ب / دويفچۆنا به‌لگه و ده‌ق و فه‌رمان و حوكمان بێ گۆمان ديار دبيت خودايێ مه‌زن چو حوكم و فه‌رمان نه‌داينه هه‌كه بۆ ئينانا خێرێ و پاشڤه‌برنا خرابيێ نه‌بيت، ڤێجا ئه‌ڤ فه‌رمانه د چ بواردا بيت يێ عيباداتا يان د هه‌ڤكارياندا بيت ڤێجا مه باوه‌ريا موكم يا هه‌ى ده‌مێ ئيسلامێ به‌ردان كريه د ده‌ستێ زه‌لاميدا و ماف دايه وى ژبۆ حيكمه‌ت و نهێنيه‌كا خێرێيه، و ئه‌ڤ خێره بۆ هه‌ردوويان دزڤريت زه‌لامى و ژنێ؛ نه زه‌لامى ب تنێ، و دبيت ئه‌م ڤێ نهێنيێ و حيكمه‌تێ بزانين و دبيت ئه‌م نه‌زانين، به‌لێ دڤێت مه باوه‌رى هه‌بيت چو فه‌رمان د بێ حيكمه‌ت و نهێنى نينن و دبيت نهێنيا مافداركرنا زه‌لامى تنێ ب به‌ردانێ بزڤريته ڤان ئه‌گه‌رێت خوارێ:
ئێك: خودێ مه‌زن رێڤه‌برنا ژيانا هه‌ڤژينيێ كريه د ستۆيێ كێدا و كى ژێ به‌رپرسياركريه، زه‌لام يێ ژێ به‌رپرسياركرى و دڤێت ئه‌و ب رێڤه‌برنا مالێ رابيت. خودێ مه‌زن دبێژيت: (الرِّجَالُ قَوَّامُونَ عَلَى النِّسَآءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَآ أَنفَقُواْ مِنْ أَمْوَالِهِمْ فَالصَّالِحَاتُ قَانِتَاتٌ حَفِظَاتٌ لِّلْغَيْبِ بِمَا حَفِظَ اللَّهُ) زه‌لام سه‌ركار و سه‌رپه‌رشتێت كار و بارێت ژنانه، ئانكو: دڤێت ئه‌و ل به‌ر خزمه‌تا وان بن و ب كار و بارێت وان رابن ژبه‌ر كو خودێ هنده‌ك ب سه‌ر هنده‌كان ئێخستينه، و ژبه‌ر كو زه‌لام مالێ خۆ د به‌ر واندا دمه‌زێخن، ڤێجا ژنێت چاك و كار راست و گوهدارێت خودێ و زه‌لامێت خۆنه و ب ئه‌ركێ خۆ رادبن د راستا خودێدا، و پاشى د راستا زه‌لامێت خۆدا بۆ مال و نامويسا زه‌لامێت خۆ د پشت ويرِا، ب هاريكاريا خودێ پارێزه‌رن و ئه‌ڤ چه‌نده پتر دخوازيت به‌ردان د ده‌ستێ زه‌لاميدا بيت.
دوو: به‌ردان ب خۆ گه‌له‌كا ب ترسه و ئه‌نجامێت وێ ب ترسن، چونكى دبيته ئه‌گه‌رێ تێكدانا ژيانا هه‌ڤژينيێ و ماره‌كرن دهه‌لوه‌شيت و بچويك و زارۆك د ناڤبه‌را دايك و باباندا به‌رزه و په‌ريشان دبن، ژبه‌ر هندێ نابيت له‌ز لێ بێته‌كرن، و هه‌تا بريارا به‌ردانێ بێته دان دڤێت هزره‌كا كوير و دوير د ئه‌نجام و شوينوارێت وێدا بێته‌كرن، و له‌زكرن ژ سروشتێ مرۆڤيه و زوى كه‌ربگرتنا ويه و ئاريانا هه‌ستا ويه ده‌مێ به‌رهنگارى هه‌ڤرِكى و كه‌ربێ دبيت، و هه‌كه زه‌لام و ژن هه‌ردوو د ڤان ره‌وشت و ره‌وشاندا د هه‌ڤپشك بن به‌لێ يا به‌رچاڤ زه‌لام پتر ژ ژنێ دشێت بێهنا خۆ فره‌هكه‌ت و خۆ ل به‌ر بگريت و ژ سروشتێ خۆ نه‌ده‌ركه‌ڤيت و هه‌ستێ خۆ ده‌سته‌سه‌ركه‌ت و له‌زێ ل به‌ردانێ نه‌كه‌ت و بريارا به‌ردانێ نه‌ده‌ت و ژبه‌ر ڤێ مافێ ته‌لاقێ بۆ وى بێته‌دان يێ بێهن فره‌هى پتر هه‌ى دا له‌ز ل ته‌لاق و به‌ردانێ نه‌هێته‌كرن دورستتر و دادپه‌روه‌ريتره.
سێ: ته‌لاق و به‌ردان باره‌كێ به‌رپرسيا مالى دئێخيته ستۆيێ زه‌لامى، ئێك: دڤێت مارێ بده‌ت، دوو: دڤێت نه‌فه‌قێ عيددێ بده‌ت و كريا دادۆكى و دايينه‌كێ بده‌ت هه‌كه بچويكێت ب شير هه‌بن. ئه‌ڤه هه‌مى زه‌لامى پال دده‌ن ده‌ه جاركى هزرا خۆ بكه‌ت به‌رى په‌نابرنێ ببه‌ته به‌ردانێ ئه‌ڤ چه‌نده ژى دخوازيت به‌ردان د ده‌ستێ ويدا بيت نه‌يێ ژنێ.
چار: دگه‌ل ئه‌ڤا بۆرى ژى، دانا مافێ به‌ردانێ بۆ زه‌لامى وێ ناگه‌هينيت رێكێت خۆرزگاركرنێ به‌رامبه‌ر ژنێ د گرتينه، هه‌كه زيان گه‌هشتێ و زه‌لامێ وێ نه‌خۆشى گه‌هاندنێ دشێت رێكا دادگه‌هێ بگريت و ژ دادوه‌رى بخوازيت ژ زه‌لامێ وێ رزگاركه‌ت، هنگى دێ گوهدانا وێ هێته‌كرن و هه‌كه بۆ دادوه‌رى ديار بوو يا سته‌ملێكريه دێ جابا زه‌لامێ وێ هنێريت يان دێ وێ زيان و سته‌مێ راگرن و سۆزێ ده‌ت لێ نازڤريته‌ڤه يان دادوه‌ر دێ وان ژێكڤه‌كه‌ت زه‌لامى بڤێت يان نه‌ڤێت.
پێنج: رێكا دى يا ماف پاراستنێ: هه‌كه هه‌ر ژ ده‌ستپێكێ ژ سته‌م و زولما زه‌لامى بترسيت بۆ هه‌يه هه‌روه‌كى هنده زانا دبێژن ئه‌و د گرێبه‌ستا ماره‌كرنێدا ل سه‌ر زه‌لامى مه‌رج بكه‌ت به‌ردانا وێ دێ د ده‌ستێ وێدا بيت، هه‌كه د ماره‌كرنێدا زه‌لام ب ڤى مه‌رجى رازى بوو هنگى دێ ژ ده‌ستێ زه‌لامى ده‌ركه‌ڤيت و كه‌ڤيته د ده‌ستێ وێدا، و خودێ چێتر دزانيت.
