گۆمانبازیا شازدێ: دبێژن كێم حه‌دیسێت دورست د بوخاریێدا هه‌نه، به‌لگه وی شه‌ش سه‌د هزار حه‌دیس ژ به‌ر بوون، و ژ وان به‌س چار هزار تنێ د كتێبا خۆدا بنه‌جهكرن، ئه‌و ژی هژماره‌كا كێمن به‌رامبه‌ر وێ هژمارا گه‌له‌ك یا وی ژ به‌ر.
به‌رسڤدان:
راسته وه‌كی ئه‌و دبێژیت من شه‌ش سه‌د هزار حه‌دیس ژ به‌ر بوون، و ژ وان به‌س چار هزار تنێ د كتێبا خۆدا بنه‌جهكرن، و ئه‌ڤه هندێ ناگه‌هینیت ئه‌و حه‌دیسێت نه‌نڤێسن و بنه‌جهـ نه‌كرین نه د دورستبوون؛ چونكی وی خۆ گرێدابوو ب هنده مه‌رج و بنه‌مایه‌كى نه‌دڤیا بهێلیت، و ژێ ده‌ركه‌ڤیت ئه‌و ژی:
ئێك: مه‌رج و بنه‌مایێ وی ئه‌ڤه‌یه: هه‌ر شه‌ش سه‌د هزار حه‌دیسان دانیته به‌رامبه‌ر ڤی بنه‌مایی و مه‌رجان چه‌ند ل دویڤ وان مه‌رجان هاتن هزار بن كێمتر زێده‌تر وان تنێ بنه‌جهـ بكه‌ت و به‌س، و مه‌رجێت وی ئه‌ڤه‌بوون:
مه‌رجێ ئێكێ: دڤێت هه‌ڤچه‌رخی د ناڤبه‌را ڤه‌گێرڤانێت ژ هه‌ڤدو وه‌رگرتین ب جهـ بهێت، و هه‌كه ئه‌ڤ مه‌رجه نه‌هاتبیته ب جهئينان ئه‌و ڤه‌گێر نه‌وه‌ردگرت، و د صه‌حیحا خۆدا بنه‌جهـ نه‌دكر.
مه‌رجێ دویێ: خۆ هه‌كه هه‌ڤچه‌رخی هه‌بیت ژی، دیسا حه‌دیس نه‌وه‌ردگرت و د صه‌حیحا خۆدا بنه‌جهـ نه‌دكر هه‌تا بۆ وی بێ گۆمان دیار نه‌ببا هه‌ڤدیتنا وان بۆ ئیك و دو، و هه‌كه ئه‌ڤه بۆ وی دیار نه‌ببا، بلا هه‌ر هه‌ڤچه‌رخێت هه‌ڤدوبن، ڤه‌گێرا وان ناوه‌رگریت و د صه‌حیحا خۆدا بنه‌جهـ ناكه‌ت.
و هه‌كه ئه‌ڤ هه‌ردو مه‌رجه پێكڤه نه‌هاتبانه جھـ وی حه‌دیس نه‌دنڤێسی، بلا ژ به‌ركربا، و ئه‌ڤه هندێ ناگه‌هینیت ئه‌وێت ژ به‌ركرین د دورستن، یان نه د دورستن، به‌لكی به‌س ئه‌و ئینان یێت دكه‌ڤنه دویڤ مه‌رجێ وی.
دو: وی ل سه‌ر خۆ دانابوو رۆژێ ژ دو حه‌دیسان پێڤه‌تر نه‌نڤێسیت، و بۆ هه‌ر حه‌دیسه‌كێ ژی ده‌ستنڤێژه‌كا نوی دگرت، و دو ركعه‌ت سونه‌ت دكرن، و دوعایا ئستيخارێ دخواند، و هه‌كه بۆ ده‌ركه‌تبا، دنڤێسی و هه‌كه دویڤ ئستيخارێ نه‌ده‌ركه‌تبا نه‌دنڤێسی، ئه‌ڤه مه‌رجه‌كێ دى بی یێ وی بۆ خۆ دانایی د نڤێسینا صه‌حیحا خۆدا، و ئه‌و دبێژیت من گه‌له‌ك حه‌دیسێت دورست نه‌نڤێسینه دا درێژ نه‌بیت: (ما أدخلت في كتاب الجامع إلا ما صح وتركت من الصحاح مخافة الطول) و ل دویڤ مه‌رجێ وی یێ دویماهیكێ، نڤێسینا دو حه‌دیسان تنێ پشتی ده‌ستنڤێژه‌كا نوی و كرنا دو ركعه‌تان و خواندنا دوعا ئستيخارێ، شازده سالا ما ب صه‌حیحا خۆڤه، پا هكه وی ل دویڤ ڤی مه‌رجی پێنج سه‌د هزار نڤێسابان نه شه‌ش سه‌د هزار، دا پێدڤی چه‌ند سالان بیت پتر ژ (714) سالان هه‌تا تمامكربا، و ئه‌م دزانین ژیێ چه‌ند ساله‌كێت كێم ژ شێستێ بۆریه، و وی نه‌به‌س حه‌دیس تنێ دنڤێسی، به‌لكی ل دویڤ بابه‌تێت فقهی و پشكێت وێ یێت هویركار، و حه‌دیس دكره چه‌ند پارچه، و هه‌ر پارچه‌ك دكره د جهه‌كيدا ل دویڤ بابه‌تان، و ناڤ و نیشان ددانه وی بابه‌تی، ئه‌ڤه هه‌می نه‌كاره‌كێ ب ساناهی بوو، ژ به‌رهندێ نه‌د‌شیا هه‌میان وه‌سا بینیت.
