه‌ك ل سه‌ر پیه‌كى هاڤێتین ته‌ماشه دكه‌ن و دكه‌نن (وَفِيكُمْ سَمَّاعُونَ لَهُمْ) و ژ هه‌وه یێت هه‌ین گوهێ خۆ دده‌نه وان.
هه‌تا ده‌مه‌كێ نێزیك ئه‌و ب خۆ ب كارێ دژمنكاریێ رادبوون، و به‌رهنگاری ئیسلامێ دبوون پاشی ب سه‌ر رێكه‌ك و نه‌خشه‌كێ گوهۆر هه‌لبوون، ئه‌و ژی خۆفرۆشێت وانن د ناڤ مه‌دا، ئه‌وێت ئه‌ڤرۆ هزر و بیرێت هه‌رفتی و خوار و ڤیچ دهه‌لگرن، و ب ئه‌زمانێ مه دئاخڤن، به‌لێ مخابن یێت بووینه ئه‌زمان و خامێت وان د دژاتیا ئیسلامێ و پێغه‌مبه‌رى و حه‌دیسا ویدا ب كار دئینن.
