ب / ئيسلامێ.. بۆ رێزگرتن و قه‌در و بهايه‌كێ تايبه‌ت بۆ ژنێ، ل سه‌ر نه‌دانايه كارێ ده‌رڤه‌ى مالێ بكه‌ت، به‌لێ ئه‌ڤه هندێ ناگه‌هينيت حه‌رامه ئه‌و ده‌ركه‌ڤيت و پشكداريێ د پێشخستن و ئاڤاكرنا جڤاكيدا بكه‌ت، و هه‌رگاڤا مه‌رجێت شه‌رعى به‌رچاڤ هاتنه وه‌رگرتن دورسته ژن بۆ كارێ دويف سروشتێ وێ دهێت و پێدڤيێت ڤى چه‌رخى دخوازن ده‌ركه‌ڤيت، و ئه‌و مه‌رج ژى ئه‌ڤه‌نه:
ئێك: ئه‌و كارێ بۆ ده‌ركه‌ڤيت يێ حه‌لال بيت و حه‌رامى تێدا نه‌بيت.
دوو: پێگريێ ب جلكێ خۆ يێ شه‌رعى بكه‌ت و مه‌رجێت جلكى هه‌ميان ب جه بينيت.
سێ: ئاوايێ رێڤه‌چۆنا وى يا ئاسايى بيت و نه‌بيته ئه‌گه‌رێ چاڤزڤراندنێ، هه‌روه‌كى خودێ مه‌زن دبێژيت: (وَقَرْنَ فِى بُيُوتِكُنَّ وَلاَ تَبَرَّجْنَ تَبَرُّجَ الْجَاهِلِيَّةِ الاٍّ ولَى) و جوانيا خۆ ئاشكه‌را نه‌كه‌ن وه‌كى ئاشكه‌راكرنا سه‌ر وه‌ختێ نه‌زانينا به‌رێ ب رێڤه‌چۆنه‌كا شكه‌ستن و خوار و ڤيچى و نازدارى تێدا، و ديسا هه‌ر ل سه‌ر ڤى بابه‌تى دبێژيت : (وَلاَ يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ) و بلا پێت خۆ ل عه‌ردى نه‌ده‌ن، دا چه‌كێ خۆ يێ ڤه‌شارتى حنجۆلێت پيان ئاشكه‌را بكه‌ن، ئانكو: رێڤه‌چۆنا وێ يا وه‌سا نه‌بيت بێژته غه‌يرى خۆ به‌رێ خۆ بده‌نه من.
چار: دڤێت ئاوايێ ئاخفتنێ به‌رچاڤ وه‌رگريت و نازك و نازداري دگه‌ل زه‌لامان نه‌ئاخڤيت، چونكى ئاخفتنا نازك و نازدارى تێدا نامێت خه‌له‌ت بۆ يێ به‌رامبه‌ر دهنێريت و شه‌يتان دلێ وى خه‌له‌ت دكه‌ت و د به‌ر خه‌له‌تيێرِا دبه‌ت، خودێ مه‌زن دبێژيت: (يانِسَآءَ النَّبِىِّ لَسْتُنَّ كَأَحَدٍ مِّنَ النِّسَآءِ إِنِ اتَّقَيْتُنَّ فَلاَ تَخْضَعْنَ بِالْقَوْلِ فَيَطْمَعَ الَّذِى فِى قَلْبِهِ مَرَضٌ وَقُلْنَ قَوْلاً مَّعْرُوفاً) ئانكو: گه‌لى ژنێت پێغه‌مبه‌رى هوين نه‌وه‌كى چو ژنێت دينه، ئه‌گه‌ر هوين ته‌قوايا خودێ بكه‌ن، ڤێجا ئاخفتنا خۆ ب نازكى نه‌كه‌ن وه‌ختێ هوين دگه‌ل زه‌لامان دئاخڤن، دا ئه‌وێ نه‌ساخى و خرابى د دليدا هه‌ى ته‌مايى نه‌كه‌فته دلى، و ئاخفتنه‌كا عه‌ده‌تى باخڤن.
مه‌رجێ پێنجێ: هند ئاخفتنێ دگه‌ل زه‌لامى بكه‌ت هندى هه‌وجه‌يى دخوازيت و پێدڤى و زێده‌تر نه، و دڤێت ئه‌م بزانين باراپتر ژ خه‌له‌تيێت د ناڤبه‌را ژن و زه‌لاماندا روى دده‌ن ب رێيا ميانه‌تا زێده‌يه و ئاخفتنا درێژيێ دده‌ته خۆ د ناڤبه‌را واندا و يا سوحبه‌ته‌ك دكێشيته سوحبه‌ته‌كا دى و هه‌وجه‌يى بۆ نه‌ى.
مه‌رجێ شه‌شێ: چاڤگرتنه ژ به‌رێخۆدانا حه‌رام و نه‌دورست، هه‌كه ئه‌ڤ مه‌رجه به‌رچاڤ هاتنه وه‌رگرتن و ژنێ پێگرى پێ كر.. بۆ هه‌يه ده‌ركه‌ڤيت بۆ وى كارێ وێ بڤێت، و خودێ چێتر دزانيت.
