گۆمانبازیا ده‌هێ: وان تێدا دڤێن هه‌یبه‌ت و رێز و حورمه‌تا حه‌دیسێ د دلێ موسلماناندا بشكێنن، و پیرۆزیا وێ نه‌هێلن یان بكێشن، دبێژن: ئه‌و حه‌دیسێت زانایان بۆ مه ڤه‌گوهازتین، نه گۆتن و ئاخفتنێت پێغه‌مبه‌رینه و ده‌قێت ئاخفتنێت وینه، به‌لكی رامانا ئاخفتنێت وینه و ب بێژه‌یا ڤه‌گێرڤانان، ڤێجا كه‌نگی یا دورسته ئه‌م پیرۆزیێ بده‌ینه ئاخفتنێت زه‌لامان و نه یێت پێغه‌مبه‌ری و بكه‌ینه ژێده‌رێ دووێ ژ ژێده‌رێت شه‌ریعه‌تی.
به‌رسڤدان:
تشتێ زانا ل سه‌ر ئێك و نه ژێك جودا، و ل سه‌ر كۆم، تایبه‌ت زانایێت توژینه‌ر (محقق)، حه‌دیس ب ده‌قا ئاخفتنێ و ب بێژه‌یا خۆڤه و ب رامانڤه ژی هاتینه ڤه‌گێران، و نه ب رامانێڤه تنێ هاتینه ڤه‌گێران، و بنیاتێ كار پێ كری ڤه‌گێرانه ب ده‌قا وانڤه، و ڤه‌گێران ب رامانێڤه نه‌بنیاته، به‌لكی ده‌ستویریه، هه‌كه پێدڤی و هه‌وجه‌یێ خواستێ ئه‌و ژی د تخویبێت به‌رته‌نگ به‌رته‌نگدا، و چاوا دێ پیرۆزیا حه‌دیسا ل ده‌ڤ مه سست بیت و ئه‌م دزانین ئه‌وێت ئاخفتن و گۆتنێت پێغه‌مبه‌ری (سلاڤێت خودێ ل سه‌ر بن) ژێ ڤه‌گوهاستین، هه‌ڤال و هۆگرێت وینه، و ئه‌وێت شه‌هده‌یی ب ئه‌مانه‌ت و دادپه‌روه‌ری و راستی و خودێ ترسیا وان هه‌ی، و ئه‌ڤه رۆن و ئاشكه‌را د قورئانا پیرۆزدا هاتیه، خودایێ مه‌زن د راستا وان و تابعیناندا ئه‌وێت حه‌دیسێت پێغه‌مبه‌ری (سلاڤێت خودێ ل سه‌ر بن) بۆ مه ڤه‌گوهاستین، دبێژیت: (وَالسَّابِقُونَ الاٌّوَّلُونَ مِنَ الْمُهَاجِرِينَ وَالأَنْصَارِ وَالَّذِينَ اتَّبَعُوهُم بِإِحْسَانٍ رَّضِىَ اللَّهُ عَنْهُمْ وَرَضُواْ عَنْهُ وَأَعَدَّ لَهُمْ جَنَّاتٍ تَجْرِي تَحْتَهَا الأَنْهَارُ خَالِدِينَ فِيهَآ أَبَداً ذلِكَ الْفَوْزُ الْعَظِيمُ) و هه‌كه ئه‌ڤ ڤه‌گێرڤانه ژ صه‌حابه و تابعینان د هه‌ژینه‌بانه، خودێ په‌سنا وان نه‌دكر، و شه‌هده‌یی بۆ نه‌ددا، تۆ بێژی ئه‌وێت خودایێ مه‌زن شه‌هده‌یى بۆ دایی، خیانه‌تێ د ڤه‌گوهاستنا خۆدا بكه‌ن، و ئاخفتنێت پێغه‌مبه‌ری (سلاڤێت خودێ ل سه‌ر بن) ڤارێ بكه‌ن، و بگوهۆرن، و سه‌خته‌كاریێ بكه‌ن، حاشای وان، و حاشای خودێ په‌سنا هنده‌كان بكه‌ت و شاده‌یێ بۆ بده‌ت و پاشی هۆسا ده‌ركه‌ڤن.
ئه‌م هه‌می دزانین گوهۆرین د بێژه‌یێدا یان د رامانێدا وه‌كی ئێك دژی راستیێ و حه‌قیێنه، ڤێجا چاوا ئه‌و بسته‌یێ دده‌نه خۆ صه‌حابان و تابعینان ب سه‌خته‌كاریێ (ته‌زویرێ) گونه‌هبار بكه‌ن.
بنگه‌هـ و شه‌نگستێ سه‌ره‌كی و بنه‌تاری د ڤه‌گوهاستنا حه‌دیسێت پێغه‌مبه‌ريدا (سلاڤێت خودێ ل سه‌ر بن) ب بێژه‌یا وانڤه بیت و ب رامانێ نه‌بیت ب سێ مه‌رجان نه‌بیت:
ئێك: هندی شیان هه‌بن دڤێت ڤه‌گوهاستن ب رامانێ نه‌بیت د كراسیێ نه‌چاری و ته‌نگاڤیێدا نه‌بیت، و د تخویبێت ته‌نگ ته‌نگ و سنورداردا.
دو: و هه‌كه ب رامان هاته ڤه‌گوهاستن، دڤێت پشتراست و مسۆگه‌ر ببیت رامان و مه‌ره‌ما پێغه‌مبه‌ری (سلاڤێت خودێ ل سه‌ر بن) ب چو ره‌نگان نه‌هاتیه گوهۆرین.
سێ: هه‌كه ب رامانێ ڤه‌گوهێزیت دڤێت ئاشكرا بكه‌ت و بێژیت بێژه یا وییه، دا كه‌س هزر نه‌كه‌ت ئه‌ڤه ده‌قێ ئاخفتنا پێغه‌مبه‌ریه (سلاڤێت خودێ ل سه‌ر بن)، ڤه‌گوهاستنا حه‌دیسێت پێغه‌مبه‌ری (سلاڤێت خودێ ل سه‌ر بن) ب رامانێ د گه‌ل كو یا كێم بوو، د گه‌ل هندێ ژی زانایان دورست نه‌كریه ب رامان بێته ڤه‌گوهاستن ب مه‌رجێت بۆری نه‌بیت، و ب تخويبێت ته‌نگدا و د كراسێ نه‌چاریێدا نه‌بیت، و ده‌مێ د ڤه‌گوهاستنێدا ب ئاوایه‌كێ زاره‌كی (شفه‌وی). و هه‌كه بۆ گه‌را نڤێسينێ دڤێت ب بێژه‌یا پێغه‌مبه‌ریڤه (سلاڤێت خودێ ل سه‌ر بن) بێته نڤێسن، و پێغه‌مبه‌ری (سلاڤێت خودێ ل سه‌ر بن) به‌رێ صه‌حابان دایه هندێ بێژه‌یا وی نه‌گوهۆرن، و وه‌كی خۆ ڤه‌گوهێزن، پێغه‌مبه‌ر (سلاڤێت خودێ ل سه‌ر بن) دبێژیت: (وَحَدِّثُوا عَنِّي ولا حَرَجَ وَمَنْ كَذَبَ عَلَيَّ مُتَعَمِّدًا فَلْيَتَبَوَّأْ مَقْعَدَهُ من النَّارِ) ئه‌ڤ حه‌دیسه گه‌فه‌كا دژواره بۆ وان یێ تشته‌كى ژ ده‌ڤ خۆ ب دویڤ پێغه‌مبه‌ریڤه‌نیت، (سلاڤێت خودێ ل سه‌ر بن)، و حه‌دیسا وی وه‌كی خۆ نه‌ڤه‌گوهێزیت، و ئه‌ڤ حه‌دیسه دو فه‌رمانه، ئێك: (وَحَدِّثُوا عَنِّي ولا حَرَجَ) و یا دویێ:(وَمَنْ كَذَبَ عَلَيَّ مُتَعَمِّدًا) فه‌رمانا ئێكێ ده‌ستوریه ب رامانێ ژى بێته ڤه‌گوهاستن ب مه‌رجه‌كى رامان و مه‌به‌ستا پێغه‌مبه‌ری (سلاڤێت خودێ ل سه‌ر بن) نه‌هێته گوهۆرین، و فه‌رمانا دویێ پالدانا وانه ل سه‌ر بێژه‌یا وی د هشیاربن، و ده‌قا ئاخفتنا وی ڤه‌گوهێزن، و دیسا د حه‌دیسه‌كا دیدا ل دۆر ڤێ فه‌رمانێ دبێژیت:( نَضَّرَ الله امْرَأً سمع مِنَّا شيئا فَبَلَّغَهُ كما سمع، فَرُبَّ مُبَلِّغٍ أَوْعَى من سَامِعٍ ) خودێ مرۆڤه‌كى حال خۆش كه‌ت تشته‌ك ژ مه گولێ ببیت بگه‌هینیت وه‌كی گولێ بووی، دبیت یێ دگه‌هیتێ ژ یێ گولێ بووی تێگه‌هشتیتر بیت.
د گه‌ل من به‌رێ خۆ بده ئاخفتنا وی (سلاڤێت خودێ ل سه‌ر بن): (فَبَلَّغَهُ كما سمع) داخواز و ئاراسته‌یه ژ وی (سلاڤێت خودێ ل سه‌ر بن)، ئاخفتنا وی چاوه گولێ بوویه وه‌سا بێته ڤه‌گوهاستن، و هێژ یا ژ ڤێ رۆنتر و ئاشكراتر، رژدبوونا پێغه‌مبه‌ری (سلاڤێت خودێ ل سه‌ر بن) ل سه‌رڤه‌گوهاستنا ئاخفتنا وی ب بێژه‌یا خۆڤه بێى گوهۆرین، به‌رائێ كورێ عازبی (خودێ ژێ رازی بیت) دبێژیت: پێغه‌مبه‌ری (سلاڤێت خودێ ل سه‌ر بن) گۆته من: هه‌كه تو چۆيه سه‌ر نڤينێت خۆ ده‌ستنڤێژێ بگره، ده‌ستنڤێژا خۆ بۆ نڤێژێ، پاشى خۆ ل سه‌ر لايێ خۆ يێ راستێ درێژكه و بێژه: (اللَّهُمَّ أَسْلَمْتُ نفِسي إِلَيكَ، وَوَجَّهْتُ وَجْهِي إِلَيْكَ. وَفَوَّضتُ أَمري إِلَيْكَ، وَأَلَجَأْتُ ظَهرِي إِلَيْكَ، رغبةً ورهْبَةً إِلَيْكَ، لامَلجأَ ولا مَنجي مِنْكَ إِلاَّ إِليكَ، آمنتُ بِكِتَابِكَ الذِي أَنزَلْت، وَبِنَبِيِّكَ الذِي أَرسَلتَ، فإِنْ مِتَّ. مِتَّ على الفِطرةِ، واجْعَلهُنَّ آخِرَ ما تَقُولُ) يا خودێ من خۆ سپارته ته و من خۆ ته‌سليمى فه‌رمانا ته كر، و من به‌رێ دلێ خۆ و ئاره‌سته‌يا خۆ دا ته (يان مه‌خسه‌دا من ب په‌رستنا من تويى)، و من كار و بارێت خۆ ب هيڤييا ته‌ڤه هێلان، و من پشتا خۆ ب ته گه‌رم كر و راست كر، د هيڤييێت دلۆڤانييا ته‌دا و ترسێت ئيزايا ته‌دا، ب راستى زڤرِين و ره‌ڤين ژ ته نينه هه‌ر بۆ ده‌ڤ ته نه‌بيت، من باوه‌رى ب وێ كتێبا ته ئينايه خوارێ و ب پێغه‌مبه‌رێ ته هنارتى ئينا. هه‌كه تو مرى، تو ل سه‌ر موسلمانه‌تييێ مرى، و بلا ئه‌ڤه دويماهيك ئاخفتن بيت تو بێژى. به‌راء دبێژت من گۆت هه‌تا ئه‌ز گه‌هشتیمه (وبنبیك الذي ارسلته) من گۆت: (وبرسولك الذی ارسلته) گۆت: (نه‌ء و بنبیك الذي أرسلته) به‌رێ خۆ بدێ پێغه‌مبه‌ر (سلاڤێت خودێ ل سه‌ر بن) چه‌ند يێ رژد و هشیاربوو حه‌دیسا وی وه‌كى خۆ و ب بێژه‌یا خۆڤه بێته ڤه‌گوهاستن د گه‌ل كو (نبي و رسول) دبیت ئێك رامان بن، و جهێ ئێك و دو بگرن، به‌لێ پێغه‌مبه‌ر (سلاڤێت خودێ ل سه‌ر بن) رازى نه‌بوو بكه‌ڤنه جهێ ئێك، ئه‌ڤه هه‌می باوه‌ریه‌كا موكوم بۆ مه ب حه‌دیسێ دورست دكه‌ت، وه‌كی خۆ یێت هاتینه ڤه‌گوهاستن و ڤه‌گێران، و ب رامانڤه زێده یا كێم بوو، و هه‌كه هاتبیت ژی ب مه‌رجێت خۆ یێت دورستیێڤه یێت هاتین، هۆسا باوه‌ریا مه ب حه‌دیسێ موكم و بنه‌جهـ و زێده‌تر لێ دهێت.
