گومانبازیا وان یا سێیێ دبێژن: كۆمه‌كا ئایه‌تان په‌سن و سالۆخه‌تا قورئانێ دكه‌ن یا رۆنكه‌ره و رۆنه، و پێدڤی غه‌یر خۆ نینه بێته رۆنكرن، ژ به‌رهندێ پێدڤی ب حه‌دیسێ نینه، ژ وان ئایه‌تان گۆتنا خودێ: (تلك آيات الكتاب وقرآن مبين) و گۆتنا خودێ: (إن هو إلا ذكر وقرآن مبين) و گۆتنا خودێ: (تِلْكَ آيَاتُ الْقُرْءَانِ وَكِتَابٍ مُّبِينٍ) و گۆتنا خودێ: (قَدْ جَآءَكُمْ مِّنَ اللَّهِ نُورٌ وَكِتَابٌ مُّبِينٌ) و گۆتنا خودێ: (وإذا تتلى عليهم آياتنا بينات) و گۆتنا خودێ: (هُوَ الَّذِى يُنَزِّلُ عَلَى عَبْدِهِ آيَاتٍ بَيِّنَاتٍ) و گۆتنا خودێ: (وَلَقَدْ أَنزَلْنَآ إِلَيْكَ ءَايَاتٍ بَيِّنَاتٍ وَمَا يَكْفُرُ بِهَآ إِلاَّ الْفَاسِقُونَ) و گۆتنا خودێ: (وَلَقَدْ أَنْزَلْنَا إِلَيْكُمْ آيَاتٍ مُّبَيّنَاتٍ) و یا دویماهیكێ دیار دكه‌ت رۆنكرن ژ لایێ خودێڤه‌یه دبێژیت: (ثُمَّ إِنَّ عَلَيْنَا بَيَانَهُ).
به‌رسڤدان: به‌رامبه‌ر ڤان ئایه‌تان، مه ئه‌ڤ ئایه‌ته ژی یێت هه‌ین، خودایێ مه‌زن دبێژیته پێغه‌مبه‌ری (سلاڤێت خودێ ل سه‌ر بن): (وَأَنزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ) (وَمَا أَنْزَلْنَا عَلَيْكَ الْكِتَابَ إِلاَّ لِتُبَيِّنَ لَهُمُ الَّذِى اخْتَلَفُواْ فِيهِ) ئه‌و ژی دیار‌كرنا ئه‌ركێ پێغه‌مبه‌رییه (سلاڤێت خودێ ل سه‌ر بن) د راستا وێ كتێبا د ده‌رهه‌قێ وێدا (مبین) و (بینات) و (علینا بیانه) هاتی كو رۆنكرنه (لتبین للناس) و (لتبین لهم) و هاتنا ڤان په‌یڤان به‌رامبه‌ری ئێك، مه‌به‌ستداره، و كا چاوا (مبین) و (بینات) و (علینا بیانه) بێ گۆمان ژ قورئانێنه هۆسا بێ گۆمان (لتبین للناس) و (لتبین لهم) دیسا ژ قورئانێنه، و بێ مه‌به‌ست و ژ قه‌ستا به‌رامبه‌ر ئێك و دو نه‌هاتینه، و مه‌ره‌م ئارمانجا خۆ یا هه‌ی، ئه‌و ژی ئه‌ڤه‌یه: (مبین) و (بینات) و (علینا بیانه) رۆنكرنه ژ خودایێ مه‌زن بۆ پێغه‌مبه‌رێ خۆ (سلاڤێت خودێ ل سه‌ر بن)، و (لتبین للناس) و (لتبین لهم) فه‌رمانه ژ خودێ بۆ پێغه‌مبه‌ری (سلاڤێت خودێ ل سه‌ر بن) ئه‌و رۆنكرنا خودێ نیشا دایی و كریه د قورئانێدا بۆ خه‌لكی رۆن بكه‌ت، و ژێده‌رێ سه‌ره‌كی یێ رۆنكرنێ هه‌ر خودێیه، و ب رێكا پێغه‌مبه‌ری (سلاڤێت خودێ ل سه‌ر بن) كو دبیته ژێده‌رێ دویێ، و كورت و كرمانج قورئان ژ لایێ خودێڤه رۆنكه‌ره بۆ پێغه‌مبه‌ری (سلاڤێت خودێ ل سه‌ر بن)، و پێغه‌مبه‌ر (سلاڤێت خودێ ل سه‌ر بن) رۆنكه‌ره بۆ قورئانێ ب حه‌دیسا خۆ بۆ خه‌لكی، و هه‌ردو رۆنكرن وه‌حینه، یا ئێكێ قورئانه و یا دووێ ب فه‌رمانا خودێ حه‌دیسه، ئه‌و ژی وه‌حیه، هۆسا ئه‌ڤ ئایه‌ته د بنیرا نابنه به‌لگه ل سه‌ر هندێ رۆنكرنا قورئانێ هه‌وجه‌یی ب حه‌دیسێ نینه.
