ب / ديموكراسيه‌ت ـ دوير ژ پێناسێت ئه‌يديۆلۆجى و ئه‌كاديمى ـ رێكه‌كه ژ رێكێت رێڤه‌برن و گێڕانا حوكمرانيێ، و رێكه‌كه خه‌لك پێ ره‌نگێ حوكمى بۆ خۆ و حاكمێ خۆ هه‌دلبژێرن و نه‌هێلن كه‌س خۆ ل سه‌ر وان بسه‌پينيت، و ب دكتاتۆريه‌ت و تاكره‌وييا خۆ هه‌مى ره‌نگێت ئازاردانێ بده‌ته به‌ر وان، و ب ديموكراسيه‌تێ نه‌هێلن چۆ حوكمدار مله‌تى به‌رف رێبازا وى دڤێت ببه‌ت، و وان حه‌ز و ئيراده نه‌بيت، حه‌ز حه‌زا حاكمى و ده‌سهه‌لاتداري بيت. ديسا ديموكراسيه‌ت رێكه‌كه مله‌ت پێ دبيته خودان و ژێده‌رێ هه‌مى ده‌سهه‌لاتان، و هه‌ركه‌سێ زێده‌گاڤى كر، كى بيت.. دێ هێته به‌رپرسياركرن به‌رامبه‌ر دادگه‌ها مله‌تى، و يێ باشى كر دێ ده‌ستخۆشى لێ هێته‌كرن، و يێ خرابى كر دێ حسێبا وى هێته‌كرن، و هه‌كه ديموكراسيه‌ت ئه‌ڤه بيت، ئه‌ڤه كاكلكا ئيسلامێيه و ب ڤى ره‌نگى چو جوداهى د ناڤبه‌را سيسته‌مێ ديموكراسيه‌تێ و سيسته‌مێ شوورا و راوێژكاريێ د ئيسلامێدا نينه، و ئيسلام يا هاتى بۆ جهئينانا وان ئارمانجان، و هه‌رجهێ حيكمه‌ت و شاره‌زايى لێ هاته ديتن موسلمان هه‌ژيتره وه‌رگريت، و ژ راسته‌رێيا پێغه‌مبه‌رى سلاڤێت خودێ ل سه‌ربن ئه‌م مفاداريێ ژ تشتان وه‌رگرين بلا نه‌يێ مه بيت و سيسته‌مه‌كێ گاوريێ ژى بيت، و خۆ هه‌كه حه‌رامي ژى تێدا بيت.. به‌لێ دڤێت ئه‌م ژ وێ حه‌راميێ پاك و پاقژكه‌ين وه‌كى دى مفا بۆ خۆ ژێ وه‌رگرين. ده‌مێ ئه‌ڤ ئايه‌ته ل سه‌ر پێغه‌مبه‌رى سلاڤێت خودێ ل سه‌ربن هاتيه خوارێ: (وَأَنذِرْ عَشِيرَتَكَ الْأَقْرَبِينَ) و ل پێشيێ و ب ئاشكه‌رايى مرۆڤ و لێزمێت خۆ يێت نێزيك، ئاگه‌هدار بكه. پێغه‌مبه‌رى سلاڤێت خودێ ل سه‌ربن رێكه‌ك ب كارئينا بۆ كۆمكرنا وان؛ دا ئه‌مرێ خودێ ب جهـ بينيت و ئاگه‌هداريێ بده‌ته وان. ژ رێكێت جاهليه‌تێ يێت وان ب كار دئينان ئه‌و ژى هه‌كه ئێكى ڤيابا زوى خه‌لكى به‌ره‌ف خۆڤه كۆمكه‌ت؛ دا خۆ رويسكه‌ت و چيته سه‌ر جهه‌كێ بلند و دا گازيكه‌ت ئه‌ز ئاگه‌هداركه‌رێ رويسم.. ئه‌ز ئاگه‌هداركه‌رێ روسيم.. و دا خه‌لك به‌ر ب ويڤه چن و كۆم بن. پێغه‌مبه‌رى ژى سلاڤێت خودێ ل سه‌ربن هه‌ر ئه‌ڤ رێكه ب كارئينا.. به‌لێ پشتى ژ تشتێ حه‌رام و نه‌دورست پاك و پاقژكرى ئه‌و ژى خۆ رويسكرنه، پێغه‌مبه‌رى سلاڤێت خودێ ل سه‌ربن جلك ژ به‌ر خۆ نه‌كرن و ئه‌ڤ رێكه ب كارئينا تشتێ حه‌رام تێدا ده‌رێخست و يێ نه‌حه‌رام وه‌كى خۆ هێلا و مفا ژى وه‌رگرت د ئاگه‌هداركرنا مله‌تێ خۆدا.
ژ ڤێ رويدانێ دهێته زانين، دڤێت ئه‌م موسلمان د شاره‌زابين و نه‌هه‌ر تشته‌كێ غه‌يرى مه ب كار دئينيت يان د ناف غه‌يرى مه‌دا هاتبيت نه‌دورسته و نابيت بێته وه‌رگرتن! به‌لكى به‌روڤاژى خۆ هه‌كه تشته‌كێ حه‌رام ژى تێدا بيت، دبيت ژ حه‌راميێ بێته پاقژكرن و جوداكرن، و مفا ژێ بهێته وه‌رگرتن، و هۆسا ئه‌م دشێين ديموكراسيه‌تێ ژ تشتێت حه‌رام و نه‌دورست پاقژكه‌ين و مفا ژێ بێته وه‌رگرتن، و خودێ چێتر دزانيت.
