ب / بێ گۆمان خودێ مه‌زن دێ به‌رێ خۆ ده‌ته دلان هه‌روه‌كى د حه‌ديسا دورستدا ل ده‌ف موسلمى ژ ئه‌بى هوره‌يره خودێ ژێ رازی بیت، هاتى: (إِنَّ الله لا يَنْظُرُ إِلى أَجْسامِكْم، وَلا إِلى صُوَرِكُمْ، وَلَكِنْ يَنْظُرُ إِلَى قُلُوبِكُمْ وَأَعمالِكُمْ) ب راستى خودايێ مه‌زن، به‌رێ خۆ نه دده‌ته له‌شێت هه‌وه و نه دده‌ته وێنه‌يێت هه‌وه ، به‌لێ دێ به‌رێ خۆ ده‌ته دلێت هه‌وه. و مه باوه‌ريا هه‌ى رۆژا قيامه‌تێ چو وه‌ج و مفايێ مرۆڤى ناده‌ت ژ مال و كه‌س و كاران ئه‌و نه‌بيت يێ ب دله‌كێ ساخله‌م بێته ده‌ف خودێ: (يَوْمَ لاَ يَنفَعُ مَالٌ وَلاَ بَنُونَ إِلاَّ مَنْ أَتَى اللَّهَ بِقَلْبٍ سَلِيمٍ) رۆژا كورِ و كچ و چو تشتێ دى فايده‌ى نه‌گه‌هينيته مرۆڤى، ژبلى كو مرۆڤ ب دله‌كێ ساخله‌م و دورست و ب باوه‌ر بچيته ده‌ف خودێ. راسته به‌س ئه‌ڤ دله دێ مفاى گه‌هينيته مه و خودێ دێ به‌رێ خۆ ده‌ته ڤى دلى، دلێ پاك و پاقژ و ساخله‌م و سپه‌هى و باوه‌ريدار، به‌لێ ئه‌ڤ ئاخفتنه دلێ پاقژ، و دلێ من يێ پاقژه په‌يڤه‌كه و شه‌هده‌ييه‌كه، گه‌له‌ك جاران مه گوه لێ دبيت ل ڤێرێ و وێراهه، و ژ ڤى و يێ دى، ژبه‌ر هندێ فه‌ره ئه‌م بزانين دلێ پاقژ و ساخله‌م كيژكه، ئه‌و دلێ رۆژا قيامه‌تێ سه‌رفه‌راز دبيت، ئه‌و دلێ له‌شێ خۆ دبه‌ته به‌حه‌شتێ، ئه‌ڤه ژى ل سه‌ر مه پێدڤى دكه‌ت، زڤرينه‌كێ د قورئانا پيرۆزدا بكه‌ين، دا بزانين دلێ پاقژ كيژكه و كا كى د شاده‌يى و گۆتنا خۆدا يێ راسته ده‌مێ دبێژيت: دلێ من يێ پاقژه، چونكى رۆژا قيامه‌تێ رۆژا هه‌مى ژ ئێك و دوو دره‌ڤن، رۆژا باب و كورِ و كچ و ده‌يك هه‌مى ژ ئێك دره‌ڤن، و كه‌س مايێ خۆ د كه‌سێ نه‌كه‌ت، و هه‌ر ئێك به‌س خه‌ما خۆ هه‌لدگريت، وێ رۆژا هه‌مى، چ ژن، چ زه‌لام، رويس و پێخاس و سه‌ركۆل ـ كا چه‌وا خودێ داينه ـ پێكڤه ل مه‌حشه‌رێ رادوه‌ستن، و دگه‌ل هندێ ژى كه‌سێ ئاگه‌ه ژ كه‌سێ نينه، و هه‌ر ئێك يێ ب خۆڤه مژويله، و سه‌رێ هه‌ميان يێ سه‌ر ئه‌ڤرازه، كانێ حسێبا وى دێ بيته چ؟ ئها وێ رۆژێ چو مفايى ناده‌ته مرۆڤى دله‌كێ پاقژ و ساخله‌م نه‌بيت.
ئه‌و رۆژا گونه‌هكار دبێژيت ـ پشتى ده‌فته‌را كار و كريارێت خۆ دبينيت و ب ده‌ستێ چه‌پێ وه‌ردگريت ـ وه‌ى هه‌وار خۆزى من چو ژ حسێبا خۆ نه‌زانيبا، خۆزى مرنا من يا ئێكجارى با، خۆزى ئه‌ز ژ گۆرێ خۆ نه‌راببامه‌ڤه، خۆزى من چو ژ خۆ نه‌زانيبا، خۆزى ئه‌ڤرۆ من كتێبا خۆ نه‌ديتبا، وه‌ى خۆلى ب سه‌رێ من وه‌ر، ئه‌ڤه چ ب سه‌رێ من هات، كانێ قه‌سر و قوسيرێت من، كانێ پارێت من، پانێ ئه‌ڤرۆ ئه‌ز يێ هه‌وجه‌مه، پانێ ئه‌ڤرۆ رۆژا ته‌نگاڤيێيه، مالێ من، كورسيكا من، ده‌ستهه‌لاتا من، ده‌وروبه‌رێت من مفا نه‌گه‌هانده من، ئها وێ رۆژێ چو فايدێ مرۆڤى ناده‌ت دله‌كێ پاقژ نه‌بيت.
ئه‌و رۆژا مرۆڤ ژ كه‌رباندا هه‌ردوو ده‌ستان پێكڤه دكه‌ته د ده‌ڤێ خۆدا و دبێژيت: وه‌ى هه‌وار خۆزى من تێكه‌لى و هه‌ڤالينيا بێڤانى نه‌كربا، خۆزى ئه‌ز دگه‌ل بێڤانى نه‌گه‌ريابام، خۆزى من رێكا پێغه‌مبه‌رى گرتبا و ئه‌ز دويف چۆبام، خۆزى من تێكه‌ليا وان كه‌سان كربا، ئه‌وێت رێكا پێغه‌مبه‌رى گرتين و دويف چۆين، ئها هنگى چو فايدێ مرۆڤى ناكه‌ت دله‌كێ پاقژ نه‌بيت.
و ژبه‌ر گرنگى و فه‌راتيا ڤێ پسيارێ.. ئه‌م دێ پيچه‌كێ ب درێژى ل سه‌ر ئاخڤين دا ديار ببيت كا ئه‌و ژنا خۆ په‌رده‌پۆش نه‌كه‌ت دلێ وآ يێ پاقژ و ساخله‌مه هه‌تا خۆ پشتراست ببينيت و خۆ ل پشت ڤێ ئاخفتنێ ـ شه‌رت دله و دلێ پاك و پاقژه ـ ڤه‌شێريت و خۆ په‌رده‌پۆش نه‌كه‌ت.
و كا دل يێ چاوايه و چ تێدايه تشته‌كێ نه‌يێ دياره، و خودێ دزانيت كا چ تێدايه، و يێ چاوايه، راسته ئه‌م چو ژ يا د دلاندا نوزانين، و يا د دلاندا به‌س خودايێ مه‌زن ب تنێ دزانيت، و ئه‌م به‌س يا سه‌رڤه و به‌رچاڤ ژ كار و كريارێت دلى دزانين، ڤێجا يا دلان به‌س خودێ دزانيت به‌لێ پاكى و پاقژى و ساخله‌ميا دلى د كار و كرياراندا ئاشكرا دبيت، و ئه‌ڤ كار و كرياره ل سه‌ر پاقژى و نه‌پاقژيا دلى دبنه شاهد، و دڤێت ئه‌و دياركه‌ت، كا دل يێ پاقژه ئان نه، دڤێت ده‌ستێت وێ بێژن راسته ئان نه؟ هه‌روه‌سا چاڤ و گوه و پێ و ئه‌زمان و هاتن و چۆن و هه‌لويست.
ل سه‌ر ڤێ چه‌ندێ (ميقدادێ كورِێ ئه‌سوه‌د)ى خودێ ژێ رازی بیت، دبێژيت: من گۆته پێغه‌مبه‌رى سلاڤێت خودێ ل سه‌ربن: ئه‌ى پێغه‌مبه‌رێ.. خودێ هه‌كه مرۆڤه‌كێ گاور هاته من و شه‌رِێ من كر، و ده‌ستێ من برِى، و ئه‌ز چۆمێ، و خۆ ل بن داره‌كێ ئاسێكر، و هه‌تا ئه‌ز گه‌هشتيمێ گۆت: (اشهد ان لا اله الا الله واشهد ان محمدا رسول الله) ئه‌رێ ئه‌ز بكوژم ئان نه؟! پێغه‌مبه‌رىسلاڤێت خودێ ل سه‌ربن گۆت: نه، ئينا من گۆت: ئه‌ى پێغه‌مبه‌رێ خودێ.. وى ده‌ستێ من يێ ژێڤه‌كرى؟! گۆت: بلا پشتى وێ شه‌هده‌دانێ و موسلمانبوونا وى، كا چه‌وا خوينا ته يا حه‌رامه بێته رشتن، ئها وه‌سا حه‌رامه خوينا وى ژى بێته رشتن. هه‌لبه‌ت بوخارى و موسلم ڤێ حه‌ديسێ ڤه‌دگێرن. و هه‌رچه‌نده دبيت ژ ترساندا ژى شه‌هده دابيت، به‌لێ دگه‌ل هندێ ژى ئه‌م به‌س دێ به‌رێ خۆ ده‌ينه يا به‌رچاڤ و ئاشكرا و حوكمى ل سه‌ر هندێ ده‌ين، بێ گۆمانه دلى ره‌نگڤه‌دانا خۆ و كارلێكرنا خۆ ل سه‌ر هه‌مى ئه‌ندام و كار و كريارێت مرۆڤى يا هه‌ى، و گه‌له‌ك نيشان بۆ دلێ پاقژ يێت هه‌ين، ده‌ستێ ته دڤێت ل دويف وێ بيت يا خودێ دڤێت، هه‌روه‌سا ئه‌زمانێ ته، دڤێت ل دويف هندێ بيت ئه‌ڤا خودێ پێ خۆش، هه‌روه‌سا چاڤ و گوه و جلكێت ته، و هه‌كه ئه‌ڤه د هۆسا نه‌بن ئه‌ڤه ڤێ رادگه‌هينيت دلێ ته نه‌يێ پاقژه، و دلێ ته، نه‌يێ دورسته وه‌كى تو بۆ خۆ دبێژى.. ئه‌ڤرۆ مخابن ئه‌م گه‌له‌كان به‌روڤاژى دبينين، رێكا خودێ ناگرن، و يێت ژ رێكا خودێ ده‌ركه‌فتين، و وێ ناكه‌ن يا خودێ ئه‌مرێ وان دكه‌ت و خودێ پێ خۆش، نه د خوارن و ڤه‌خوارنا خۆدا، و نه د جلكێت خۆدا، و نه د كار و كريارێت خۆدا، و دگه‌ل هندێ ژى دبێژن مانێ مه‌رج دله و دلێ من يێ پاقژه، و هه‌كه تو به‌رێ خۆ بده‌يێ دێ بينى هه‌مى كار و كريارێت وى، هه‌تا هاتن و چۆنا وى ژى هه‌مى خه‌له‌تن، و هه‌تا دبيت نڤێژان ژى نه‌كه‌ت، و گه‌له‌ك شۆلێت خراب ژى دكه‌ت، به‌لێ دگه‌ل هندێ ژى دبێژيت: دلێ من يێ پاقژه!!! كى دبێژيت دلێ ته يێ پاقژه؟ تو دبێژى؟ ئه‌زمانێ ته، ده‌ستێت ته، پێت ته، جلكێت ته، كار و كريارێت ته، هه‌لويستێت ته، هاتن و چۆنا ته، هه‌مى دبێژنه ته دره‌وه وه‌نينه.
و هه‌تا دلێ ته يێ پاقژ بيت، دڤێت ده‌ستێ ته يێ پاقژ بيت درێژ نه‌بيته خرابى و حه‌راميێ، و گوهێت ته د پاقژ بن حه‌رامى و نه‌كامى و ئاخفتن و سترانێت پويچ نه‌چنه تێدا، و چاڤێت ته د پاقژ بن و به‌رێ خۆدانا حه‌رام نه‌كه‌ن، و سنج و ئه‌خلاق و ره‌وشتێت ته د پاقژ بن، و جلكێ ته جلكێ ئيسلامى بيت، و رێڤه‌چۆنا ته و خوارن و ڤه‌خوارنا ته، ئه‌ڤه هه‌مى دڤێت ب وى ره‌نگى بن يێ خودێ پێ خۆش و ئه‌مر پێ كرى، ڤێجا هه‌كه ئه‌ڤه هه‌مى وه‌سا بن، بۆ خۆ بێژه؛ دلێ من يێ پاقژه، و هه‌كه تو يێ هۆسا نه‌بى نه‌خێر چو دل ژ دلێ ته ره‌شتر نينن، و هه‌ر ژبه‌ر هندێ زانايێ ناڤدار (حه‌سه‌ن ئه‌لبه‌سرى) دبێژيت: گه‌لى موسلمانان.. ئيسلام و ئيمان نه‌ئه‌ڤه‌يه: مرۆڤ بێژيت من ئيمان و باوه‌رى يا هه‌ى (ليس الايمان بالتمني ولا بالتحلي) باوه‌رى نه ب خۆزيايه يان ب ئاخفتنێ، به‌لێ باوه‌رى ئه‌ڤه‌يه: (ما وقر في القلب وصدقه العمل) باوه‌رى جهێ خۆ د دليدا بكه‌ت و تێدا بنه‌جه ببيت و كار و كريارێت وى دويف وێ باوه‌ريێ بهێن.
ئه‌م دێ هنده‌ك ژ نيشانێت دلێ پاك و پاقژ و ساخله‌م و سپه‌هى دياركه‌ين هيڤيه ل ده‌ف مه هه‌ميان هه‌بن:
ئێك: ژ نيشانێت دلێ پاقژ ئه‌ڤه‌يه: به‌رده‌وام يێ نه‌رازيه ژ خه‌له‌تيێ، و كار دكه‌ت خه‌له‌تيێ راكه‌ت و نه‌هێليت، ڤێجا ئه‌ڤ خه‌له‌تيه چ ب ده‌ستى رابيت، چ ب ئه‌زمانى، و هه‌كه نه‌شيا كێم كێم ب دلێ خۆ، و ب چو ره‌نگان دگه‌ل خه‌له‌تيێ نينه، و حه‌ژ خه‌له‌تيێ ناكه‌ت. و ل دۆر ڤێ چه‌ندێ پێغه‌مبه‌رێ خۆشتڤى سلاڤێت خودێ ل سه‌ربن ئه‌مر دكه‌ت: (من رأى منكم منكرا فليغيره بيده فان لم يستطع فبلسانه فان لم يستطع فبقله وذلك اضعف الايمان). هه‌ر كه‌سێ ژ هه‌وه خرابيه‌ك ديت بلا ب ده‌ستێ خۆ راكه‌ت و نه‌هێليت، هه‌كه نه‌شيا ب ئه‌زمانى، و هه‌كه نه‌شيا ب دلى و ئه‌ڤه لاوازترين پله‌يێت باوه‌ريێنه. و د ڤه‌گێرانا موسلميدا خودێ ژێ رازی بیت، هاتيه: (فمن جاهدهم بيده فهو مؤمن ومن جاهدهم بلسانه فهو مؤمن و من جاهدهم بقلبه فهو مؤمن وليس وراء ذلك حبة خردل من الايمان) هه‌ركه‌سێ ب ده‌ستێ خۆ جيهادێ بكه‌ت و خرابيێ راكه‌ت، ئه‌و خودان باروه‌ريه، و يێ ب ئه‌زمانێ خۆ خرابيێ راكه‌ت، ئه‌و خودان باوه‌ريه، و يێ ب دلێ خۆ جيهادێ بكه‌ت، و دگه‌ل خرابيێ نه‌بيت ئه‌و خودان باوه‌ريه، و پشتى ڤێ ته‌مه‌ت دندكا خه‌نده‌لكێ ژى باوه‌رى نينه، ڤێجا ئه‌و كه‌سێ ئه‌ڤرۆ دلێ خۆ پاقژ ددانيت، بلا خۆ بدانينه به‌رامبه‌رى ڤێ نيشانێ، كا ئه‌ڤه ل ده‌ف هه‌يه ئان نه؟ ئه‌رێ دلێ ته دئێشيت ده‌مێ تو خرابيێ دبينى ئان نه؟ ئه‌رێ تو به‌رانبه‌ر خرابى و گونه‌هان يێ چه‌وانى؟ ئه‌رێ تو يێ لێ بێ ده‌نگى و ده‌ستێ ته به‌س ب سه‌رێ ته‌ڤه‌يه؟ ئه‌رێ دلێ ته؛ ته پال دده‌ت د رێكا ڤان گونه‌هاندا راوه‌ستى ئان نه؟ ب راستى به‌رسڤا ته ل سه‌ر ڤان پسياران دێ ديار بيت كا دلێ ته يێ پاقژه ئان نه.
دوو: نيشانا دى ئه‌ڤه‌يه: حه‌ژێكرنا موسلمانان د دلێ مرۆڤيدا بيت، ڤێجا به‌رێ خۆ بدێ كا ئه‌ڤ نيشانه د دلێ ته‌دا هه‌يه ئان نه؟ ئه‌رێ حه‌ژێكرنا ته بۆ موسلمانان يا چه‌وايه؟ ئه‌رێ تو موسلمانى چێتر ژ يێ نێزيكى خۆ ددانى چونكى موسلمانه؟ ئه‌ڤه هه‌كه ئه‌وێ نێزيكى ته يێ گونه‌هكار بيت و نه‌يارێ خودێ و پێغه‌مبه‌رى بيت سلاڤێت خودێ ل سه‌ربن. و هه‌كه تو يێ هۆسا نه‌بى ئه‌ڤه رامانا وێ ئه‌وه دلێ ته نه‌يێ پاقژه، له‌وا خودايێ مه‌زن ئه‌مر دكه‌ت و دبێژيت: (لاَّ تَجِدُ قَوْماً يُؤْمِنُونَ بِاللَّهِ وَالْيَوْمِ الاٌّ خِرِ يُوَآدُّونَ مَنْ حَآدَّ اللَّهَ وَرَسُولَهُ وَلَوْ كَانُواْ ءَابَآءَهُمْ أَوْ أَبْنَآءَهُمْ أَوْ إِخْوَانَهُمْ أَوْ عَشِيرَتَهُمْ أُوْلَائِكَ كَتَبَ فِى قُلُوبِهِمُ الإِيمَانَ وَأَيَّدَهُمْ بِرُوحٍ مِّنْهُ وَيُدْخِلُهُمْ جَنَّاتٍ تَجْرِى مِن تَحْتِهَا الاٌّ نْهَارُ خَالِدِينَ فِيهَا رَضِىَ اللَّهُ عَنْهُمْ وَرَضُواْ عَنْهُ أُوْلَائِكَ حِزْبُ اللَّهِ أَلاَ إِنَّ حِزْبَ اللَّهِ هُمُ الْمُفْلِحُونَ) نينه هنده‌ك باوه‌ريێ ب خودێ و رۆژا قيامه‌تێ بينن، و حه‌ژ وان بكه‌ن ئه‌وێت نه‌ياره‌تى و دژمناتيا خودێ و پێغه‌مبه‌رێ وى دكه‌ن، خۆ ئه‌گه‌ر ئه‌و باب و باپيرێت وان بن، يان زارۆكێت وان بن، يان برايێت وان بن، يان عه‌شيره‌تا وان بيت، ئه‌ڤان خودێ باوه‌رى يا د دلێ واندا نڤێسى و بنه‌جهكرى و ب هاريكارى و پشته‌ڤانى و ب سه‌ركه‌فتنا خۆ ئه‌و يێت ب هێز ئێخستين و دێ وان به‌ته د به‌حه‌شتێت رويبار د بنرِا دچن و هه‌روهه‌ر دێ تێدا بن، خودێ ژ وان رازى بوو و ئه‌و ژى ژ خه‌لاتێ خودايێ خۆ رازى بوون، و ئه‌ڤه كۆما خودێنه، و باش بزانن يێت سه‌رفه‌راز هه‌ر كۆما خودێنه. ڤێجا به‌رێ خۆ بدێ دلێ پاقژ ئها ئه‌ڤه‌يه، تو نابينى ئه‌و دلێ پاقژ ئه‌وێ باوه‌رى ب خودێ و ب قيامه‌تێ هه‌ى ڤيانا وان هه‌لگريت ئه‌وێت دژمناتيا خودێ دكه‌ن و دژمناتيا پێغه‌مبه‌رێ وى سلاڤێت خودێ ل سه‌ربن دكه‌ن، خۆ هه‌كه ئه‌و مرۆڤ چه‌ند نێزيكى وى بن، يان عه‌شيره‌تا وى بن ئها ئه‌ڤه ئه‌ون يێت خودايێ مه‌زن باوه‌رى كريه د دلێت واندا و باوه‌رى د دلێت واندا نڤێسى و بنه‌جهكرى. (أُوْلَائِكَ كَتَبَ فِى قُلُوبِهِمُ الإِيمَانَ) ڤێجا خۆراگرتن و باوه‌ريا موكوم دێ بۆ ڤان بيت ئه‌وێت حه‌ژێكرنا وان بۆ هه‌ركه‌سێ هه‌بيت، ل دويف ترازيا خودێ بيت، و ل سه‌ر ڤى بناخه‌ى بيت.
دا به‌رێ خۆ بده‌ينێ كا سه‌حابى د چاوابوون (عه‌بدوللايێ كورِێ ئوبه‌ى بن سه‌لوول) خودێ ژێ رازی بیت، ده‌مێ گه‌هشتيه گوهێت وى بابێ وى هنده‌ك ئاخفتنێت خه‌له‌ت د ده‌رهه‌قا پێغه‌مبه‌ريدا يێت گۆتين، ئينا شيرێ خۆ هه‌لگرت، و گۆته پێغه‌مبه‌رى سلاڤێت خودێ ل سه‌ربن ئه‌ى پێغه‌مبه‌رێ خودێ.. ئه‌ز ب خودێ كه‌م هه‌كه ئه‌ڤرۆ ئێك (ئوبه‌ى بن سه‌لوول) بكوژيت ئه‌ز دێ كوژم، كوشتنا وى بۆ من دكه‌ڤيت، ئه‌ز ب خودێ كه‌م نه‌كو ئه‌ز كورِه‌كێ خرابم، من بابێ خۆ نه‌ڤێت، خه‌لكێ مه‌دينه‌يێ هه‌مى دزانن ئه‌ز ژ هه‌ميان بۆ بابێ خۆ چێترم، به‌لێ چونكى بابێ من دژمناتيا خودێ دكه‌ت بلا ب ده‌ستێ من بێته كوشتن نه ب ده‌ستێ ئێكێ دى، نه‌كو سوبه‌هى شه‌يتان د سينگێ مندا بغولغوليت و بێژيت: ئها وێهه ئه‌وه يێ بابێ ته كوشتى. پێغه‌مبه‌رى سلاڤێت خودێ ل سه‌ربن رێك نه‌دايێ، به‌لێ ئه‌ڤ مرۆڤه رازى نه‌بوو و چۆ سه‌ر رێكا مه‌دينه‌يێ و ل به‌ر سينگێ بابێ خۆ راوه‌ستيا، ده‌مێ بابێ وى هاتى گۆتێ: ب خودێ تو ناهێيه د مه‌دينه‌يێدا باژێرێ پێغه‌مبه‌رى سلاڤێت خودێ ل سه‌ربن هه‌تا پێغه‌مبه‌ر سلاڤێت خودێ ل سه‌ربن ده‌ستويريا ته نه‌ده‌ت، هندى هاتێ هه‌ر نه‌هێلا هه‌تا ئاخفتن گه‌هشتيه پێغه‌مبه‌رى سلاڤێت خودێ ل سه‌ربن، ئينا به‌رسڤ بۆ هنارت كو ده‌ستويريا بابێ خۆ بده‌ت. به‌لێ دگه‌ل هندێ ژى رێ نه‌دايێ و گۆتێ: هه‌ر تو ناهێى هه‌تا ئه‌و ئاخفتنا ته د ده‌رهه‌قێ پێغه‌مبه‌ريدا گۆتى، د راستا خۆدا نه‌بێژى، كو تو بێژى پێغه‌مبه‌ر سلاڤێت خودێ ل سه‌ربن و سه‌حابيێت وى ب رێز و رويمه‌تن و ئه‌ز يێ بێ رێز و رويمه‌تم، ئه‌ز ب خودێ كه‌م هه‌تا تو ڤێ ئاخفتنێ نه‌بێژى تو ب ژۆر ناكه‌ڤى.
به‌رێ خۆ بدێ ئها ئه‌ڤه‌نه دزانن (لاَّ تَجِدُ قَوْماً يُؤْمِنُونَ بِاللَّهِ وَالْيَوْمِ الاٌّ خِرِ يُوَآدُّونَ مَنْ حَآدَّ اللَّهَ وَرَسُولَهُ وَلَوْ كَانُواْ ءَابَآءَهُمْ أَوْ أَبْنَآءَهُمْ) خۆ باب و باپيرێت وان ژى بن ڤيانا وان ناهه‌لگرن هه‌كه دژمناتيا خودێ كرن. به‌رێ خۆ بدێ دويڤرِا (أَوْ أَبْنَاءَهُمْ) (ئه‌بو به‌كرى) خودێ ژێ رازی بیت، د شه‌رِێ به‌درێدا داخواز ژ كورِێ خۆ كر كو ب تنێ بكه‌ڤيته به‌ر سينگێ وى، به‌لێ كورِێ وى ره‌ڤى و نه‌شيا بكه‌ڤيته به‌ر سينگێ بابێ خۆ، (أَوْ إِخْوَانَهُمْ ) برايێ (موسعه‌بێ كورِێ عومه‌يرى) د شه‌رِێ به‌درێدا هاته ئێخسيركرن و د ناڤ ده‌ستێت دوو موسلماناندا بوو، و ده‌مێ موسعه‌ب خودێ ژێ رازی بیت، به‌ر ب ويڤه چۆيى كه‌يفا وى هات و گۆت: ئه‌ڤه مه‌هده‌رچيه‌ك و به‌رِه‌ڤانه‌ك بۆ من هات. موسعه‌بى خودێ ژێ رازی بیت، زانى برايێ وى دڤێت به‌رِه‌ڤاني بۆ بێته‌كرن، ئينا گۆته وان هه‌ردوو زه‌لامێت خه‌لكێ مه‌دينه‌يێ ئه‌وێت ده‌ستێت برايێ وى گرتين: لاو لاو ده‌ستێت وى بگڤێشن ده‌يكا وى گه‌له‌كا زه‌نگينه، ئينا گۆتێ براوۆ.. من هزركر تو دێ به‌رِه‌ڤانيێ ژ من كه‌ى، گۆتێ: ئه‌و برايێت منن ئه‌وێت تو د ناف ده‌ستێت واندا، چونكى وى دژمناتيا خودێ و پێغه‌مبه‌رى دكر. يان ژى (ئه‌بو عوبه‌يده) خودێ ژێ رازی بیت، د شه‌رِێ به‌درێدا بابێ وى كه‌فته به‌ر سينگێ وى، هه‌ر بابێ وى دڤيا بكه‌ڤيته به‌ر سينگێ وى، وى خۆ ددا پاش ئينا گۆتێ: ما ده‌م هه‌ر تو يێ سه‌ر ره‌قى و ژ سه‌ر ره‌قيا خۆ دژمناتيا خودێ و پێغه‌مبه‌رى سلاڤێت خودێ ل سه‌ربن دكه‌ى ئينا (ئه‌بو عوبه‌يده)ى بابێ خۆ كوشت و (عومه‌رێ كورِێ خه‌تابى) خودێ ژێ رازی بیت، خالێ خۆ (عاسێ كورِێ هاشمى) كوشت هه‌م خالێ وى بوو، و هه‌م ژ عه‌شيره‌تا وى بوو. ڤێجا دڤێت ڤيانا ته بۆ موسلمانان بيت و نه‌ڤيانا ته بۆ دژمنێت خودێ و پێغه‌مبه‌رى بيت، خۆ هه‌كه ئه‌و باب و باپير و كورِ و برا و عه‌شيره‌ت ژى بن، ئها ئه‌ڤان ﭽﭧ ﭨ ﭩ ﭪ ﭫ ﭼ ئه‌ڤان خودێ باوه‌رى يا د دلێت واندا نڤێسى و بنه‌جهكرى و ئها ئه‌ڤه‌يه دلێ پاقژ و ساخله‌م.
سێ: ديسا دلێ پاقژ و ساخله‌م ئه‌و دله يێ ب ته‌قوا و ژ خودێ دترسيت، ته‌قوا ژى ئه‌ڤه‌يه: تو خۆ بپارێزى ژ هه‌ر تشته‌كێ ته هێژاى كه‌ربا خودێ دكه‌ت و ل به‌ر ئه‌مرێ خودێڤه يێ راوه‌ستياى بى، و فه‌رمان و ئه‌مرێت وى ب جه بينى، و خۆ ژ نه‌واهيێت وى يێت هوير و گر دويربێخى، و پێگريێ ب هه‌مى فه‌رمانێت خودێ بكه‌ى. ئها ئه‌ڤه‌يه دلێ پاقژ و ساخله‌م. ئه‌رێ دلێ ته يێ هۆسايه؟ و ب ڤى ره‌نگيه؟ و هۆسا ترسا خودێ تێدايه؟ و ب ڤى ره‌نگى تو ل به‌ر ئه‌مرێت خودێڤه يێ راوه‌ستياى؟ به‌رسڤا دورست ل سه‌ر ڤان پسياران دێ ديار بيت كا راسته دلێ ته يێ پاقژه ئان نه؟
چار: ديسا ژ نيشانێت دلێ پاقژ ئه‌ڤه‌يه: به‌رده‌وام ئه‌مانه‌ت بێته پاراستن، و ئه‌مانه‌ت ژى ب رامانا خۆ يا گشتى نه‌يا به‌رته‌نگ، و ب ڤێ رامانێ نه‌فسا ته، و دينێ ته، و زارِۆكێت ته، و كارێ تو دكه‌ى ئه‌مانه‌تن، چ تو به‌رپرس بى، يان فه‌رمانبه‌ر بى، يان هه‌ر تشته‌كێ دى بى، دڤێت ئه‌مانه‌تي د هه‌مى كار و بارێت خۆدا به‌رچاڤ وه‌رگرى و بپارێزى، و كارێ خۆ ب دورستى و ب ئه‌مانه‌ت بكه‌ى، پێغه‌مبه‌ر سلاڤێت خودێ ل سه‌ربن دبێژيت: (ان الامانة نزلت في جذر قلوب الرجال، ينام الرجل النومة فتقبض الامانة من قلبه) ئانكو خودێ ئه‌مانه‌ت يا كريه د نيڤه‌كا دلێ مرۆڤاندا، مرۆڤێ هه‌ى دێ نڤيت و رابيت ئه‌مانه‌ت د دلێ ويدا نه‌مايه، هه‌لبه‌ت ئه‌ڤ حه‌ديسه ژ ڤه‌گێرانا بوخارى و موسلميه.
پێنج: دلێ دى يێ پاقژ و ساخله‌م ئه‌ڤه‌يه: به‌رێ خودانێ خۆ ناده‌ته هندێ، هنده‌ك ئاخفتنێت نه‌دورست و نه‌بنه‌جه د ده‌رهه‌قێ خه‌لكيدا بێژيت، يان ژى هزره‌كا خه‌له‌ت ژ هنده‌كان راكه‌ت، يان ئاخفتنه‌كا نه‌بنه‌جه د راستا موسلماناندا بێژيت. خودايێ مه‌زن دبێژيت: (وَلاَ تَقْفُ مَا لَيْسَ لَكَ بِهِ عِلْمٌ إِنَّ السَّمْعَ وَالْبَصَرَ وَالْفُؤَادَ كُلُّ أُولئِكَ كَانَ عَنْهُ مَسْؤُولاً) و (فؤاد) دله، و دل يێ به‌رپرسه به‌رانبه‌رى خودايێ مه‌زن.
شه‌ش: نيشانا دى خويشك و برايێت موسلمان ئه‌ڤه‌يه، تو شاده‌ييێ نه‌ڤه‌شێرى، خودايێ مه‌زن دبێژيت: (وَلاَ تَكْتُمُواْ الشَّهَادَةَ وَمَن يَكْتُمْهَا فَإِنَّهُ آثِمٌ قَلْبُهُ) و شاده‌ييێ (شاده‌ييا خۆ) نه‌ڤه‌شێرن، ب راستى هه‌چيێ شاده‌ييێ ڤه‌شێريت ئه‌و يێ گونه‌هكاره و دلێ وى نه‌يێ دورسته. و هه‌ر ب ڤێ رامانێ پێغه‌مبه‌رێ خۆشتڤى سلاڤێت خودێ ل سه‌ربن دبێژيت: (الساكت عن الحق شيطان اخرس) يێ خۆ ل سه‌ر حه‌قيێ بێ ده‌نگ بكه‌ت ئه‌و شه‌يتانه‌كێ لاله. ئه‌رێ دلێ ته ژ ڤان دلانه؟
حه‌فت: نيشانه‌كا دى ئه‌ڤه‌يه، ئه‌و تشتێ خودايێ مه‌زن دايه مه و بۆ مه كريه دين، پێدڤيه ئه‌م ب چاڤه‌كێ مه‌زن به‌رێ خۆ بده‌ينێ، نڤێژه، رۆژيه، زه‌كاته، حه‌جه، حيجابێ ژنێيه، و هه‌ر تشته‌كێ دبيت په‌يوه‌ندى ب دينيڤه بيت، جهێ داخێيه گه‌له‌ك جاران دێ هنده‌كان بينى خۆ موسلمان ژى ددانن، ب سڤكى به‌رێ خۆ دده‌نه حيجابا ژنێ و دبێژن: ئه‌ڤه چ ده‌رسۆكه، هه‌وه هۆسا گرێدايى، ما دێ خۆ خه‌ندقينى، يان ئه‌ڤه چ جلكن ڤێ هاڤينێ؟ ئاخر دێ سوژن، ئان ئه‌ڤه چ رهن هه‌وه به‌رداين، خودايێ مه‌زن ئه‌مر دكه‌ت: (ذلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ) هه‌ركه‌سێ ئه‌مرێت خودێ و رێ و نيشانێت دينێ وى مه‌زن بدانيت وه‌كى ئه‌مر پێ هاتيه‌كرن و ب جه بينيت، ب راستى ئه‌ڤه ئانكو: مه‌زن وه‌رگرتنا ئه‌مرێت خودێ، نيشانا ترسيانا دلانه ژ خودێ، ئها دلێت ساخله‌م و پاقژ ئه‌ڤه‌نه، ئه‌مرێت خودێ، و رێ و نيشانێت دينێ وى، و ئه‌حكامێت دينى هه‌ميان مه‌زن بدانيت، و ب چاڤه‌كێ مه‌زن به‌رێ خۆ بده‌تێ و ب جه بينيت، و ب سڤكى به‌رێ خۆ نه‌ده‌ته چو فه‌رمانێت خودێ.
هه‌شت: ديسا ژ نيشانێت دلێ پاقژ ئه‌ڤه‌يه، مرۆڤ پێغه‌مبه‌رى سلاڤێت خودێ ل سه‌ربن گه‌له‌ك و گه‌له‌ك مه‌زن بدانيت و جهه‌كێ گه‌له‌ك به‌رفره‌ه ژ دلێ خۆ بده‌تێ، و به‌لگه‌يێ ڤێ چه‌ندێ خودايێ مه‌زن ئه‌مر دكه‌ت: (إِنَّ الَّذِينَ يَغُضُّونَ أَصْوَاتَهُمْ عِندَ رَسُولِ اللَّهِ أُوْلَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى لَهُم مَّغْفِرَةٌ وَأَجْرٌ عَظِيمٌ) ب راستى ئه‌وێت ده‌نگێ خۆ ل ده‌ف پێغه‌مبه‌رێ خودێ نزم دكه‌ن (ئانكو مه‌زن ددانن) ئه‌ڤه ئه‌ون ئه‌وێت خودێ دلێت وان بۆ ته‌قوايێ ته‌رخانكرين. و دڤێت بزانين مه‌زنگرتنا پێغه‌مبه‌رى سلاڤێت خودێ ل سه‌ربن ب دويڤچۆن و گوهداريا وى دئێته‌كرن (قُلْ إِن كُنتُمْ تُحِبُّونَ اللَّهَ فَاتَّبِعُونِى يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَّحِيمٌ) هه‌كه هوين حه‌ژ خودێ دكه‌ن دويف من وه‌رن خودێ دێ حه‌ژ هه‌وه كه‌ت. هۆسا ديار دبيت مه‌زنگرتن و حه‌ژێكرنا پێغه‌مبه‌رى سلاڤێت خودێ ل سه‌ربن يا د دويڤچۆنا ويدا (وَمَآ آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُواْ وَاتَّقُواْ اللَّهَ إِنَّ اللَّهَ شَدِيدُ الْعِقَابِ) ئه‌و تشتێ پێغه‌مبه‌رى ئه‌مرێ هه‌وه پێ كرى بكه‌ن و هه‌رتشتێ هوين ژێ داينه پاش، خۆ ژێ بده‌نه پاش.
نه‌هـ: ديسا دلێ پاقژ ئه‌ڤه‌يه، ئه‌و ب خۆ بێژيته ته ئه‌ڤ كاره يێ خه‌له‌ته ئان نه، و چو تشت ژ دلى باشتر نوزانيت بۆ مرۆڤى تشتى ديار بكه‌ت كا يێ خه‌له‌ته ئان نه، و دڤێت دلێ مرۆڤى ب ڤى ده‌ورى راببيت، و بۆ كارێ باش رۆن ببيت، و بۆ كارێ خراب تێك بچيت و نه‌خۆش ببيت.
ده‌هـ: نيشانا دى يا دلێ پاقژ ئه‌ڤه‌يه، بيرا مرۆڤى بينيته كه‌نكه‌نه و گرگره‌يان ئه‌وێت ژ رێكا خودێ ده‌ركه‌فتين و د رێكا راستيێ و ئيسلامێ و دينێ خودێدا راوه‌ستياين، و ئه‌وێت دژمناتيا دينێ خودێ كرين د چه‌رخێت جودا جودادا كا چ ب سه‌رێ وان هات، و ب سه‌ر چ چۆن؟ دا مرۆڤ ژى نه‌كه‌فته د خه‌له‌تيا واندا، و دا ئه‌وا ب سه‌رێ وان هاتى ب سه‌رێ مرۆڤى ژى نه‌هێت، ئه‌وێت خۆ ب هێز و شيان و ده‌ستهه‌لاتا خۆ دفن بلند دكرن، خودايێ مه‌زن دبێژيت: (وَكَمْ أَهْلَكْنَا قَبْلَهُمْ مِّن قَرْنٍ هُمْ أَشَدُّ مِنْهُم بَطْشاً فَنَقَّبُواْ فِى الْبِلَادِ هَلْ مِن مَّحِيصٍ إِنَّ فِى ذَالِكَ لَذِكْرَى لِمَن كَانَ لَهُ قَلْبٌ أَوْ أَلْقَى السَّمْعَ وَهُوَ شَهِيدٌ) مه چه‌ند مله‌تێت ژ وان زه‌برده‌ستتر، و ب هێزتر به‌رى وان د هيلاك برن، گه‌له‌ك وه‌لات تێكڤه‌دابوون، ئه‌رێ وان ره‌ڤينه‌ك ژ مرنێ يان ژ ئيزايا خودێ هه‌بوو؟ ب راستى ئه‌ڤه چامه و ده‌رسن بۆ وى يێ خودان عه‌قل و دله‌كێ پاقژ هه‌ى. ڤێجا ب راستى يێ ئه‌ڤ دله هه‌ى، دێ بۆ خۆ ده‌رس و چامه‌يان وه‌رگريت و چو جاران پشته‌ڤانى و پێگريا دژمنێت خودێ ناكه‌ت، هه‌رده‌م دلێ وى دبێژيتێ كا فيرعه‌ون و چ لێهات، و چ ل هامانى هات، و چ ل فلانى و بێڤانى هات؟ هه‌تا ئه‌ڤێت دوهى و پێر فلان و بێڤان ئه‌ڤێت خۆ مه‌زن دكرن و ل به‌ر ئه‌زيه‌تا موسلمانان دگه‌ريان چ لێهاتن؟
يازده: هه‌روه‌سا دلێ پاقژ ئه‌ڤه‌يه، هه‌كه ئاخفتنا خێرێ گوه لێ بوو، گوهداريێ بۆ دكه‌ت، و ب جه دئينيت، و گوهێ خۆ ژ ئاخفتنا پويچ و خراب دگريت، و گوهێ خۆ ناده‌تێ، ئه‌رێ ئه‌ڤرۆ چه‌ند كه‌س، شه‌ڤ و رۆژێت خۆ ب ئاخفتنێت پويچ و په‌لاچ دبه‌ن؟! چ ستران بن، چ هه‌ر ئاخفتنه‌كا دى بيت. ڤێجا كه‌نگى يێ هۆسا دلێ وى يێ پاقژه؟ ئه‌رێ تو رۆژێ چه‌ند گوهێ خۆ دده‌يه باشيێ؟ تو چه‌ند ل دويف وێ باشيێ دچى و ب جه دئينى؟ و به‌رامبه‌ر ڤێ تو چه‌ند گوهێ خۆ دده‌يه خرابيێ؟ و تو چه‌ند ل دويف دچى؟ و د به‌رسڤێدا دێ زانى كا دلێ ته چه‌ند يێ پاقژه و چه‌ند نه. خودايێ مه‌زن د قورئانا پيرۆزدا مزگينيێ دده‌ته ڤان به‌نده‌يێت خۆ ئه‌وێت دل پاقژ؛ دبێژيت: (فَبَشِّرْ عِبَادِ الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ أُوْلَائِكَ الَّذِينَ هَدَاهُمُ اللَّهُ وَأُوْلَائِكَ هُمْ أُوْلُو الاٌّ لْبَابِ) مزگينيێ بده به‌نده‌يێت من ئه‌وێت گوه ل ئاخفتنان دبن و ل دويف يا چێتر دچن، ئه‌ڤه‌نه يێت خودێ راسته‌رێكرين و هه‌ر ئه‌ڤه‌نه دل پاقژ و خودان عه‌قل.
دازده: خويشك و برايێت باوه‌ريێ، ديسا نيشانه‌كا دى يا دلێ پاقژ ئه‌ڤه‌يه، دلێ مرۆڤى به‌رده‌وام يێ تۆبه‌دار بيت، و ژ گونه‌هان بترسيت و حسێبا خۆ و گونه‌هان بكه‌ت. پێغه‌مبه‌ر سلاڤێت خودێ ل سه‌ربن به‌رێ مه دده‌ته ڤێ چه‌ندێ و دبێژيت: (ب راستى ئه‌ز د رۆژێدا پتر ژ حه‌فتێ جاران تۆبه دكه‌م و داخوازا گونه‌ه ژێبرنێ دكه‌م). و ئه‌م دزانين پێغه‌مبه‌ر سلاڤێت خودێ ل سه‌ربن يێ گونه‌ه ژێبرى بوو و خودێ گونه‌ه نه‌هێلابوونه ل سه‌ر، به‌لێ دگه‌ل هندێ ژى هه‌ژمارا بۆرى د رۆژێدا تۆبه دكر دا ئه‌م بۆ خۆ بكه‌ينه ده‌رس و ئه‌م خودانێت خۆ هندێ بين. و هه‌ر سه‌ر ڤێ رامانێ خودايێ مه‌زن ئه‌مر دكه‌ت: (هَذَا مَا تُوعَدُونَ لِكُلِّ أَوَّابٍ حَفِيظٍ مَّنْ خَشِىَ الرَّحْمَنَ بِالْغَيْبِ وَجَآءَ بِقَلْبٍ مُّنِيبٍ) و دلێ (منيب) ئه‌و دله يێ ل خۆ دزڤريت و ره‌وشا وى تۆبه‌دار.
سێزده: ديسا ژ نيشانێت دلێ پاقژ ئه‌ڤه‌يه، نه‌ڤيانا موسلمانێت ڤى چه‌رخى و يێت چه‌رخێت بۆرين تێدا نه‌بيت، و دڤێت هندى سه‌رێ ده‌رزيكێ ژى كه‌رب و كين و نه‌ڤيانا چو موسلمانان ل ده‌ف نه‌بيت. ڤێجا به‌رێ خۆ بدێ كا دلێ ته ژ ڤان دلايه ئان نه؟ خودايێ مه‌زن به‌حسێ خودان باوه‌ران دكه‌ت و دبێژيت: خودان باوه‌ر ئه‌ون ئه‌وێت به‌رده‌وام ڤێ دوعايێ دكه‌ن: (وَالَّذِينَ جَآءُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالإَيمَانِ وَلاَ تَجْعَلْ فِى قُلُوبِنَا غِلاًّ لِّلَّذِينَ ءَامَنُواْ رَبَّنَآ إِنَّكَ رَءُوفٌ رَّحِيمٌ) و نه‌ڤيانا چو موسلمانان نه‌ئێخه د دلێت مه‌دا، ئه‌رێ ئه‌ڤه چه‌ند ل ده‌ف مه هه‌يه؟ مخابن ئه‌ڤرۆ گه‌له‌كان دێ بينى نه‌ڤيانا موسلمانان ب تنێ يا د دلێ ويدا، و د بنيرِا ڤيانا موسلمانان د دليدا نينه، ڤێجا كه‌نگى دلێ ڤى يێ پاقژه؟! و چه‌وا دلێ ڤى دێ يێ پاقژ بيت!!!
چارده: ديسا نيشانه‌كا دى ئه‌ڤه‌يه: يێ ئاڤا بيت ب دلۆڤانيێ و دلۆڤانى تێدا بيت، به‌لێ بۆ كێ؟ بۆ هه‌مى كه‌سان. خودايێ مه‌زن د راستا دويكه‌تيێت پێغه‌مبه‌راندا ئه‌مر دكه‌ت: (وَجَعَلْنَا فِى قُلُوبِ الَّذِينَ اتَّبَعُوهُ رَأْفَةً وَرَحْمَةً) مه نه‌رمى و دلۆڤانى ئێخستنه د دلێت واندا. ڤێجا هه‌كه دلێ ته دلۆڤانى تێدا نه‌بيت و يێ ره‌ق بيت ئه‌ڤه دلێ ته نه‌يێ ساخله‌مه و نه‌يێ پاقژه.
پازده: نيشانه‌كا دێ ژ نيشانێت دلێ پاقژ و ساخله‌م ئه‌ڤه‌يه، به‌رده‌وام شوكردار بيت ل سه‌ر وان كه‌ره‌م و نيعمه‌تێت خودێ داينێ، ئه‌و نيعمه‌تێت كه‌س نه‌شێت ب هه‌ژمار زه‌بكه‌ت. و ل سه‌ر ڤێ چه‌ندێ به‌يهه‌قى ژ پێغه‌مبه‌رى سلاڤێت خودێ ل سه‌ربن ڤه‌دگوهێزيت، دبێژيت: پێغه‌مبه‌رى سلاڤێت خودێ ل سه‌ربن گۆت: (قلب شاكر و لسان ذاكر وامرأة صالحة تعينك على امر دنياك و دينك خيرٌ مما اكتنزه الناس) دله‌كێ شوكردار، و ئه‌زمانه‌كێ زكركه‌ر، و ژنه‌كا باش هاريكاريا ته بكه‌ت ل سه‌ر كاروبارێت دين و دنيا ته؛ ئه‌ڤه ژ هه‌مى تشتان چێتره بگه‌هيته خه‌لكى، ڤێجا دا بزانين كا شوكر چيه؟ عائيشا ده‌يكا مه موسلمانان خودێ ژێ رازی بیت، دبێژيت: پشتى ئه‌ڤ ئايه‌ته هاتيه خوارێ: (إِنَّا فَتَحْنَا لَكَ فَتْحاً مُّبِيناً لِّيَغْفِرَ لَكَ اللَّهُ مَا تَقَدَّمَ مِن ذَنبِكَ وَمَا تَأَخَّرَ وَيُتِمَّ نِعْمَتَهُ عَلَيْكَ وَيَهْدِيَكَ صِرَاطاً مُّسْتَقِيماً) كو تێدا ئاشكرا دكه‌ت هه‌مى گونه‌هێت پێغه‌مبه‌رى سلاڤێت خودێ ل سه‌ربن يێت هاتينه ژێبرن ـ يێت پێشى و پاشيێ ـ پتر ب شه‌ڤ رادبوو و شه‌ڤنڤێژ دكرن و هند ل سه‌ر پێت خۆ د راوه‌ستيا هه‌تا پێت وى د وه‌رمتن و په‌ق په‌ق دبوون. گۆت: من گۆتێ: ئه‌ى پێغه‌مبه‌رێ خودێ.. بۆچى تو هنده خۆ دوه‌ستينى؟! ما خودێ گونه‌هێت ته هه‌مى ژێ نه‌برينه؟! به‌رێ خۆ بدێ كا به‌رسڤا پێغه‌مبه‌رى سلاڤێت خودێ ل سه‌ربن يا چه‌وا بوو؟ گۆت: (ڤێجا ما ژبه‌رهندێ ئه‌ز نه بمه به‌نده‌يه‌كێ شوكردار)، ئها هۆسا پێغه‌مبه‌ر سلاڤێت خودێ ل سه‌ربن د نيعمه‌ت و شوكرا نيعمه‌تێ دگه‌هشت، ئه‌و ژى ئه‌ڤه‌يه تو په‌رستنا خۆ پتر لێ بكه‌ى و پتر نێزيكى خودێ ببى، نه هه‌ما به‌س ده‌ڤ ب تنێ بيت؟
شازده: نيشانه‌كا دى ئه‌ڤه‌يه، ترسا خودێ به‌رده‌وام د دليدا بيت، و به‌رده‌وام ژ خودێ بترسيت، و ب راستى يێ ژ خودێ ژى بترسيت، دێ ل به‌ر ئه‌مرێ وى بيت، و ناده‌ته سه‌ر چو فه‌رمانێت وى، ڤێجا ئه‌ڤ فه‌رمانه چ فه‌رمان بيت، يا ب نڤێژێڤه گرێداى بيت، يان ب سياسه‌تێڤه، يان ب جلكانڤه، يان هه‌ر تشته‌كێ دى. له‌وا خودايێ مه‌زن ب ڤى ره‌نگى خودان باوه‌ران و موسلمانان دده‌ته نياسين: (إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ ءَايَاتُهُ زَادَتْهُمْ إِيمَاناً وَعَلَى رَبِّهِمْ يَتَوَكَّلُونَ) ب راستى خودان باوه‌ر ئه‌ون ئه‌وێت هه‌ر گاڤا ناڤێ خودێ هاته ئينان دلێت وان ژ ترساندا دله‌رزن و پرِى ترسا خودێ دبيت. و د ئايه‌ته‌كا ديدا مزگينيێ دده‌ته وان ئه‌وێت دلێت وان ب ترس: (الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَالصَّابِرِينَ عَلَى مَآ أَصَابَهُمْ وَالْمُقِيمِى الصَّلَواةِ وَمِمَّا رَزَقْنَاهُمْ يُنفِقُونَ) ئه‌ى موحه‌ممه‌د.. مزگينيێ بده وان ئه‌وێت خۆ بۆ خودێ دشكێنن و به‌رده‌وام به‌ر ئه‌مرێ وى بن، ئه‌وێت گاڤا ناڤێ خودێ هاته‌ئينان دلێت وان ژ ترساندا دله‌رزن. بۆچى ئه‌ڤ ترسه بۆ وان چێدبيت: (يَخَافُونَ يَوْماً تَتَقَلَّبُ فِيهِ الْقُلُوبُ وَالأَبْصَارُ) ژ رۆژه‌كێ دترسن [كو رۆژا قيامه‌تێ يه] دل و چاڤ تێدا دزڤرن و ناراوه‌ستن، دل خۆ دقوتن و د ناڤبه‌را هيڤى و بێ هيڤيێدا دئێن و دچن، و چاڤ ژ ڤى ملى بۆ ملێ دى دزڤرن كا دێ كه‌ڤيته دگه‌ل كيژ ملى، ملێ دۆژه‌هێ يان به‌حه‌شتێ. ئها ژ ڤێ رۆژێ دترسن. ڤێرێ فه‌ره ئه‌م ڤێ پسيارێ بكه‌ين، ئه‌رێ دل ترسيانى چه‌وايه؟ نه‌ئه‌وه تو بكه‌يه گرى، و نه‌ئه‌وه تو بكه‌يه هه‌وار و قێژى، به‌لێ ئه‌وه ژ ترسێت خودێدا؛ گونه‌هێ بهێلى، و يێ ژ گونه‌هێ دويربى، ئها ترس ئه‌ڤه‌يه تو گونه‌هێ نه‌كه‌ى. و ترسا ژ خودێ ئه‌ڤه‌يه تو ژ كه‌سێ دى د راستا دينێ خۆدا نه‌ترسى ئه‌و كى بيت، و چ بيت، چونكى يێ د دنيايێدا ژ خودێ بترسيت ئه‌و رۆژا قيامه‌تێ ناترسيت، پێغه‌مبه‌رێ خۆشتڤى سلاڤێت خودێ ل سه‌ربن هه‌روه‌كى به‌يهه‌قى و ئبن حه‌بان ڤه‌دگێرن، دبێژيت: (عن ابي هريرة عن النبي (صلى الله عليه وصلم) يروي عن ربه جل وعلا قال: (وعزتي لااجمع على عبدي خوفين وامنين اذا خافنى في الدنيا امنته يوم القيامة واذا امنني في الدنيا اخفته يوم القيامة ). ئانكو خودێ دبێژيت: ئه‌ز ب مه‌زناتيا خۆ كه‌م، ئه‌ز دوو ترسان و ئێمناهيان ل سه‌ر به‌نده‌يێ خۆ كۆم ناكه‌م، هه‌كه ئه‌و د دنيايێدا ژ من ترسيا ئه‌ز دێ د رۆژا ئاخره‌تێدا ئێمنكه‌م، و هه‌كه ئه‌و د دنيايێدا ژ من ئێمن بوو، ئه‌ز دێ د ئاخره‌تێدا ترسينم. ڤێجا دڤێت ترسا خودێ وه‌ل مرۆڤى بكه‌ت ب چو ره‌نگان شه‌يتان و هه‌ڤالێت شه‌يتانى نه‌شێنه مرۆڤى، ڤێجا چ ب رێكا ترسێ بێنه مرۆڤى، يان ب رێكا ته‌ماعيێ و پاريكان.
هه‌ڤده: ديسا نيشانه‌كا دى ژ نيشانێت دلێ پاقژ و ساخله‌م ئه‌ڤه‌يه، مرۆڤ يێ پشت راست نه‌بيت ئه‌و كار و كريارێت كرين هه‌مى دێ ژێ قه‌بويل بن؟ چونكى هه‌كه ئه‌و ژ خۆ پشت راست بوو، وى ده‌مى دێ بێژيت، ما كى ژ من باشتره؟ ئه‌ز رۆژيگرم، نڤێژكه‌رم، يێ هۆسامه و هۆسامه، ڤێجا دێ بێ منه‌ت بيت، و دلێ پاقژ نه‌يێ وه‌سايه، به‌رده‌وام دبێژيت، ما من چ كريه و ئه‌ڤا من كرى ژى، كى دبێژيت دێ ژ من قه‌بويل بيت؟ خودايێ مه‌زن ب ڤى ره‌نگى ره‌وشا خودێناسان دكه‌ت: (وَالَّذِينَ يُؤْتُونَ مَآ ءاتَواْ وَّقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ) ئانكو ئه‌وێت وێ خێر و باشيا ئه‌و دكه‌ن، دكه‌ن و دلێ وان هه‌ر يێ ب ترسه؛ دترسن خودێ ژ وان قه‌بويل نه‌كه‌ت، بۆچى هه‌ر ب ترسن؟ چونكى هه‌ر دێ ب بال خودێڤه زڤرن. پێغه‌مبه‌رێ خۆشتڤى د راستا ڤاندا دبێژيت: ئه‌ڤه ئه‌ون يێت نڤێژكه‌ر و رۆژيگر و خێركه‌ر، به‌لێ هه‌ر دلێ وان يێ ب ترسه خودێ ژێ قه‌بويل نه‌كه‌ت. (حه‌سه‌ن ئه‌لبه‌سرى) دبێژيت: پێشيێت باش و سه‌حابى ژ هه‌وه پتر ترسا خێرێت خۆ هه‌لدگرتن كو ژێ نه‌ئێنه قه‌بويلكرن ژ ترسا هه‌وه ژ گونه‌هێت هه‌وه كو پێ بهێنه ئيزادان، ڤێجا هه‌كه دل يێ هۆسا بيت دێ مرۆڤى پالده‌ت بۆ:
ئێك، كار و كريارێت مرۆڤى به‌س بۆ خودێ ب تنێ بن و رويمه‌تى تێدا نه‌بيت.
دوو، پتر خێر و خێراتان و كار و كريارێت باش بكه‌ت.
سێ، ئه‌و كار و كريار د راست و دورست و بنه‌جه بن ژ ترسا هندێ كو نه‌هێنه قه‌بويلكرن.
دويماهيێ.. ئه‌م دوعا ژ خودايێ مه‌زن و خودان باش ناڤان دكه‌ين هاريكاريا مه بكه‌ت و هاريكاريا هه‌وه بكه‌ت و دلێت مه هه‌ميان پاك و پاقژ بكه‌ت، و دلێت مه گۆمرا نه‌كه‌ت پشتى راسته‌رێ كرين، و پشتى ئيسلامه‌تى و باوه‌رى كريه تێدا، و گونه‌هێت مه و يێت هه‌مى موسلمانان ژێ ببه‌ت، و نه‌ڤيانا چو موسلمانان نه‌ئێخيته سه‌ر دلێت مه، و دلێت مه ب باوه‌ريێ رۆن بكه‌ت و مه ژ وى دلى بپارێزيت يێ ژ خودێ نه‌ترسيت و دلێت مه ل سه‌ر دينێ خۆ و گوهداريا خۆ موكوم بكه‌ت، و مه ژ گونه‌هان بشۆت و دلێت مه پاقژ و ساخله‌م بكه‌ت، و د دنيايێدا دلێ مه تژى ترسا خۆ بكه‌ت، و د ئاخره‌تێدا د ئێمن بين و نه‌ترسين، و خودێ چێتر دزانيت.
