ب / ئه‌ڤ دايكا ب ڤى ره‌نگى ب ئه‌ركێ دايكينيێ نارابيت، و بلا بزانيت زارۆك ئه‌مانه‌تن د ستۆيێ دايباباندا، و دڤێت ڤى ئه‌مانه‌تى باش بپارێزن، هه‌كه رۆژا قيامه‌تێ دێ ژێرپسيار بن و حسێب دێ دگه‌ل هێته‌كرن، و ژ پاراستنێيه سنج و تۆر و ئه‌خلاقێ وان بێته پاراستن، و دڤێت دايك پتر و تايبه‌تتر ژبابێ بزانيت كچ ئه‌مانه‌تن د ستۆيێ وێدا، كا چاوا دڤێت خه‌مێ ژ خوارن و ڤه‌خوارن و جلكێت وان بخۆت، دڤێت هۆسا به‌لكى هێژ پتر خه‌مێ ژ سنج و ئه‌خلاقێ وێ بخۆت، و خه‌ما وێ نه‌به‌س شويكرنا وێ بيت هه‌ما چاوا بيت باش بيت يان خراب، و باشه ما ئه‌و نابينيت ئه‌و گه‌نجێ ل كچا سه‌ربه‌ردايى و لنگ رويس دگه‌ريت كێرناهێت ئه‌و كچا خۆ بده‌تێ و بێخيته بن به‌خت و وژدانا وى، ئه‌رێ ئه‌ڤه‌يه دلپێڤه‌بوونا دايكێ بۆ وێ راده‌ستى مرۆڤه‌كى بكه‌ت رێكا خودێ نه‌زانيت. دايك خه‌ما شويكرنا كچا خۆ بخۆت كاره‌كێ زێده پيرۆزه، و ئه‌ڤه مه‌زنترين ئه‌ركێ وێيه به‌لێ خه‌ما دورست ئه‌وه راده‌ستى كه‌سێت موسلمان و خودێ ترس بكه‌ت، هه‌كه وه‌نه‌كر وێ ئه‌مانه‌ت نه‌پاراست، و بلا دايك بزانيت ئه‌وا كچێت خۆ نه‌چار دكه‌ت شوى ب بێ سنج و ئه‌خلاق و بێ دين و مه‌ى ڤه‌خۆران بكه‌ت، هه‌ر كارتێكرنا د دينێ وێدا چێدبيت گونه‌ه د ستۆيێ وێدايه، چونكى ئه‌و ئه‌گه‌رێ ڤێ چه‌ندێ بوو، و پێغه‌مبه‌ر سلاڤێت خودێ ل سه‌ربن دايبابان ئاراسته دكه‌ت بۆ كاره‌كێ به‌راهيێ د خێرا واندا پاشى د خێرا كچێت واندا، دبێژيت: (إذا جاءكم من ترضون دينه وخلقه فأنكحوه إلا تفعلوه تكن فتنة في الأرض وفساد عريض) گه‌لى دايبابان و سه‌ركارێت كچان.. هه‌كه ئه‌و هات كچێت هه‌وه بخوازيت يێ هوين ژ دين و ئه‌خلاقێ وى رازى بده‌نێ، و هه‌كه وه‌نه‌كه‌ن دێ به‌لا و خرابيه‌كا مه‌زن د عه‌رديدا چێبيت. هه‌ژيه بێژين پێغه‌مبه‌رى سلاڤێت خودێ ل سه‌ربن سێ جاران ئه‌ڤ ئاخفتنه دوباره‌كر.
و ئه‌ڤ دايكا نه‌هێليت كچا وێ ده‌رسۆكێ بكه‌تێ چونكى ئه‌و ناكه‌تێ؛ دا خه‌لك لۆمه‌ى وێ نه‌كه‌ت و بێژنێ كچا ته دكه‌تێ تو بۆچى ناكه‌يێ، دووجاركى بێ ئه‌مريا خودێ ده‌كت: جاره‌كێ د راستا خۆدا و جارا دووێ د راستا كچا خۆدا، و خودێ وێ دبێژيتێ: (ياأَيُّهَا الَّذِينَ ءَامَنُواْ قُواْ أَنفُسَكُمْ وَأَهْلِيكُمْ نَاراً وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلاَظٌ شِدَادٌ لاَّ يَعْصُونَ اللَّهَ مَآ أَمَرَهُمْ وَيَفْعَلُونَ مَا يُؤْمَرُونَ) گه‌لى خودان باوه‌ران خۆ و مالێت خۆ ژ ئاگره‌كى بپارێزن، داردوويێ وى مرۆڤ و به‌رن، هنده‌ك ملياكه‌تێت دلرِه‌ق و دژوار و ب هێز يێت ل سه‌ر، و ئه‌و ملياكه‌ت نه‌گوهداريا خودێ ناكه‌ن ل سه‌ر وى تشتێ ئه‌مرێ وان پێ هاتيه‌كرن، و وێ دكه‌ن يا ئه‌مرێ وان پێ دئێته‌كرن. ڤێجا بزانه دايكا قه‌له‌نده‌ر كچا ته د ستۆيێ ته‌دا ئه‌مانه‌ته و دڤێت بزانى كا دێ چاوا ڤى ئه‌مانه‌تى پارێزي، و رۆژا قيامه‌تێ دێ پسيار ژ ته د راستا وێدا هێته‌كرن كا ته چاوا ئه‌ڤ ئه‌مانه‌ته پاراست، و دڤێت رێكێت خه‌له‌ت و نه‌دورست نه‌ده‌يه به‌ر خۆ د راكرن و په‌روه‌رده‌كرنا وێدا و چاوا ل سه‌ر ته واجبه تو خۆ ب تاعه‌ت و گوهداريا خودێ خۆ ژ ئاگرێ جه‌هنه‌مێ بپارێزى هۆسا واجبه تو مالا خۆ و كچێت خۆ ژى ژ ئاگرێ جه‌هنه‌مێ بپارێزى، و مخابن نه ته ئه‌ڤه‌كر و نه ئه‌ڤه و ئيزايێ ته دێ يێ ستوير بيت.
و دويماهيێ ئه‌ز دبێژمه يا هۆسا: ما تو ناترسى خودێ د دنيايێدا ڤێ بۆ ته نه‌هێليت و ته ب وێ يا تو دكه‌ى بێشينيت، زه‌لامێ ته دويف كچه‌كێ بكه‌ڤيت و تو نه‌خۆشيێ ل سه‌ر نه‌خۆشيێ ببه‌ى، يان كورآ ته ژ مالا خۆ دويركه‌ڤيت دويف كچه‌كا وه‌كى ته كچا خۆ ل سه‌ر راكرى بكه‌ڤيت و ئه‌ڤه هه‌مى بۆ ته ببنه خه‌م و نه‌خۆشى، شه‌رِێ شه‌ريعه‌تێ خودێ نه‌كه و فه‌رمانا كچا خۆ بكه ئه‌مرێ خودێ ب جه بينيت، تو سه‌رناكه‌ڤى دێ باجا ڤى شه‌رِى ده‌ى.. ئه‌ڤرۆ نه سوبه‌هى، و خودێ چێتر دزانيت.
