گۆمانبازیا سێزدێ: دبێژن حه‌دیسا گرێدایی گۆتنێ و كریارێ ساخله‌تا گشتى یا ده‌می و جهی بۆ نینه، كو ب كێربهێت بۆ هه‌می ده‌م و زه‌مانان، به‌لكی گرێدایی كه‌سان و كاودانێت تایبه‌ت بوو، و ئه‌ڤرۆ ده يمێ هاتیه گوهۆرین، و كاودان یێت هاتینه گوهۆرین، و د ئه‌نجامدا گۆتن و كریارێت پێغه‌مبه‌ری (سلاڤێت خودێ ل سه‌ر بن) كێر ڤی جهی و ده‌می ناهێن.
به‌رسڤدان:
ئه‌ڤ گۆمانبازیه ژ هه‌وه، یا ئاڤاكریه ل سه‌ر هندێ، ل ده‌ڤ هه‌وه حه‌دیس نه وه‌حیه، و نه شه‌ریعه‌ته، و مه ئاشكراكر ب ره‌نگه‌كێ گۆمانبر، و گۆماننه‌هێل، كو حه‌دیس وه‌حیه و ژێده‌رێ دووێيه ژ ژێده‌رێت شه‌ریعه‌تی، و ئه‌گه‌رێت هاتنه خوارا وه‌حیێ و هاتنا حه‌دیسێ زانا د راستا واندا دبێژن: (العبرة بعموم اللفظ لا بخصوص السبب) به‌لگه‌وه‌رگرتن ب گشتیا بێژه‌يێيه نه ب تایبه‌تیا ئه‌گه‌ر هاتنێیه، بۆ نموونه حوكمێ ظیهارێ نه یێ تایبه‌ته ب خه‌ولایێ ب تنێڤه، به‌لكی ل سه‌ر هه‌ر ره‌وشه‌كا وه‌كی وێ دهێت، ل هه‌می ده‌م و جهان و حه‌دیس ژی هه‌روه‌سا.
