ب / ب راستى زۆردارى و سته‌مه‌كا مه‌زن ل ژنێ دهێته‌كرن، و مخابن ب ناڤێ دينى و دين ژ ڤێ چه‌ندێ دوير و به‌ريه، و زه‌لام وه‌سا هزردكه‌ن و خۆ تێدگه‌هينن ئه‌ڤه مافه‌كه خودێ يێ دايێ و ئه‌ڤه ئيسلامه، نه‌خێر ئه‌ڤه نه‌ئيسلامه و مافێ زه‌لامى نينه هندى سه‌رێ ده‌رزيكێ ژى خورتى و سته‌مێ ل خێزانا خۆ بكه‌ت، ئه‌و زه‌لامێ ب ڤى ره‌نگى دوو گونه‌هان دكه‌ت، ئێك: ده‌مێ سته‌م و زۆرداريێ دكه‌ت، دوو: ده‌مێ ڤێ زۆرداريێ بۆ خۆ دورست دكه‌ت و مافه‌كێ شه‌رعى بۆ خۆ ددانيت، و دڤێت زه‌لام بزانيت خودێ مه‌زن ل دۆر ترازيا مافان دبێژيت: (ولهن مثل الذي عليهن بالمعروف) راسته دويفرِا خودێ مه‌زن دبێژيت: (وللرجال عليهن درجة) به‌لێ دڤێت ئه‌م تێبگه‌هين ئه‌و ده‌رجه چيه دا خه‌له‌ت نه‌بين. دويف بۆچۆنا ب هێزتر ئه‌و ده‌رجه قه‌وام و رێڤه‌برنه هه‌روه‌كى د سۆره‌تا نيسائدا هاتى: (الرّجَالُ قَوَّامُونَ عَلَى النّسَاء بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوالِهِمْ) زه‌لام سه‌ركار و سه‌رپه‌رشتێت كاروبارێت ژنانه، ئانكو دڤێت ئه‌و ل به‌ر خزمه‌تا وان بن و ب كاروبارێت وان رابن ژبه‌ر كو خودێ هنده‌ك ب سه‌ر هنده‌كان ئێخستينه، و ژبه‌ر كو زه‌لام مالێ خۆ د به‌ر واندا دمه‌زێخن. ئها ئه‌ڤه‌يه ئه‌و ده‌رجه، دگه‌ل كو هنده زه‌لام ڤێ ده‌ره‌جێ خه‌له‌ت تێدگه‌هن، دگه‌ل هندێ ژى دكه‌نه گه‌له‌ك ده‌رجه نه ده‌رجه‌ك ب تنێ، و قورئانا پيرۆز بۆ مه ديار دكه‌ت كا چاوا زه‌لامى ماف ل سه‌ر ژنێ هه‌يه هه‌روه‌سا ژنێ ژى ماف يێ ل سه‌ر زه‌لامى هه‌ى وه‌كى ئێك، و هۆسا دڤێت هه‌ردوو بزانن ژن و زه‌لام هه‌كه هنده ماف هه‌بن ئه‌و ژى به‌رامبه‌ر ئه‌ركانه د راستا يێ ديدا، هه‌كه ئه‌و ئه‌رك ب جه نه‌ئينان بۆ نينه مافان بخوازيت، ماف به‌رامبه‌ر ئه‌ركانه، هنگى دێ خه‌له‌تى رويده‌ت هه‌كه چاڤێت هه‌ردووكان ل سه‌ر مافان د زل بن، و ل سه‌ر ئه‌ركان د نقياي بن، و هه‌كه د هشيار بن ل سه‌ر مافان و پشتا خۆ بده‌نه ئه‌ركان، و هه‌كه هزرا خۆ د مافاندا بكه‌ن و هزرا خۆ د ئه‌ركاندا نه‌كه‌ن، و هه‌كه هه‌رئێكى به‌رێ وى ل مافێ وى ب تنێ بيت و به‌رێ خۆ نه‌ده‌ته مافێ يێ به‌رامبه‌ر، ئها باراپتر خه‌له‌تيا زه‌لامى يان يا ژنێ ل ڤێرێيه ده‌مێ ـ چ ژن چ مێر ـ به‌رێ وى ل مافێ وى و چاڤه‌رێى مافێ خۆ، و چو هزرێ بۆ ئه‌ركێ خۆ نه‌كه‌ت به‌رامبه‌ر هه‌ڤژينا خۆ، و فه‌ره زه‌لام بزانيت ژنێ دوو ره‌نگێت مافان ل سه‌ر وى يێت هه‌ين، مافێ ماددى و يێ ده‌روونى. گه‌له‌ك جاران زه‌لام چاڤێ خۆ ل مافێ دووێ دنقينن و دبيت ئه‌و گه‌له‌ك ب بهاتر بيت و دبێژيته ژنا خۆ: كا بێژه كا چ قوسيرى و كێماسى ل ته‌يه! زێر من بۆ ته نه‌كرينه! جلكێت ته د كێمن! خوارنا ته يا كێمه! ته پاره نينن! هه‌روكى ماف به‌س ئه‌ڤه‌نه، و هه‌كه ئه‌ڤه بۆ ژنێ به‌رده‌ستكرن ئه‌ڤه وى هه‌مى مافێت وێ دانێ، و دبيت ژ لايێ ده‌روونيڤه هيچ دلۆڤانيێ پێ نابه‌ت و به‌رده‌وام دئێشينيت و سه‌ره‌ده‌ريێ دگه‌ل ناكه‌ت هه‌روه‌كى ئه‌و مرۆڤ و خودان هه‌ست و هاى و چاڤدێريا هه‌ستێت وێ يێت ده‌روونى د بنيرِا ناكه‌ت و نوزانيت ژن له‌ش و گيانه و كا چاوا له‌شى پێدڤيێت خۆ هه‌نه ژ خوارن و ڤه‌خوارن و جلكان، هۆسا گيان و روحا وێ ژى پێدڤيێت خۆ هه‌نه و دڤێت به‌رچاڤ بێنه وه‌رگرتن، و هنديكه مرۆڤه ب گيان و روحێ مرۆڤه نه ب له‌شى تنێ، هه‌روه‌كى هۆزانڤان دبێژيت: (فانت بالنفس لا بالجسم انسان)، و ئه‌ڤه خه‌له‌تيا گه‌له‌ك زه‌لامانه، هزر دكه‌ن ماف به‌س يێ د جه و خوارن و ڤه‌خوارن و جلكيدا، هه‌كه ئه‌ڤه د به‌رده‌ست بن ژنێ چو ماف ل سه‌ر نه‌ما، و خه‌ما دلره‌حه‌تى و ئاراميا وێ يا ده‌روونى ناخۆت، و ئه‌ڤه يا خه‌له‌ته و نه‌يا دورسته، و تشتێ ژ هه‌ميان سه‌ره‌كيتر د هه‌ڤژينيێدا دڤێت هه‌بيت.. دلره‌حه‌تى و ڤه‌هسيان و ئاراميا ده‌روونيه، له‌وا خودێ مه‌زن دبێژيت: (وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُواْ إِلَيْهَا وَجَعَلَ بَيْنَكُم مَّوَدَّةً وَرَحْمَةً) و ژ نيشانێت مه‌زناتى و ده‌ستهه‌لاتداريا خودێ، ئه‌وه وى هه‌ر ژ هه‌وه ژ گيانێ هه‌وه بۆ هه‌وه هه‌ڤسه‌ر چێكرن، دا سه‌بر و هه‌دارا هه‌وه پێ بێت، و ل ده‌ف ڤه‌هه‌سن و ڤيان و دلۆڤانى ئێخسته د ناڤبه‌را هه‌وه‌دا، ب راستى ئه‌ڤه دان و چێكرنا هه‌ڤسه‌ران هۆسا نيشانێت ئاشكه‌رانه ل سه‌ر مه‌زناتى و ده‌ستهه‌لاتداريا خودێ بۆ وان ئه‌وێت هزرا خۆ تێدا دكه‌ن. به‌لێ خودێ ژن و مێر ژ ئێك كه‌س ب تنێ چێكرين، و هه‌ڤسه‌را وى ژى ژێ چێكر، دا بێن و سه‌برا وى پێ بێت و ل ده‌ف ڤه‌هه‌سيێت، ئها ب راستى ئارماجا سه‌ركى يا هه‌ڤژينيێ و شه‌نگست و بناغه و بنياتێ سه‌ره‌كى ژ ژيانا هه‌ڤسه‌ريێ ئه‌ڤه‌يه.. سه‌كه‌ن و دلره‌حه‌تى و ئارامي و ڤه‌هسيان و ڤيان و حه‌ژێكرنه، كورت و كرمانج ماف هنگى دهێنه پاراستن هه‌كه هه‌ڤسه‌نگى د ناڤبه‌را مافێت ماددى و ده‌روونيدا هاته‌كرن و هه‌ردوو پێكڤه هاتنه پاراستن و ژ هه‌ردوويان.
و هه‌كه ژنێ ژى مافێ زه‌لامى ل سه‌ر خۆ ديت به‌س خزمه‌تكرنه و وه‌كى خدامه‌كێ ب كاروبارێت وى رابيت و ژ لايێ ده‌روونيڤه به‌رچاڤ نه‌هاته وه‌رگرتن، هنگى وێ مافێ زه‌لامى ل سه‌ر خۆ نه‌راكر كا چاوا پێدڤيه زه‌لام رامانا مافان به‌رته‌نگ نه‌كه‌ته د خوارن و ڤه‌خوارنێدا، هۆسا ژن ژى دڤێت مافێ زه‌لامى كۆم نه‌كه‌ته د خزمه‌تكرنێدا و به‌س، هه‌ردووكان مافێت ده‌رونى و ماددى ل سه‌رئێك يێت هه‌ين و دڤێت هه‌رلايه‌كى مافێ وى بده‌تێ، و خودێ چێتر دزانيت.
