حه‌دیس وه‌رنه‌گران پشتا خۆ ب كۆمه‌كا به‌لگه و نیشانێت سست و خلۆله‌ڤه به‌ستیه، و ئه‌و د راستیا خۆدا گۆمان و گۆمانبازینه پتر كو به‌لگه و گرۆڤ و ده‌لیل بن، و هه‌رگاڤا تو بێخیه به‌رامبه‌ر راستی و رۆناهیا راستیێ دحه‌لیێن و دهه‌رفن و نامینن، و خۆ ل به‌ر راستیا ناگرن، و كا چاوا تاریاتی ب رۆناهیێ دره‌ڤیت و دچیت و نامینیت، هۆسا ئه‌و گۆمان ژی به‌رامبه‌ر راستیێ نامینن و دهه‌رفن و دره‌ڤن.
ئه‌م دشێن گۆمان و به‌لگه و سه‌ختێت وان بكه‌ینه دو جوین، ڤه‌گوهازتی و عه‌قلی، و به‌لگه و سه‌ختێت وان یێت ڤه‌گوهازتی پشتبه‌ستنا وان یا خه‌له‌ت و نه‌دورسته و نه د جهێ خۆدایه ب هنده ئایه‌تێت قورئانا پیرۆز، و د راستیا خۆدا ئه‌و ئایه‌ت نه دویر و نه نێزیك ل سه‌ر بۆچۆنا وان یا له‌نگ و كۆره نابنه به‌لگه، و به‌لگ وه‌رگرتنا وان به‌رامبه‌ر راستیان خۆ ل سه‌ر پێ ناگرن، و بێ پشك و بارن ژ زانین و تێگه‌هشتنێ، و یێ ره‌وشه‌نبیر بیت ب وان به‌لگه‌سه‌ختان و گۆمانبازیان ناهێنه خاپاندن، و نه به‌لگه‌یێت وان یێت ڤه‌گوهازتی وێ رامانێ دده‌ن یا وان دڤێت، و نابنه به‌لگه ل سه‌ر وێ بۆچۆنا ئه‌و دچنێ و دبێژن، و نه به‌لگه یێت وان یێت عه‌قلی د خۆراگرتی و دورستن، به‌لكی د خاڤ و سستن و به‌رامبه‌ر به‌لگه‌یێت راست و دورست خۆ ناگرن و دهه‌رفن و به‌رگریێ ناكه‌ن.
