ئێك: دبێژن: گۆتنا خودێیه (مَّا فَرَّطْنَا فِى الكِتَابِ مِن شَىْءٍ).
رویێ به‌لگه‌دان وه‌رگرتنێ: خودایێ مه‌زن د ڤێ ئایه‌تێدا دبێژیت چو تشت نه‌مایه مه د قورئانێدا نه‌ئینایه، ژ تشتێت مرۆڤ هه‌وجه ببنێ، چ گر چ هویر؛ چونكی (من شیء) هه‌می تشتان دگریت، یێت مه هه‌وجه‌یی بۆ هه‌یی، و (كتاب) ل ڤێرێ قورئانه، و هه‌كه وه‌سابیت مه چو هه‌وجه‌یی ب حه‌دیسێ نینه، تایبه‌ت پشتی مه زانی قورئانێ هه‌وجه‌یێت مه هه‌می یێت ڤه‌گرتین، و هه‌می تشتێت تێدا، و به‌لگه ل سه‌ر هندێ، رامان ژ كتێبێ قورئانه، گۆتنا خودێ ئه‌وا دیار دكه‌ت هه‌می تشت د قورئانێدا یێت هاتینه دیار‌كرن و هه‌وجه‌ی غه‌یری قورئانێ نینه، خودێ دبێژیت: (وَنَزَّلْنَا عَلَيْكَ الْكِتَابَ تِبْيَانًا لِّكُلِّ شَىْءٍ وَهُدًى وَرَحْمَةً وَبُشْرَى لِلْمُسْلِمِينَ) و بێ گۆمان كیتاب ل ڤێرێ قورئانه.
به‌رسڤدان:
ئه‌و ئایه‌تا ئێكێ یا هه‌وه كریه به‌لگه، ئایه‌تا سیهـ و هه‌شتێیه، ژ سۆره‌تا ئه‌نعام، و مه باوه‌ری یا پێ هه‌ی، و كا چاوا هاتیه خوارێ، و بۆ چ هاتیه خوارێ، و كا چ رامان دده‌ت ئه‌م وه‌ردگرین و باوه‌ریێ پێ دئینین، به‌لێ د بنیرا ئه‌ڤ ئایه‌ته بۆ هه‌وه نابیته به‌لگه، و وێ رامانێ ناده‌ت یا هه‌وه دڤێت، و دڤێت ئه‌م بزانین په‌یڤا (كتاب) سه‌د و شێست و سێ جاران د قورئانێدا هاتیه، و هه‌ر جاره‌كێ ب رامانه‌كێ هاتیه، ب رامان ته‌ورات و ئنجیل و قورئان و ده‌پێ پاراستی و ده‌م هاتیه، و پێشی و پاشیا په‌یڤێ و رێزبه‌ندیا ئایه‌تێ دیار دكه‌ت كا مه‌به‌ست ب كتابێ چیه، د ئایه‌تا ئێكێدا د بنيرا مه‌به‌ست پێ قورئان نینه، و هه‌كه به‌رێ خۆ بده‌یه به‌راهیك و دویماهیكێت ئایه‌تێ پێكڤه، دێ بۆ ته مه‌به‌ست ئاشكرابیت، خودایێ مه‌زن دبێژیت: (وَمَا مِن دَآبَّةٍ فِى الاٌّ رْضِ وَلاَ طَائِرٍ يَطِيرُ بِجَنَاحَيْهِ إِلاَّ أُمَمٌ أَمْثَالُكُمْ مَّا فَرَّطْنَا فِى الكِتَابِ مِن شَىْءٍ ثُمَّ إِلَى رَبِّهِمْ يُحْشَرُونَ) و رامانا ئایه‌تێ ئه‌ڤه‌یه: نينه جانه‌وه‌ره‌ك ل سه‌ر ڕوييێ ئه‌ردى بچيت يان باله‌فڕه‌ك ب چه‌نگێت خۆ، بفڕيت، هه‌كه ئه‌و ژى [د ژين، و مرن، و چێكرن، و ڤه‌ژين و هه‌وجه‌يييا خۆدا] وه‌كى هه‌وه كۆم نه‌بن، و مه چو [ژ هه‌وجه‌يييێت هه‌وه] د كتێبێدا [مه‌خسه‌د پێ ده‌پێ پاراستييه] نه‌هێلايه و ژ بير نه‌كريه، ڤێجا پاشى ئه‌و دێ ب بال خودايێ خۆڤه ئێنه كۆمكرن. هۆسا دیار دبیت ئایه‌ت به‌حسێ مه‌زناتیا خودایێ مه‌زن دكه‌ت، و زانینا وی هه‌می تشتان دگریت، و هه‌ر جانداره‌كێ هه‌بیت ڤێجا مرۆڤ بیت یان جیانه‌وه‌ر بیت، چو ل به‌ر خودێ به‌رزه نابن، هه‌می د كتێبێدا كو ده‌پێ پاراستییه یێ هاتیه دیار‌كرن، و چو تێدا ژ بیر نه‌كریه، و پاشی هه‌می پێكڤه بۆ ده‌ڤ خودێ رۆژا قیامه‌تێ دێ زڤرن، هۆسا دیار دبیت مه خسه‌د ژ كيتابێ ده‌پێ پاراستیه، و ئه‌ڤه ژی وه‌كی ئایه‌تا بیست و دوویێیه ژ سۆره‌تا حه‌دید (مَآ أَصَابَ مِن مُّصِيبَةٍ فِى الاٌّ رْضِ وَلاَ فِى أَنفُسِكُمْ إِلاَّ فِى كِتَابٍ مِّن قَبْلِ أَن نَّبْرَأَهَآ إِنَّ ذَلِكَ عَلَى اللَّهِ يَسِيرٌ) نينه تشته‌ك د ئه‌رديدا بقه‌وميت، يان بێته سه‌رێ هه‌وه، و د ده‌پێ پاراستيدا يێ نڤێسى نه‌بيت ـ به‌رى ئه‌م بده‌ين ـ و ب ڕاستى ئه‌ڤه ل به‌ر خودێ يا ب ساناهييه. و هۆسا دیار دبیت ئه‌و كتێبا هه‌می تشت ب خۆڤه گرتین، مه‌به‌ست ژێ ده‌پێ پاراستیه، نه قورئانه، و خۆ هه‌كه قورئان ژی بیت هه‌روه‌كی د ئایه‌تا دووێدا هاتی: (وَنَزَّلْنَا عَلَيْكَ الْكِتَابَ تِبْيَانًا لِّكُلِّ شَىْءٍ وَهُدًى وَرَحْمَةً وَبُشْرَى لِلْمُسْلِمِينَ) مه‌خسه‌د پێ ئه‌وه هه‌ر تشته‌كێ كار ژێ خواستی (موكه‌له‌ف) هه‌وجه‌یی بۆ هه‌ی، ژ فه‌رمان و نه‌هیان ب خۆڤه گرتیه، ڤێجا هه‌ر تشتێ ب درێژی هاتبیت قورئان به‌سی مه‌یه، و ئه‌م هه‌وجه‌ی چو تشتێ دی نابین ژ بلی بۆ پتر پشتراستكرنێ نه‌بیت، و هه‌ر تشته‌كێ ب كۆمكاری هاتبیت و نه‌هاتبیته ژێكڤه‌كرن و ب درێژی د قورئانێدا نه‌هاتبیت، قورئانێ به‌رێ موسلمان و باوه‌ریداران و به‌رێ مه یێ دایه رێكا راڤه‌كرن و درێژكرنێ تێدا ببینین ئه‌و ژی حه‌دیسێت پێغه‌مبه‌رینه (سلاڤێت خودێ ل سه‌ر بن)؛ چونكی تشتێ دبێژیت ژ ده‌ڤ خۆ نابێژیت، و ئه‌و ژی وه‌حیه و پشكا دووێیه ژ وه‌حیێ، و خودایێ مه‌زن د راستا ئاخفتنا ویدا دبێژیت: (وما ینطق عن الهوی) و هه‌ر تشتێ ژ پێغه‌مبه‌ری (سلاڤێت خودێ ل سه‌ر بن) هاته زانین دڤێت بێته وه‌رگرتن، خودێ بۆ ڤێ چه‌ندێ دبێژیت: (وما آتاكم الرسول فخذوه وما نهاكم عنه فانتهوا) هه‌ر تشتێ پێغه‌مبه‌ر (سلاڤێت خودێ ل سه‌ر بن) پێ هات وه‌رگرن و یێ نه‌هیا هه‌وه ژێ كر بهێلن ونه‌كه‌ن، و خودێ فه‌رمانا مه یا كری كا چاوا ئه‌م گوهداریا وی بكه‌ین هۆسا گوهداریا پێغه‌مبه‌رێ وی ژی بكه‌ین دبێژیت: ( وَأَطِيعُواْ اللَّهَ وَالرَّسُولَ لَعَلَّكُمْ تُرْحَمُونَ ) و دبێژیت: ( قُلْ أَطِيعُواْ اللَّهَ وَالرَّسُولَ فإِن تَوَلَّوْاْ فَإِنَّ اللَّهَ لاَ يُحِبُّ الْكَافِرِينَ ) و دبێژیت: ( وَمَن يُطِعِ اللَّهَ وَالرَّسُولَ فَأُوْلَئِكَ مَعَ الَّذِينَ أَنْعَمَ اللَّهُ عَلَيْهِم ) و دبێژیت: ( وَمَن يُطِعِ اللَّهَ وَرَسُولَهُ فَقَدْ فَازَ فَوْزاً عَظِيماً ) و دبێژیت: ( مَّنْ يُطِعِ الرَّسُولَ فَقَدْ أَطَاعَ اللَّهَ ) و دبێژیت: ( يَا أَيُّهَا الَّذِينَ آمَنُواْ أَطِيعُواْ اللَّهَ وَأَطِيعُواْ الرَّسُولَ ) و دبێژیت: ( وَمَن يُطِعِ اللَّهَ وَرَسُولَهُ يُدْخِلْهُ جَنَّا تٍ تَجْرِي مِن تَحْتِهَا الأَنْهَرُ خَالِدِينَ فِيهَا وَذلِكَ الْفَوْزُ الْعَظِيمُ وَمَن يَعْصِ اللَّهَ وَرَسُولَهُ وَيَتَعَدَّ حُدُودَهُ يُدْخِلْهُ نَاراً خَالِداً فِيهَا وَلَهُ عَذَابٌ مُّهِينٌ ) و دبێژیت: ( وَأَطِيعُواْ اللَّهَ وَأَطِيعُواْ الرَّسُولَ وَاحْذَرُواْ فَإِن تَوَلَّيْتُمْ فَاعْلَمُواْ أَنَّمَا عَلَى رَسُولِنَا الْبَلاَغُ الْمُبِينُ ) و دبێژیت: ( وَأَطِيعُواْ اللَّهَ وَرَسُولَهُ إِن كُنتُم مُّؤْمِنِينَ ) و دبێژیت: ( قُلْ أَطِيعُواْ اللَّهَ وَأَطِيعُواْ الرَّسُولَ فَإِن تَوَلَّوْاْ فَإِنَّمَا عَلَيْهِ مَا حُمِّلَ وَعَلَيْكُمْ مَّا حُمِّلْتُمْ وَإِن تُطِيعُوهُ تَهْتَدُواْ وَمَا عَلَى الرَّسُولِ إِلاَّ الْبَلاَغُ الْمُبِينُ ) به‌رێ خۆ بدێ ب چه‌ند ره‌نگان به‌رێ مه دایه گوهداریا پێغه‌مبه‌رێ خۆ (سلاڤێت خودێ ل سه‌ر بن)، و چه‌ند ره‌نگان فه‌رمان ب گوهداریا وی كریه، جاره‌كێ ئاشكرا دكه‌ت یێ پشتا خۆ بده‌ته گوهداریا خودێ و پێغه‌مبه‌رێ وی خودێ حه‌ز ژ گاوران ناكه‌ت، ئانكو گاور پشتا خۆ دده‌نه گوهداریا وی، و جاره‌كێ یێ گوهداریا وی و پێغه‌مبه‌رێ وی كر ئه‌و دێ د گه‌ل سه‌رفه‌راز و قه‌نجیلێكریان بن، و جاره‌كێ یێ گوهداریا وی و پێغه‌مبه‌رێ وی كر ئه‌و ب سه‌ركه‌فتنه‌كا مه‌زن سه‌ركه‌فت، و جاره‌كێ یێ گوهداریا پێغه‌مبه‌رێ وی كر، وی گوهداریا خودێ كر، و جاره‌كێ یێ گوهداریا وی و پێغه‌مبه‌رێ وی كر، دێ وی به‌ته به‌حه‌شتێ، و یێ گوهداریا وی و پێغه‌مبه‌رێ وی نه‌كه‌ت ئه‌ڤه وی پێ ل تخویب و فه‌رمانان دانا، و دێ وی به‌ته جه‌هنه‌مێ و ئیزایه‌كا رسواكه‌ر بۆ وییه، و جاره‌كێ دبێژیت: گه‌لی باوه‌ریداران گوهداریا خودێ و پێغه‌مبه‌ری بكه‌ن، و هه‌ركه‌سێ پشتا خۆ بده‌ته ڤێ فه‌رمانێ، یا ل سه‌ر پێغه‌مبه‌ری به‌س گه‌هاندنه، و جاركا دی دبێژیت: گوهداریا خودێ و پێغه‌مبه‌ری بكه‌ن هه‌كه هوین ئیماندار و باوه‌ریدارن، و خودێ كارێ پێغه‌مبه‌رێ خۆ د راستا ڤێ قورئانێدا دیاردكه‌ت گه‌هاندن و ته‌بلیغه، و ئه‌ڤه یا كری، و ئه‌م هه‌می بێ دودلی وه‌ردگرین، و كارێ وی یێ دووێ ئاشكراكرن و راڤه‌كرن و شلۆڤه‌كرن و رۆنكرنا فه‌رمان و ئه‌حكامێت وینه، ئه‌وێت ب كۆمكاری (موجمه‌ل) هاتینه خوارێ، راڤه‌بكه‌ت و مه‌به‌ستا خودێ تێدا دیاركه‌ت، د ڤێ رامانێدا خودایێ مه‌زن دبێژیت: (وَأَنزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ وَلَعَلَّهُمْ يَتَفَكَّرُونَ) و مه قورئان بۆ ته ئينا خوار، دا تو بۆ مرۆ‌ڤا‌ن ئه‌وا بۆ وان هاتى، ئاشكه‌را بكه‌ى، و به‌لكى هزرا خۆ بكه‌ن و ل خۆ بزڤڕن.
و دبێژیت: (وَمَآ أَنْزَلْنَا عَلَيْكَ الْكِتَابَ إِلاَّ لِتُبَيّنَ لَهُمُ الَّذِى اخْتَلَفُواْ فِيهِ وَهُدًى وَرَحْمَةً لقوم يؤمنون) و مه ئه‌ڤ قورئانه بۆ ته ئينايييه خوارێ، دا تو بۆ وان ديار بكه‌ى ئه‌وا ئه‌و تێدا ب گۆمان و دودل و [مه ئه‌ڤ قورئانه بۆ ته ئينايييه خوارێ]، دا ببيته ڕێكا ڕاسته‌ڕێيى و دلۆ‌ڤانييێ بۆ وان ئه‌وێت باوه‌رييێ دئينن. (فَإِنَّمَا عَلَيْكَ الْبَلاغُ) (إِنْ عَلَيْكَ إِلاَّ الْبَلاغُ) (فَهَلْ عَلَى الرُّسُلِ إِلاَّ الْبَلاَغُ الْمُبِينُ) د ڤان ئایه‌تاندا دیار دبیت دو تشت ئه‌ركێت پێغه‌مبه‌رینه (سلاڤێت خودێ ل سه‌ر بن)، و هه‌ردو پێكڤه گرێداینه. ئه‌ركێ گه‌هاندنێ دخوازیت بێ كێماسی و بێ گوهۆرین و وه‌كی خودێ فه‌رمان پێ كری و ئینایه خوار بگه‌هینیت، و ئه‌ركێ دیار‌كرنێ دخوازیت هه‌كه ئه‌و ب ڤى ئه‌ركی نه‌رابیت یان پێ رانه‌ببیت ب رێكا حه‌دیسا خۆ وی دورستاهی نه‌گه‌هاندیه.
و دیسا وی چو رۆن و ئاشكرا نه‌كریه ب ده‌ستویری و فه‌رمانا خودێ نه‌بیت ڤێجا چاوا دورسته ئه‌م قورئان و حه‌دیسێ ژێكڤه‌كه‌ین.
