ب / كچ و كور هه‌كه باب يێ ساخ بيت وه‌كى ئێك ماف يێ د مالێ بابێدا هه‌ى و نابيت باب فه‌رق و جوداهيێ د ناڤبه‌را واندا بكه‌ت، و هه‌كه ب كريارا خۆ ئه‌و هه‌ست بۆ كچێ دورستكر يێ گونه‌هكاره، چونكى پێغه‌مبه‌رێ خودێ سلاڤێت خودێ ل سه‌ربن ئه‌مرێ دايبابان دكه‌ت عه‌داله‌ت و دادپه‌روه‌ريێ د ناڤبه‌را عه‌يالێ خودا بكه‌ت، دبێژيت: هه‌روه‌كى ئيمام ئه‌حمه‌د و ئه‌بو داوود و نه‌سائى ژ نه‌عمانێ كورێ به‌شيرى خودێ ژێ رازی بیت ڤه‌دگوهێزن: (اعدلوا بين أبنائكم اعدلوا بين أبنائكم اعدلوا بين أبنائكم) و ته‌به‌رانى و به‌يهه‌قى و سه‌عيد بن مه‌نسور ژ ئبن عه‌باسى خودێ ژێ رازی بیت ب ڤێ بێژه‌يێ ڤه‌دگێرن: (سووا يبن أولادكم في العطية ولو كنت مفضلا أحدا لفضلت النساء) ژ ڤان هه‌ردوو ريوايه‌تان دهێته زانين نابيت باب فه‌رق و جوداهيێ د ناڤبه‌را عه‌يالاندا بكه‌ت نه‌خاسمه كچ و كوران، و پێغه‌مبه‌ر سلاڤێت خودێ ل سه‌ربن دبێژيت: هه‌كه من ئێك ب سه‌ر ئێكى ئێخستبا دا كچان ب سه‌رئێخم. به‌لێ هه‌كه ئه‌گه‌ره‌كێ شه‌رعي هه‌بيت و عه‌يالێت دى د رازى بن و مه‌خسه‌د و ئنيه‌تا بابێ نه زيان گه‌هاندن بيت و فه‌رق و جوداهي بيت دورسته دانا وى وه‌كى ئێك نه‌بيت هه‌روه‌كى جمهورێ زانايان ڤێ دبێژن، به‌لێ موسته‌حه‌به وه‌كى ئێك دان بۆ هه‌بيت و دڤێت باب كچ و كوران خودانكه‌ت هه‌تا هه‌ردوو مه‌زن دبن و پشتى مه‌زن دبن هندى كچ شوى نه‌كه‌ت مافێ وێ هه‌ر ل سه‌ر بابێ دمينيت خودانكه‌ت و به‌رپسياره ژ وێ، به‌لێ نه‌به‌رپسياره ژ كورى هه‌كه مه‌زن بوو و شيا شۆلكه‌ت و خۆ خودانكه‌ت. ل ڤێرێ ديار دبيت مافێ كچێ پتره ژ يێ كورى هندى شوى نه‌كه‌ت، و هه‌كه باب نه‌ما هه‌ردووكان پشك و بار يێ د ميراتێ بابێ خۆدا هه‌ي و نابيت كچ ژێ بێته زرباركرن چ يا بچويك بيت يان يا مه‌زن، چ يا شويكرى بيت يان نه‌يا شويكرى بيت، چ يا هه‌ژار بيت يان يا زه‌نگين، مافه‌كه و خودێ يێ دايێ، خودێ مه‌زن دبێژيت: ( لّلرّجَالِ نَصيِبٌ مّمَّا تَرَكَ الْوالِدانِ وَالاْقْرَبُونَ وَلِلنّسَاء نَصِيبٌ مّمَّا تَرَكَ الْوالِدانِ وَالاْقْرَبُونَ مِمَّا قَلَّ مِنْهُ أَوْ كَثُرَ نَصِيباً مَّفْرُوضاً ) زه‌لامان د وى (مالێ) ده‌يباب و كه‌س و كاران ب پاش خۆڤه هێلايى، بار و پشكه‌ك هه‌يه، و ژنان ژى ژ وى (مالێ) ده‌يبابان و كه‌س و كاران ب پاش خۆڤه هێلايى، بار و پشك هه‌يه، چ كێم چ زێده، پشكه‌كه ژ به‌رێ خودێڤه هاتيه دانان. به‌لێ كچ هنده جاران دايكه و هنده جاران خويشكه و هنده جاران هه‌ڤژينه و د هه‌مى كراساندا زه‌لام به‌رپرسه ژ خودانكرنا وێ و ل سه‌ر زه‌لامى دكه‌ڤيت خودانكه‌ت و پێدڤيێت وێ په‌يداكه‌ت و مه‌زاختنێ لێ بكه‌ت، له‌وا عه‌داله‌ت و دادپه‌روه‌رى دخوازيت ئه‌ڤه د به‌لاڤه‌كرنا ميراتيدا به‌رچاڤ بێته وه‌رگرتن، و ديسا كراسێت كچ تێدا دهێته ڤه‌گوهاستن كچێ بۆ دايكێ بۆ خويشكێ بۆ هه‌ڤژينێ و د هه‌ر كراسه‌كێدا پشك و باره‌كا هه‌ى، هه‌كه دايك بيت پشك و باره‌كا هه‌ى، و هه‌كه هه‌ڤژين بيت پشك و باره‌كا هه‌ى، و ئه‌گه‌ر خويشك بيت پشك و باره‌كا هه‌ى، و گه‌له‌ك جاران پشكا وێ هندى يا زه‌لاميه ده‌مێ ميراتى وه‌ردگريت: وه‌كى دايك دگه‌ل زه‌لامێ خۆ و كورێ وان عه‌ياله‌ك هه‌بيت هنگى باب و دايك دێ وه‌كى ئێك وه‌رگرن، خودێ مه‌زن دبێژيت:( وَلاًّبَوَيْهِ لِكُلِّ وَاحِدٍ مِّنْهُمَا السُّدُسُ مِمَّا تَرَكَ إِن كَانَ لَهُ وَلَدٌ) و ده‌يبابێت وي يێ مرى هه‌ر ئێكى شه‌شێك دگه‌هيتێ؛ ئه‌گه‌ر ئه‌وێ مرى زارِۆك هه‌بيت چ كورِ بن، چ كچ، خويشك و برايێت دايكێ هه‌كه برايێ وان مر و نه باب و نه عه‌يال پاش خۆ نه‌هێلابن هندى ئێك دگه‌هيتێ هه‌كه دوو بن ئانكو خويشكه‌ك و برايه‌ك بيت، و هه‌كه ژ دوويان پتر بن هه‌مى هه‌ڤپشكن وه‌كى ئێك د سێكا ميراتێ برايێ واندا، خودێ مه‌زن دبێژيت: (وَإِن كَانَ رَجُلٌ يُورَثُ كَلَالَةً أَو امْرَأَةٌ وَلَهُ أَخٌ أَوْ أُخْتٌ فَلِكُلِّ وَاحِدٍ مِّنْهُمَا السُّدُسُ فَإِن كَانُواْ أَكْثَرَ مِن ذالِكَ فَهُمْ شُرَكَآءُ فِى الثُّلُثِ) و ئه‌گه‌ر زه‌لامه‌ك يان ژنه‌ك بێ عه‌يال و بێ باب مه‌خسه‌د يا بێ دوينده‌ه و باب و باپير بيت مر، و برايه‌ك يان خويشكه‌كا ژ ده‌يكێ هه‌بيت شه‌شێك بۆ هه‌ر ئێكيه، و ئه‌گه‌ر ژ ئێكى پتر بن هه‌مى د سێكێدا د هه‌ڤپشكن، و هنده‌جاران نيڤا ميراتى بۆ ويه هه‌كه چو خويشك و برا دگه‌ل نه‌بن و ببيته ميراتخۆرێ بابێ خۆ (وَإِن كَانَتْ واحِدَةً فَلَهَا النّصْفُ) و ئه‌گه‌ر ميراتخۆر كچه‌ك ب تنێ بيت، نيڤا ميراتى بۆ وێيه، و د كراسه‌كێ ديدا پشكا وێ چارێكه‌كه هه‌كه بوو ميراتخۆرێ زه‌لامێ خۆ و زه‌لامێ وێ عه‌يال نه‌بن، هه‌كه عه‌يال هه‌بن پشكا وێ هه‌شتێكه (وَلَهُنَّ الرُّبُعُ مِمَّا تَرَكْتُمْ إِن لَّمْ يَكُنْ لَّكُمْ وَلَدٌ فَإِن كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُم) و ئه‌گه‌ر هه‌وه چو زارِۆك نه‌بن كورِ يان كچ، ژ وێ يان ژ ئێكا دى، چارێكا ميراتێ هه‌وه بۆ هه‌ڤسه‌رێت هه‌وه‌يه، و ئه‌گه‌ر هه‌وه زارِۆكه‌ك هه‌بيت هه‌شتێكا ميراتێ هه‌وه بۆ وانه و پشكا وێ نه‌ئێكه ژ ميراتێ د ناڤبه‌را چه‌ند پشكان دزڤريت دويف كراسێ ئه‌و تێدا (نيڤه يان سێكه يان چاريكه يان دوسێكه يان هه‌شتێكه يان هندى نيڤا يا برايه) و ئه‌ڤ گۆتنا دبێژيت: كچ يان ژن نيڤا كورى يان زه‌لامى وه‌ردگريت گۆتنه‌كا بێ وژدانه و ئه‌ڤه كراسه‌كه ژ كراسێت ميرات وه‌رگرتنێ، و ب راستى هه‌مى كراسێت ميرات وه‌رگرتنێ كو زۆر گه‌له‌كن د چار كراسان تنێدا ژن (چ كچ بيت يان هه‌ڤسه‌ر بيت يان دايك بيت) ئه‌و ژى ئه‌ڤه‌نه:
كراسێ ئێكێ: هه‌كه ئه‌وێ مرى كچ و كور هه‌ر دوو هه‌بن، هنگى كچ نيڤا كورى ژ ميراتێ دايكێ يان بابێ وه‌ردگرن ئه‌و ژى دويف گۆتنا خودێ: (يُوصِيكُمُ اللَّهُ فِى أَوْلَادِكُمْ لِلذَّكَرِ مِثْلُ حَظِ الاْنْثَيَيْنِ) د ده‌رهه‌قێ زارِۆكێت هه‌وه‌دا خودێ ب ڤى ره‌نگى فه‌رمانا هه‌وه دكه‌ت، هه‌كه هه‌وه كور و كچ پاش خۆ هێلان بارا كورِى ته‌مه‌تى بارا دوو كچانه.
كراسێ دووێ: هه‌كه ژن و مێر بوونه ميراتگرێت هه‌ڤدوو ئه‌و ژى دويف گۆتنا خودێ مه‌زن: (وَلَكُمْ نِصْفُ مَا تَرَكَ أَزْوَاجُكُمْ إِنْ لَّمْ يَكُنْ لَّهُنَّ وَلَدٌ فَإِن كَانَ لَهُنَّ وَلَدٌ فَلَكُمُ الرُّبُعُ مِمَّا تَرَكْنَ مِن بَعْدِ وَصِيَّةٍ يُوصِينَ بِهَآ أَوْ دَيْنٍ وَلَهُنَّ الرُّبُعُ مِمَّا تَرَكْتُمْ إِن لَّمْ يَكُنْ لَّكُمْ وَلَدٌ فَإِن كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُم مِّن بَعْدِ وَصِيَّةٍ تُوصُونَ بِهَآ أَوْ دَيْنٍ) و نيڤا ميراتێ ژنێت هه‌ڤسه‌رێت هه‌وه هێلايى بۆ هه‌وه‌يه پشتى مرنێ ئه‌گه‌ر وان چو زارِۆك كورِ يان كچ نه‌بن نه ژ هه‌وه، و نه ژ چو زه‌لامێت دى و ئه‌گه‌ر وان زارِۆكه‌ك هه‌بيت، چارێكه‌ك ژ ميراتێ وان هێلايى بۆ هه‌وه‌يه هه‌لبه‌ت پشتى جهئينانا وه‌سيه‌تا كرى و ده‌رئێخستنا قه‌ر و ده‌ينان و ئه‌گه‌ر هه‌وه چو زارِۆك نه‌بن كورِ يان كچ، ژ وێ يان ژ ئێكا دى، چارێكا ميراتێ هه‌وه بۆ هه‌ڤسه‌رێت هه‌وه‌يه، و ئه‌گه‌ر هه‌وه زارِۆكه‌ك هه‌بيت هه‌شتێكا ميراتێ هه‌وه بۆ وانه، پشتى جهئينانا وه‌سيه‌تا هه‌وه كرى و ده‌رێخستنا قه‌ران.
كراسێ سيێ: هه‌كه دايك و باب بوونه ميراتگرێت كورێ خۆ و كورێ وان عه‌يال نه‌بن، باب دوو سێكان وه‌ردگريت و دايك سێكه‌كێ ئه‌و ژى دويف گۆتنا خودێ: (وَلاًّبَوَيْهِ لِكُلِّ وَاحِدٍ مِّنْهُمَا السُّدُسُ مِمَّا تَرَكَ إِن كَانَ لَهُ وَلَدٌ فَإِن لَّمْ يَكُنْ لَّهُ وَلَدٌ وَوَرِثَهُ أَبَوَاهُ فَلاٌّ مِّهِ الثُّلُثُ) و ده‌يبابێت وي يێ مرى هه‌ر ئێكى شه‌شێك دگه‌هيتێ؛ ئه‌گه‌ر ئه‌وێ مرى زارِۆك هه‌بيت چ كورِ بن، چ كچ و ئه‌گه‌ر چو زارِۆك چ كورِ، چ كچ نه‌بن و ده‌يبابێت وى بوونه ميراتخۆرێت وى، سێك بۆ ده‌يكا ويه.
كراسێ چارێ: هه‌كه ميراتگر باب و كچ و دايك بن.. نيڤ بۆ كچێيه، سێك بۆ بابێيه و شه‌شێك بۆ دايكێيه، دگه‌ل هندێ ژى هه‌ژيه بێژين كچ كو نه‌ڤيه پتر ژ باپيرێ خۆ وه‌ردگريت.
به‌لێ به‌رامبه‌ر ڤان چار كراسان ئه‌وێت ژن تێدا نيڤا زه‌لامى وه‌ردگريت د ده‌ه كراسێت ديدا هندى زه‌لامى وه‌ردگريت (ئانكو دووجار و نيڤان هندى كراسێت نيڤا زه‌لامى وه‌ردگريت):
كراسێ ئێكێ: هه‌كه ژنه‌ك يان زه‌لامه‌ك مر و خويشكه‌ك و برايه‌كێ دايكێ پاش خۆ هێلان و عه‌يال و باب نه‌بن هه‌رئێك ژ وان شه‌شێك دگه‌هيتێ دويف گۆتنا خودێ: (وَإِن كَانَ رَجُلٌ يُورَثُ كَلَالَةً أَو امْرَأَةٌ وَلَهُ أَخٌ أَوْ أُخْتٌ فَلِكُلِّ وَاحِدٍ مِّنْهُمَا السُّدُسُ) و ئه‌گه‌ر زه‌لامه‌ك يان ژنه‌ك بێ عه‌يال و بێ باب ـ مه‌خسه‌د بێ دوينده‌ه و باب و باپير بيت ـ مر، و برايه‌ك يان خويشكه‌كا ژ ده‌يكێ هه‌بيت.. شه‌شێك بۆ هه‌ر ئێكيه.
كراسێ دووێ: هه‌كه ژنه‌ك يان زه‌لامه‌ك مر و پتر ژ خويشك و برايه‌كێ دايكێ پاش خۆ هێلان و عه‌يال و باب نه‌بن هه‌مى وه‌كى ئێك كچ و كور هه‌ڤپشكن د سێكێدا دويف گۆتنا خودێ: (فَإِن كَانُواْ أَكْثَرَ مِن ذالِكَ فَهُمْ شُرَكَآءُ فِى الثُّلُثِ) و ئه‌گه‌ر زه‌لامه‌ك يان ژنه‌ك بێ عه‌يال و بێ باب ـ مه‌خسه‌د يا بێ دوينده‌ه و باب و باپير بيت ـ مر، و پتر ژ دوو خويشك و برايێت دايكێ هه‌بن هه‌مى د سێكێدا د هه‌ڤپشكن.
كراسێ سيێ: هه‌كه دايك و باب بوونه ميراتگرێت كورێ خۆ و كورێ وان كور و كچ هه‌بن.. هه‌رئێكى وه‌كى ئێك شه‌شێك دگه‌هيتێ، هه‌روه‌كى گۆتنا خودێ هۆسا هاتى: (وَلاًّبَوَيْهِ لِكُلِّ وَاحِدٍ مِّنْهُمَا السُّدُسُ مِمَّا تَرَكَ إِن كَانَ لَهُ وَلَدٌ) و ده‌يبابێت وي يێ مرى هه‌ر ئێكى شه‌شێك دگه‌هيتێ؛ ئه‌گه‌ر ئه‌وێ مرى زارِۆك هه‌بن چ كورِ بن، چ كچ.
كراسێ چارآ: هه‌كه ژنه‌ك بمريت و زه‌لامى و خويشكه‌كا دايبابى پاش خۆ بهێليت، هه‌رئێك ژ وان نيڤ دگه‌هيتێ وه‌كى ئێك.
كراسێ پێنجێ: هه‌كه ژنه‌ك بمريت خويشكه‌كا بابێ پاش خۆ بهێليت هه‌رئێك ژ وان نيڤ دگه‌هيتێ وه‌كى ئێك.
كراسێ شه‌شێ: هه‌كه ژنه‌ك بمريت و زه‌لامێ خۆ و دايكا خۆ و خويشكا خۆ يا دايبابى پاش خۆ بهێليت، نيڤ دگه‌هيته زه‌لامى و نيڤ دگه‌هيته دايكێ.
كراسێ حه‌فتێ: هه‌كه ژنه‌ك بمريت و زه‌لامێ خۆ و خويشكه‌كا دايبابى و خويشك و برايه‌كێ دايكێ پاش خۆ بهێليت، نيڤ بۆ زه‌لاميه و نيڤ بۆ خويشكا دايبابيه و يێت دى د زرِبارن.
كراسێ هه‌شتێ: هه‌كه زه‌لامه‌ك مر و ژنه‌ك و دوو كچ و دايك و باب پاش خۆ هێلان، شه‌شێك بۆ بابێيه و شه‌شێك بۆ دايكێيه و هه‌ر كچه‌كێ سێكه‌كه هه‌ژيه بێژين كچ ل ڤێرێ پتر ژ باپيرى وه‌ردگريت.
كراسێ نه‌هێ: هه‌كه زه‌لامه‌ك مر و ژنه‌ك و دوو كچ و دايك و باب پاش خۆ هێلان، ميرات دبيته بيست و حه‌فت پشك، سێ پشك دگه‌هنه ژنێ و شازده پشك دگه‌هنه كچان هه‌ر ئێكێ هه‌شت پشك و دايك و بابان وه‌كى ئێك هه‌ر ئێكێ چار پشك دگه‌هنێ، ديسا هه‌ژيه بێژين: د ڤى كراسيدا كچ دوو جار هندى باپيرێ خۆ وه‌ردگرن.
كراسێ ده‌هێ: هه‌كه زه‌لامه‌ك مر و دايكه‌ك و خويشكه‌ك و باپيره‌ك پاش خۆ هێلان، سێك بۆ دايكێيه و سێك بۆ باپيرى و يێ مايى بۆ خويشكێيه، ئانكو هه‌مى وه‌كى ئێك وه‌ردگرن.
و د پازده كراسێت ديدا كچ پتر ژ زه‌لامى وه‌ردگريت، بۆ نموونه: دوو سێ كراسان دێ دياركه‌ين ژبلى وان ئه‌ڤێت به‌رى نوكه دگه‌ل مه بۆرين:
نموونا ئێكێ: هه‌كه زه‌لامه‌ك مر و دايك و دوو كچ و برايه‌ك پاش خۆ هێلان، دوو پشك دگه‌هنه دايكێ و هه‌ر كچه‌كێ چار پشك دگه‌هنێ و براى دوو پشك ب تنێ دگه‌هنێ. به‌رێ خۆ بدآ هه‌ر كچه‌ك دوو جار هندى مامێ خۆ وه‌ردگرن.
نموونا سيێ: هه‌كه زه‌لامه‌ك مر و دوو كچ و باب و دايك پاش خۆ هێلان، ميراتێ وى دبيته دوازده پشك: دوو دگه‌هنه دايكێ و دوو دگه‌هنه بابێ وه‌كى ئێك و كچان هه‌شت پشك دگه‌هنێ هه‌ر ئێكى چار پشك، ئانكو هه‌ر ئێك دوو جار هندى باپيرێ خۆ وه‌ردگريت.
و هنده كراسێـت هه‌ين ميرات دگه‌هيته ژنێ و زه‌لامى چو ناگه‌هيتێ، وه‌كى هه‌كه ژنه‌ك مر و زه‌لام و خويشكه‌كا دايبابى و خويشك و برايه‌كێ دايكێ پاش خۆ هێلان، نيڤا ميراتێ وێ بۆ زه‌لاميه و نيڤ بۆ خويشكا دايبابيه و چو ناگه‌هيته خويشك و برايێ دايكێ.
د ڤان رۆنكرنێت كورت يێت بۆريدا بۆ مه باش و باش و ب ره‌نگه‌كێ گۆمانبر دياربوو ئاخفتنا ڤه‌كرى دهێته گۆتن پشكا ژنێ د ئيسلامێدا ژ ميرات وه‌رگرتنێ نيڤ پشكا زه‌لاميه ئاخفتنه‌كا خه‌له‌ت و بێ وژدان و يا زالم و سته‌مداره، و هه‌كه ڤه‌كۆله‌ر و تويژاندنكار هه‌مى سيسته‌مان بخوينن و ڤه‌كۆلن ئه‌و چو سيسته‌مێت وه‌كى ئيسلامێ عادل و دادپه‌روه‌ر نابينن د لێكڤه‌كرنا ميراتيدا، چاوه نه و چێكه‌رێ مه چێكه‌رێ ژن و مێران ئه‌و سيسته‌م يێ دانايى و ئه‌و د قورئانا خۆ يا پيرۆزدا پشتى كۆمه‌كا پشك و باران دياركرى دبێژيت: (ءَابَآؤُكُمْ وَأَبناؤُكُمْ لاَ تَدْرُونَ أَيُّهُمْ أَقْرَبُ لَكُمْ نَفْعاً فَرِيضَةً مِّنَ اللَّهِ إِنَّ اللَّهَ كَانَ عَلِيماً حَكِيماً) بابێت هه‌وه و زارِۆكێت هه‌وه، هوين نوزانن كى ژ وان پتر د خێرا هه‌وه‌دايه، ژبه‌ر هندێ خودێ هه‌ر ئێكى پشك و بارێت وى دياركرن، ئه‌ڤ ئه‌ركه ژ به‌رێ خودێڤه ل سه‌ر هه‌وه هاته دانان، ب راستى خودێ يێ زانا و كار بنه‌جهه. و دويماهيكا ئايه‌تا ميراتێ ژن و مێراندا دبێژيت: (وَصِيَّةً مِّنَ اللَّهِ وَاللَّهُ عَلِيمٌ حَلِيمٌ) ئه‌ڤه فه‌رمانه ژ خودێ، و خودێ زانا و حه‌ليمه، و خودێ چێتر دزانيت.
