گۆمانبازیا وان یا دویێ ئه‌ڤه‌یه دبێژن خودایێ مه‌زن دبێژیت: (وَنَزَّلْنَا عَلَيْكَ الْكِتَابَ تِبْيَانًا لِّكُلِّ شَىْءٍ وَهُدًى وَرَحْمَةً وَبُشْرَى لِلْمُسْلِمِينَ).
رویێ به‌لگه‌دانێ: خودایێ مه‌زن دبێژیت: مه قورئان بۆ ته یا ئینايه خوارێ كو ڕۆنكه‌را هه‌می تشتانه، و ڕێكا هیدایه‌تێیه و دلۆڤانی و مزگینییه بۆ موسلمانان، و هه‌كه رۆنه‌كه‌را هه‌می تشتان بیت، چ هه‌وجه‌یی بۆ حه‌دیسێ هه‌یه.
به‌رسڤدان : ئه‌ڤه ئایه‌تا هه‌شتێ و نه‌هێیه ژ سوره‌تا نه‌حل. و بێ گۆمان مه‌خسه‌د ب كيتابێ ل ڤێرێ قورئانه، به‌لێ مه‌به‌ست ئه‌و نینه یا هوین دبێژن چونكی (تبیان) دو رامانان دگریت:
ئێك: راسته قورئان ڕۆنكه‌ره بۆ هه‌می تشتان، به‌لێ ب ئاوایه‌كێ كۆمكاری بۆ هه‌رتشتێ كار ژێ خواستی (موكه‌لف) هه‌وجه ببنێ ژ كاروبارێت دینی، و مه گۆمان د ڤێ چه‌ندێدا نینه، یا ب درێژی هاتی، قورئان به‌سی مه‌یه، و یا ب درێژی نه‌بیت، ئه‌ركێ پێغه‌مبه‌رییه (سلاڤێت خودێ ل سه‌ر بن) ئاشكرا بكه‌ت و ڕۆنكه‌ت، و نابیت ئه‌م بێژین هویر و گر یێت هاتینه رۆنكرن، چونكی گه‌له‌ك كارێت قادا په‌رستنان ب هویرده‌كاری نه‌هاتینه ڕۆنكرن، ب حه‌دیسێ نه‌بیت وه‌كی: نڤێژێ كارێت پێڤه گرێدایی چاوا دكه‌ن و ب چ به‌تال دبیت و شه‌نگست و ئه‌رك و سونه‌تێت وێ چنه و هه‌ر دیسا زه‌كات و حه‌ج هه‌كه ب حه‌دیسێ نه‌بن نابیت كار ب ڤان ئه‌ركان بێته‌كرن.
دو: رامان ژ (تبیان)ێ ئه‌وه ڕۆنكرنه بۆ هه‌می تشتان بۆ پێغه‌مبه‌ری (سلاڤێت خودێ ل سه‌ر بن)، و ب ڤێ رامانێ رۆنكه‌ر خودێیه و بۆ پێغه‌مبه‌ری (سلاڤێت خودێ ل سه‌ر بن)، و هۆسا راسته قورئان رۆنكه‌ره بۆ هه‌می تشتان به‌لێ بۆ پێغه‌مبه‌ری (سلاڤێت خودێ ل سه‌ر بن)، و پێغه‌مبه‌ر ب فه‌رمانا (لتبین للناس) رۆنكه‌ره بۆ مرۆڤان، ژێده‌ر هه‌ر خودییه، ب رێكا پێغه‌مبه‌ری (سلاڤێت خودێ ل سه‌ر بن)، و هۆسا بۆ هه‌وه نابیته به‌لگه، و مه‌به‌ست ژ ئایه‌تێ د بنیرا ئه‌و نینه یا هوین بۆ چۆیین، و بۆچۆنا هه‌وه بۆچۆنه‌كا خه‌له‌ته و نه‌دورسته و ئه‌ڤ ئایه‌ته بۆ هه‌وه نابیته به‌لگه.
